ކީރިތި ޤުރުއާން ކިޔެވުމުގެ 34 ވަނަ ޤައުމީ މުބާރާތުގެ، އެއްވަނަ އާޔަން އަޙްމަދު އިނާންއާއި ހަނާން ހުސެއިން ޝަރީފް ޙާސިލްކޮށްފިއެވެ.
ކީރިތި ޤުރުއާން ކިޔެވުމުގެ 34 ވަނަ ޤައުމީ މުބާރާތުގައި 5 ކެޓަގަރީއަކުން 1700 އަށްވުރެ ގިނަ ބައިވެރިން ވަނީ ކިޔަވާފައެވެ.
ކީރިތި ޤުރުއާން ކިޔެވުމުގެ 34 ވަނަ ޤައުމީ މުބާރާތުގެ އެކި ކެޓަގަރީތަކުން އެއްވަނައަށް ހޮވުނު ފަރާތްތަކަށް އިނާމާއި ހަނދާނީ ފިލައާއި ޓްރޯފީގެ އިތުރުން ރައީސުލްޖުމްހޫރިއްޔާ ދެއްވާ ޚާއްސަ އިނާމް ޙަވާލުކޮށްދެއްވީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙްއެވެ.
ކީރިތި ޤުރުއާން ކިޔެވުމުގެ 34 ވަނަ ޤައުމީ މުބާރާތުގައި މުޅި މުބާރާތުން އެއްވަނަ އަށް ގޮސްފައިވަނީ އާޔަން އަޙްމަދު އިނާންއާއި ހަނާން ހުސެއިން ޝަރީފްއެވެ. މުޅިމުބާރާތުން ބަލައިގެން ކިޔެވުމުގެ ގޮފިން އެއްވަނަ ޙާސިލްކޮށްފައިވަނީވެސް މިދެދަރިވަރުންނެވެ. މުބާރާތުގެ ނުބަލާ ކިޔެވުމުގެ ގޮފިން މުޅި މުބާރާތުން އެއްވަނަ ޙާސިލްކޮށްފައިވަނީ ފަތިމަތް ޝާހާ ހުސެއިންއެވެ. ޙާފިޒް ކަމުގެ ގޮފިން އެއްވަނަ ޙާސިލްކޮށްފައިވަނީ ފާތުމަތު ޝާހާ ޒާހިރުއެވެ. މުވައްސަސާތަކުގެ ބައިން އަތޮޅު ކައުންސިލްތަކުގެ ދާއިރާއިން އެއްވަނަ ހާސިލްކޮށްފައިވަނީ ފ.އަތޮޅު ކައުންސިލް އިދާރާއެވެ. މިރަސްމިއްޔާތުގައިވަނީ މިގޮފިތަކުން ދެވަނަ އަދި ތިންވަނަ ޙާސިލްކުރި ދަރިވަރުންނަށްވެސް އިނާމާ ހަނދާނީ ލިޔުން ޙަވާލުކޮށްފައެވެ.
މިރަސްމިއްޔާތުގައި ވާހަކަ ދައްކަވަމުން ކީރިތި ޤުރުއާނާ ބެހޭ މަރުކަޒު ހިންގެވުމާ ޙަވާލުވެ ހުންނެވި މިނިސްޓަރ އޮފް ސްޓޭޓް ފޮރ އިސްލާމިކް އެފެއާޒް އައްޝައިޚް އިލްޔާސް ޖަމާލް ވިދާޅުވީ އިސްލާމީ އުއްމަތުގައި މިވަގުތު ހުރި ހުރިހާ މައްސަލައެއް ޙައްލުކުރުމަށް ކީރިތި ޤުރުއާން ދައްކައިދޭ މަގަށް ރުޖޫޢަވާންޖެހޭކަމަށެވެ. އެއީ އިސްލާމް ދީން ދައްކައިދޭ އަމާންކަމުގެ މަގުކަމަށް ސްޓޭޓް މިނިސްޓަރ ވިދާޅުވިއެވެ. އަދި ޤައުމިއްޔަތުގެ އެންމެ ވަރުގަދަ ބިންގާކަމުގައިވާ ކުޑަކުދިންގެ އަޚްލާޤު ޒީނަތްތެރިކުރަންޖެހެނީ ޤުރުއާނުގެ އަލީގައިކަމަށް ސްޓޭޓް މިނިސްޓަރ އިލްޔާސް ޖަމާލް ވިދާޅުވިއެވެ.
ކީރިތި ޤުރުއާން ކިޔެވުމުގެ 34 ވަނަ ޤައުމީ މުބާރާތަކީ މިހާތަނަށް ރާއްޖޭގައި ބޭއްވި އެންމެ ބޮޑު ޤުރުއާން މުބާރާތްކަމަށް އިސްލާމިކް މިނިސްޓްރީން ވިދާޅުވެއެވެ. މިމުބާރާތުގައި ބައިވެރިވުމަށް ހުޅުވާލި ފުރުސަތުގައި އޯޑިޝަންގައި ބައިވެރިވި 4000 އަށްވުރެ ގިނަ ކުދިންގެ ތެރެއިން 98 މުއައްސަސާއަކުން 6 ޢުމުރުފުރާއަކުން 1700 ފަރާތެއް ވަނީ މުބާރާތުގައި ކިޔަވާފައެވެ. އަދި ޙާފިޒުންގެ ގޮތުގައި 16 ފަރާތެއް ވަނީ ބައިވެރިވެފައެވެ. މިމުބާރާތްތަކުގައި ސްކޫލްތަކާއި ކައުންސިލްތަކާއި ޤުރުއާން ކްލާސްތަކުންވަނީ ވާދަކޮށްފައެވެ.