ދާދި ފަހުން ޤާއިމުކުރި އޭޝިއަން އިންފްރާސްޓްރަކްޗަރ އިންވެސްޓްމެންޓް ބޭންކް ނުވަތަ އޭ.އައި.އައި.ބީގެ މަޤްސަދަކީ އޭޝިޔާ ބައްރުގެ ހުރިހާ ސަރަހައްދެއް ތަރައްޤީކޮށް، ޤައުމުތަކުގެ މެދުގައި އޮންނަ ދޭދޭ ގުޅުން ހަރުދަނާ ކުރުން ކަމަށް އެބޭންކުގެ ރައީސް ވިދާޅުވެއްޖެއެވެ.ޗައިނާގެ ސީ.ސީ.ޓީ.ވީއަށް ދެއްވި އިންޓަވިއުއެއްގައި ވާހަކަ ދައްކަވަމުން ބޭންކުގެ ރައީސް ޖިން ލީޗިއުން ވިދާޅުވީ، ޗައިނާއިން އިސްނަގައިގެން ޤާއިމުކުރި މި ބޭންކުގެ މަޤްސަދަކީ އޭޝިޔާ ބައްރަށް އިޤްތިސާދީ އަދި އިޖްތިމާޢީ ތަރައްޤީ ގެނައުން ކަމަށެވެ. މިކަން ހާސިލްކުރުމަށް ބޭންކުން މަސައްކަތް ކުރާނީ ފައުންޑިންގް މެމްބަރުންގެ މަސްލަހަތަށް ކަމަށްވެސް ލީ ވިދާޅުވިއެވެ. އަދި އޭ.އައި.އައި.ބީ ޤާއިމުކުރުމަށް ނިންމި ހިސާބުންވެސް ހުޅަނގުން މިކަމުގައި ބޮޑެތި ފާޑުކިއުންތަކެއް އަމާޒުކޮށްފައިވާ ކަމަށާއި ޗައިނާއިން ބޭނުންވަނީ ބައިނަލްއަޤްވާމީ އިޤްތިސާދުގައި އިތުރު ޒިންމާތައް އުފުލަން ކަމަށްވެސް ލީ ވިދާޅުވިއެވެ.މިދިޔަ ހޮނިހިރު ދުވަހު ރަސްމީކޮށް ހުޅުވި އޭ.އައި.އައި.ބީގެ މައި 3 ހިއްސާދާރުންނަކީ ޗައިނާ، އިންޑިއާ އަދި ރަޝިޔާއެވެ. މި ބޭންކުގެ ފައުންޑިންގް މެމްބަރުންގެ ތެރޭގައި ފަރަންސޭސިވިލާތާއި، ސަޢޫދީ ޢަރަބިއްޔާގެ އިތުރުން ދިވެހި ރާއްޖެވެސް ހިމެނެއެވެ.