ޕީއެސްއެމްގެ މޯލްޑިވްސް މީޑިއާ އިންސްޓިޓިއުޓް އުފެދުނީ މީޑިއާގެ ދާއިރާއަށް ތަޢުލީމާއި ހުނަރު ލިބިފައިވާ މީހުން ބިނާކުރުމަށެވެ. ނިމުނު 2021ވަނަ އަހަރުވެސް އެކެޑަމިކްގެ ގިނަ ކޯސްތަކަކާއި، އަދި ޕްރޮގްރާމްތައް އެމްއެމްއައި އިންވަނީ ހިންގާފައެވެ. އެގޮތުން އެ އިންސްޓިޓިއުޓްން މިދިޔަ އަހަރު ހިންގި އެކި ކޯސްތައް ނިންމާ 42 ދަރިވަރަކުވަނީ ސެޓްފިކެޓް ހާސިލްކޮށްފައެވެ.
އެމްއެމްއައިއިން މިދިޔަ އަހަރު ހިންގި ކޯސްތަކުގެ ތެރޭގައި މޯލްޑިވްސް ކުއަލިފިކޭޝަން އޮތޯރިޓީގެ ސެޓްފިކެޓް ލެވެލް 3ގެ ކޯސް ހިމެނެއެވެ. އެއީ ސެޓްފިކެޓް ލެވެލް 1 އިން ޓެލެވިޜަން ޕްރެޒެންޓިން އެންޑް ނިއުސް ރީޑިން، ސެޓްފިކެޓް 3 އިން ޖަރނަލިޒަމް އަދި ސެޓްފިކެޓް ލެވަލް 3 އިން ލޭޑީސް ޑްރެސް މޭކިން ކޯސްއެވެ. އަދި ޕަރފޯމިން އާރޓްސްގެ ޕްރޮގްރާމެއްވެސް ކުރިއަށް ގެންގޮސްފައިވެއެވެ. އެކަޑަމިކް ކޯސްތައް 36 ދަރިވަރުން ފުރިހަމަކޮށްފައިވާއިރު، ޕަރފޯމިން އަރޓްސް ހިމެނޭހެން 42 ދަރިވަރުން އެމްއެމްއައިގެ އެކި ޕްރޮގްރާމްތައް ފުރިހަމަކޮށްފައިވެއެވެ.
މި ކޯސްތަކުގެ ތެރެއިން ސެޓްފިކެޓް 1 އިން ޓީވީ ޕްރެޒެންޓިން ކޯހުގެ 1ވަނަ ދެ ދަރިވަރަކު ހޯދާފައިވެއެވެ. އެއީ އައިމިނަތު ބަލްސަމް އާއި ހައުލާ ރަމީޒްއެވެ. ސެޓްފިކެޓް 3 އިން ޖަރނަލިޒަމް ކޯހުގެ 1ވަނަ ހޯދާފައިވަނީ އާއިޝަތު ހަމްދާއެވެ.
ސެޓްފިކެޓް 3 އިން ލޭޑީސް ޑްރެސް މޭކިން ކޯހުގެ 1ވަނަ ހޯދާފައިވަނީ އައިމިނަތު ޔަޝްފާއެވެ.
ސެޓްފިކެޓް ލެވެލްގެ ކޯސްތަކުން ވަނަވަނައަށް އައި ދަރިވަރުންނަށް ހަދާނީ ލިޔުމާއި ފިލާ ހަވާލުކޮށްދެވީ ރަސްމިއްޔާތުގެ ޝަރަފުވެރި މެހުމާނު މިނިސްޓަރ އޮފް ސްޓޭޓް ފޯރ އިކޮނޮމިކް ޑިވެލޮޕްމަންޓް ނީޒާ އިމާދުއެވެ.
ނިޒާ އިމާދު ވިދާޅުވީ، ޚަބާރާ މަޢުލޫމާތުގެ ދާއިރާއަކީ މިހާރު ކޮންމެ ޙާލަތަކަށް ބެލިއަސް އެންމެ މުހިންމު އެއް ދާއިރާކަމަށެވެ. ޤައުމުގައި ހިންގާ މުހިންމު ކަންކަން އޭގެ ތެދު މަޢުލޫމާތާއިއެކު އަވަހަށް ގެނެސްދިނުމާއި، އަދި އިޤްތިޞާދީ ގޮތުން ޤައުމު ވަރުގަދަ ކުރުމުގައިވެސް ނޫސްވެރިކަމާއި މީޑިއާ މުހިންމު ދައުރެއް އަދާކުރާކަމަށެވެ. ސްޓޭޓް މިނިސްޓަރވަނީ މި ދާއިރާ އިތުރަށް ހަރުދަނާކުރުމަށް، ތަމްރީނާއި ތަޖުރިބާގެ ފުރުޞަތުތައް އިތުރުކޮށްދިނުމަށް ސަރުކާރުންވެސް މަސައްކަތް ކުރައްވަމުންދާކަން ފާހަގަކުރައްވާފައެވެ.
"ސްކިލް ޝޯޓޭޖް ހުރި ދާއިރާތަކަށް ޢަމާޒުކޮށް އިކޮނޮމިކް މިނިސްޓްރީިން ފަށާފައިވާ އިންކަމް ސަޕޯޓް ޕްރޮޖެކްޓްގެ އެޕްރެންޓިސްޝިޕް ޕްރޮގްރާމްގައިވެސް މީޑިއާ ދާއިރާގެ ކޯސްތައް ވަނީ ހިމަނާފައި. ޕީއެސްއެމްއާއި ގުޅިގެން 16 ފަރާތެއް ޖަރނަލިޒަމް ދާއިރާއިން ހިލޭ ތަމްރީން ވުމުގެ ފުރުޞަތު ވަނީ ހުޅުވާލާފަ. މިއީ ތަމްރީނާއި ތަޖުރިބާ ހުރި ޤާބިލު މީހުން އުފެއްދުމަށް ކުރާ މަސައްކަތެއް." ނިޒާ އިމާދު ވިދާޅުވިއެވެ.
ސެޓްފިކެޓް ހަވާލުކުރުމަށް ބޭއްވި ރަސއްމިއްޔާތުގައިވަނީ ލޭޑީސް ޑްރެސް މޭކިން ކޯހުގެ ދަރިވަރުންގެ މަސައްކަތްތައް ދައްކާލާފައެވެ. އަދި ޕަރފޯމިން އަރޓްސްގެ ދާއިރާއިން ތަމްރީންވި ދަރިވަރުންގެ ހުށައެޅުމެއްވެސްވަނީ ހުށައަޅާފައެވެ.
އެމްއެމްއައިއިން މިހާރު ކުރަމުންދާ މަސައްކަތްތަކުގެ ތެރޭގައި، އެކިއެކި ދާއިރާއިން އިތުރު ކޯސްތަކާއި ތަމްރީން ޕްރޮގްރާމްތައް އިތުރުކުރުން ހިމެނެއެވެ. އަދި ސްކޫލްތަކުގައި މީޑިއާ ކްލަބްތައް ޤާއިމުކުރުމުގައިވެސް އެހީތެރިކަން ފޯރުކޮށްދިނުމަށްވަނީ ނިންމާފައެވެ.
މީގެއިތުރުން ސްކޫލް އުމުރުގެ ކުރިންނަށް އެކިއެކި ތަމްރީންތައް ދިނުމާއި، މި ދާއިރާއަށް މީހުންގެ ޝައުގުވެރިކަން އިތުރުކުރުމަށްވެސް ގިނަ މަސައްކަތްތަކެއް އަންނަނީ ކުރަމުންނެވެ.