ބޮކްސް އޮފީހުގެ ރެކޯޑުތައް މުގުރަމުން އަންނަ ޓޮޕް ކްރޫޒްގެ "ޓޮޕް ގަން:މެވެރިކް" ގެ ކޮޕީރައިޓްގެ މައްސަލައެއް ފެންމަތިވެއްޖެއެވެ.
1986 ވަނަ އަހަރު ދެއްކި އޮރިޖިނަލް ފިލްމު "ޓޮޕް ގަން" އުފައްދާފައިވަނީ ލިޔުންތެރިޔާ ހޫދު 1983 ވަނަ އަހަރު ނޫހެއްގައި ޖެހި އާޓިކަލެއް އަސްލަކަށް ބަލައިގެންނެވެ. ކޮޕީ ރައިޓްގެ މައްސަލަ ޖައްސާފައިވަނީ ލިޔުންތެރިޔާ އާއިލާއިންނެވެ.
އެ އާއިލާއިން ތުހުމަތުކުރާ ގޮތުގައި އެމީހުން ރައިޓްސް ދިނީ ހަމައެކަނި "ޓޮޕް ގަން" އުފައްދަން ކަމަށާއި ސީކުއަލެއް އުފައްދާނަމަ އަލުން ރައިޓްސް އަށް އެދެން ޖެހޭނެކަމަށެވެ. ލިޔުންތެރިޔާގެ އާއިލާއިން ދައުވާކުރަން ނިންމާފައިވަނީ "ޓޮޕް ގަން:މެވެރިކް" ގެނެސްދިން ޕެރާމައުންޓް ސްޓޫޑިއޯގެ މައްޗަށެވެ. އަދި މި މައްސަލަ ކޯޓަށް ހުށަހަޅާނެކަމަށްވެސް ލިޔުންތެރިޔާގެ އާއިލާއިން ބުނެއެވެ. ހުއްދަ ނުހޯދާ ފިލްމު ހެދުމުން ލިބުނު ގެއްލުމުގެ ބަދަލުގައި މި ފިލްމުން ލިބޭ ފައިދާ އާއި އެނޫންވެސް ކަންކަން ބޭނުންވާކަމަށް ހޫދުގެ އާއިލާއިން ބުނެއެވެ.
ޕައިލެޓެއްގެ ވާހަކަ ކިޔައިދޭ "ޓޮޕް ގަން" އަކީ ޓޮމް ކްރޫޒް އެންމެ ފުރަތަމަ މަޝްހޫރުކަން ހޯދި ފިލްމެވެ. އެ ފިލްމާ އެކު ކްރޫޒް ވަނީ ގިނަ ބައެއްގެ ތެރޭގައި މަގުބޫލުކަން ހޯދައިފަ އެވެ. "ޓޮޕް ގަން" ފުރަތަމަ ރިލީޒްކޮށްފައިވަނީ 1986 ވަނަ އަހަރު އެވެ.
"ޓޮޕް ގަން: މެވެރިކް" އަކީ 1986 ގައި ގެނެސްދިން "ޓޮޕް ގަން" ގެ ދެވަނަ ބައެވެ. މި ފިލްމު ޑައިރެކްޓްކޮށްފައި ވަނީ ޖޯސެފް ކޮޒިންސްކީ އެވެ. މި އެކްޝަން ޑްރާމާ ކާސްޓުންގެ ތެރޭގައި ޖެނިފާ ކޮނެލީ، މިލެޒް ޓެލާ، ގްލެން ޕަވަލް ވަލް ކިލްމާ، އެޑް ހެރިސް، ޖޮމް ހެމް އަދި ލުވިސް ޕުލްމަން ހިމެނެއެވެ. މި ފިލްމަކީ 152 މިލިއަން ޑޮލަރުގެ ބަޖެޓަކުން އުފައްދާފައިވާ ފިލްމެކެވެ.
މި ފިލްމަކީ މިހާތަނަށް ޓޮޕް ކްރޫޒްގެ ފިލްމަކަށް އެންމެ ބޮޑު އޯޕަނިންގެ އެއް ލިބުނު ފިލްމެވެ.