ތަރުކާރީ
އާއި މޭވާގެ ބައެއް ބާވަތްތައް ރާއްޖެއަށް އެތެރެކުރާ މިންވަރު މަދުކޮށް އެތަކެތި
ރާއްޖޭގައި ހައްދާ މިންވަރު އިތުރުކުރުމަށްޓަކައި މަސައްކަތްތަކެއް ކުރެވެމުންދާ
ކަމަށް މިނިސްޓްރީ އޮފް ފިޝަރީޒް އެންޑް އެގްރިކަލްޗަރ އިން ހާމަކުރައްވައިފިއެވެ.
އެމިނިސްޓްރީން
މަޢުލޫމާތުދެއްވި ގޮތުގައި ރާއްޖޭގައި ފުޅާ ދާއިރާއެއްގައި ހެއްދިދާނެ ތަރުކާރީ
އާއި މޭވާގެ 8 ބާވަތެއް މިހާރު ފާހަގަކޮށްފައިވާ ކަމަށެވެ.
އެގޮތުން އެ މިނިސްޓްރީން ފާހަގަކޮށްފައިވާ 8 ބާވަތަކީ، ފަޅޯ، ކަރާ، ކިއުކަމްބާ، މިރުސް، ދޮންކެޔޮ، ބަރަބޯ،
ބަށި އަދި ތޮޅިއެވެ.
ދަނޑުވެރިކަމާއި
ބެހޭ ވުޒާރާއިން މަޢުލޫމާތުދެއްވާ ގޮތުގައި މިކަމަށް ކުރައްވަން ޖެހޭ
ޓެކްނިކަލް ހުރިހާ މަސައްކަތެއްކޮށް މިހާރުވަނީ ނިމިފައެވެ. އެހެން ނަމަވެސް މި
މަސައްކަތް ޢަމަލީ ގޮތުން ފެށިގެން ދާނެ ދުވަހެއް އަދި ވިދާޅުވާން ދަތިކަމަށްވެސް އެ ވުޒާރާއިން
ހާމަކުރައްވައެވެ.
ދަނޑުވެރިކަމާއި ބެހޭ ވުޒާރާއިން މަޢުލޫމާތުދެއްވާގޮތުގައި އެ ވުޒާރާގެ އަމާޒަކީ، މި ބާވަތްތައް
ރާއްޖެއަށް އެތެރެކުރާ މިންވަރު މަދު ކުރަމުން ގޮސް، އެބާވަތްތައް ރާއްޖެއަށް
އެތެރެކުރުން އެއްކޮށް ހުއްޓާލުމެވެ.