ޕާކިސްތާނުގެ ހުޅަނގު އުތުރުގެ ޚައިބަރު ޕަޚްތުންޚުވާ ޕްރޮވިންސްގައި ހުންނަ ޔުނިވަރސިޓީއަކަށް ހަނގުރާމަވެރިންގެ ބަޔަކު ދިން ހަމަލާއެއްގައި 19 އަށް ވުރެ ގިނަ މީހުން މަރުވެއްޖެއެވެ.އެރަށުގައި ހުންނަ ބަޗާ ޚާން ޔުނިވަރސިޓީއަށް ދިން ހަމަލާގައި ބައިވެރިވި ހަނގުރާމަވެރިންގެ ތެރެއިން ހަތަރު މީހަކު މަރާލާފައިވާ ކަން ޕާކިސްތާނުގެ ފުލުހުންވަނީ ހާމަކޮށްފައެވެ. ޕާކިސްތާނުގެ ފުލުހުން ބުނީ ޔުނިވަރސިޓީގައި ތިބި ދަރިވަރުން ސަލާމަތްކޮށް ރައްކާތެރި ހިސާބުތަކަށް ގެންގޮސް ހަނގުރާމަވެރިން ހުއްޓުވުމަށް ކުރިއަށް ގެންދިޔަ އޮޕަރޭޝަން މިހާރު ނިންމާލާފައިވާކަމަށެވެ.މި ހާދިސާގައި ގިނަ އަދަދެއްގެ ބަޔަކު ޒަޚަމްވެފައިވެއެވެ. ބަޗާ ޚާން ޔުނިވާރސިޓީއަށް ދިން ހަމަލާގެ ޒިންމާ އުފުލާފައިވަނީ ތާލިބާނު ހަނގުރާމަވެރި ޖަމާޢަތުންނެވެ. ޕާކިސްތާނުގައި ދޭ މިފަދަ ހަމަލާތައް ފަހަކަށް އައިސްވަނީ އިތުރުވެފައެވެ.މިއަދުގެ ހަމަލާ ދިން ޔުނިވަރސިޓީއަކީ 2014 ވަނަ އަހަރުގެ ޑިސެމްބަރުމަހު ތާލިބާނުން ނުރައްކާތެރި ހަމަލާތަކެއް އަމާޒުކޮށްފައިވާ ސްކޫލަކާއި މާ ދުރުނޫން ހިސާބެއްގައި ހުންނަ ޔުނިވަރސިޓީއެކެވެ.