6 ވަނަ ސީޒަނަށްފަހު 2019 ވަނަ އަހަރު ނިންމާލާފައިވާ ބޮލީވުޑްގެ މަޝްހޫރު ޑައިރެކްޓަރު، ޕްރޮޑިއުސަރު ކަރަން ޖޯހަރު ހޯސްޓު ކުރާ "ކޮފީ ވިތު ކަރަން" 7 ވަނަ ސީޒަން އަންނަ ޖުލައި މަހުގެ 7 ވަނަ ދުވަހު ދައްކަން ނިންމައިފިއެވެ.
މި ސީޒަން ފަށާ ވާހަކަ މިދިޔަ އޭޕްރީލް މަހު އިޢުލާނުކޮށްފައިވާއިރު ސީޒަން ޕްރިމިއަރ ކުރާނީ މި މަހު ކަމަށްވެސް އޭރު ވަނީ އަޑުއަރާފައެވެ.
އައު ސީޒަން ޕްރިމިއާ ކުރާ ތާރީޚު އިޢުލާނުކޮށްފައިވަނީ ޝޯ އައު ޓީޒާއަކާއެކުގައެވެ. މި ވީޑީއޯ ކޮޅުގައި ދައްކަނީ ރަންވީރު ސިންގާއި، ރަންބީރު ކަޕޫރު، ޝާހުރުކްޚާން، ސައިފް ޢަލީޚާން، ކަރީނާ ކަޕޫރުގެ އިތުރުން ކުރިން މި ޝޯގައި ބައިވެރިވެފައިވާ ގިނަ ތަރިންވެސް މި ވީޑިއޯގައި ފެނެއެވެ. "ކޮފީ ވިތު ކަރަން" ގެ 7 ވަނަ ބައި ދައްކާނީ ޑިޒްނީ ޕްލަސް ހޮޓް ސްޓާއިންނެވެ.
އައު ސީޒަންގައި ބޮލީވުޑް އޭރާއި މިހާރުގެ މަޝްހޫރު ބައެއް ތަރިން ފެނިގެންދާނެއެވެ. އޭގެ ތެރޭގައި އަކްޝޭ ކުމާރު، ނީތޫ ކަޕޫރު، ވަރުން ދަވަން، ސިދާތް މަލޯތްރާ، ކިއަރާ އަދްވާނީ އަނިލް ކަޕޫރާއި އިތުރު ތަރިންވެސް ފެންނާނެއެވެ. މީގެއިތުރުން "މިޝަން މަޖްނޫ" އިން ހިންދީ ސިނަމާއަށް ތައާރަފްވާ ދެކުނު ތަރި ރަޝްމިކާ މަންދަންވެސް އާ ސީޒަންގައި ފުރަތަމަ ފަހަރަށް ފެންނާއެވެ. ދާދިފަހުން ކައިވެނިކުރި ރަންބީރު ކަޕޫރާއި އާލިއާ ބަޓްވެސް އާ ސީޒަނުން ފެންނާނެއެވެ. މިއީ ކައިވެންޏަށްފަހު މި ދެ ތަރިން އެކުގައި ޝޯވ އަކުން ފެންނަ ފުރަތަމަ ފަހަރަށްވެސް ވާނެއެވެ.
2004 ވަނަ އަހަރުގެ ނޮވެމްބަރުމަހު ފެށި ކަރަންގެ ޓޯކް ޝޯ "ކޮފީ ވިތު ކަރަން" ގެ 6 ސީޒަނާއިއެކު މުޅިއެކު 12 އެޕިސޯޑު މިހާތަނަށް ވަނީ ދައްކާފައެވެ. މިއީ އިންޑިއާގައި ދެވަނަ އަށް އެންމެ ދިގުކޮށް ގެނެސްދޭ ޓޯކް ޝޯއެވެ. ޝޯ އެންމެފަހުން ނިންމާލާފައިވަނީ 2019 ވަނަ އަހަރުގެ މާޗްމަހުއެވެ.