އެންބީސީން ގެނެސްދޭ ސިންގިންގް ރިއަލިޓީ ޝޯ "ދަ ވޮއިސް"ގެ 22 ވަނަ ސީޒަނަށް އެ ޝޯގެ ޖަޖް ކެލީ ކްލާކްސަންގެ ބަދަލުގައި ކެމީލާ ކެބޭލޯ ހަމަޖައްސައިފިއެވެ.
" ދަ ވޮއިސް" އަކީ "ޑޯންޓް ގޯ ޔެޓް" ފަދަ ހިޓް ލަވަތައް ކިޔާދީފައިވާ ކެމީލާ ޖަޖްކަން ކުރާ ފުރަތަމަ ރިއަލިޓީ ޝޯއެވެ. ކެމީލާ މިކަން އިއުލާނުކޮށްފައިވަނީ އޭނާގެ ޓިކްޓޮކްގައެވެ.
މި ފަހަރުގެ ސީޒަންގައި ކެމީލާ އާއިއެކު ޝޯގެ ޖަޖުންގެ ގޮތުގައި ކުރިންވެސް ތިބި ގުވެން ސްޓެފާނީ، ޖޯން ލެޖެންޑް އަދި ބްލޭކް ޝެލްޓަންވެސް ފެންނާނެއެވެ. މީގެތެރެއިން ގުވެން އާއި ބްލޭކް ވަނީ މިދިޔަ އަހަރު ކައިވެނިވެސްކޮށްފައެވެ.
މި ޝޯގެ ޖަޖުންގެ ގްރޫޕްތައް ބަދަލުވާ އުސޫލެއް އޮވެއެވެ. މިއާއިއެކު ކެލީ އަށް އަނެއްކާވެސް އަބުރާ ޝޯ އަށް އާދެވޭނެއެވެ.
2011 ގައި ގެނެސްދޭން ފެށި "ދަ ވޮއިސް" ކޯޗްކަންކޮށްފައިވާ ފަންނާނުންގެ ތެރޭގައި ޝަކީރާ، އަޝާ، ކްރިސްޓީނާ އެގިއުލޭރާ، މައިލީ ސައިރަސް، ޖެނިފާ ހަޑްސަން އަދި ފެރެލް ވިލިއަމްސް ހިމެނެ އެވެ.