2015 ވަނަ އަހަރު ދުނިޔޭގެ ދެވަނައަށް އެންމެ ބޮޑު އިޤްތިސާދެއް އޮންނަ ޗައިނާގެ އިޤްތިސާދު ކުރިއަރާފައިވަނީ، 6.9 އިންސައްތައަށް ކަމަށާއި މިއީ ވޭތުވެދިޔަ 25 އަހަރު ދުވަހުގެ ތެރޭގައި ޗައިނާގެ އިޤްތިސާދީ ކުރިއެރުން މިހާ ބޮޑަށް ދަށަށް ދިޔަ ފުރަތަމަ ފަހަރުކަމަށް އެގައުމުން ހާމަކޮށްފިއެވެ.2014 ވަނަ އަހަރު ޗައިނާގެ އިޤްތިސާދު ކުރިއަރާފައިވަނީ، 7.3 އިންސައްތައަށެވެ. މިދިޔަ އަހަރު ޗައިނާގެ އިޤްތިސާދަށް އައި ހީނަރުކަމުގެ ސަބަބުން އިންވެސްޓަރުންގެ މެދުގައި ވަނީ ނުތަނަވަސްކަން އުފެދިފައެވެ. މިކަމާ ބެހޭގޮތުން ޗައިނާގެ ބޮޑު ވަޒީރު ލީ ކިއުޗޭންގް ވިދާޅުވީ، ޗައިނާގެ އިޤްތިސާދީ ދުވެލި މަޑު ޖެހުނު ނަމަވެސް އިޤްތިސާދުން އާ ވަޒީފާތައް އުފެދިގެންދާ ނަމަ ޤައުމަށް ކުރިއެރުންތައް ލިބިގެންދާނެ ކަމަށެވެ.ޗައިނާގެ އިޤްތިސާދަށް އައިސްފައިވާ ހީނަރުކަމުގެ ސަބަބުން އެގައުމުން ޚަރަދު ކުޑަކުރުމުގެ އިތުރު ފިޔަވަޅުތައް އަޅާނެ ކަމަށް ބެލެވެއެވެ.