އަންނަ ދިރާސީ އައު އަހަރުގެ ކިޔެވުން ފެށޭއިރު ރާއްޖޭގައި މަސައްކަތްކުރާ ބިދޭސީ ޓީޗަރުންގެ ޢަދަދު ވަރަށް ބޮޑަށް މަދުވާނެކަމަށް އެޑިއުކޭޝަން މިނިސްޓްރީން ވިދާޅުވެއްޖެއެވެ.
އެޑިއުކޭޝަން މިނިސްޓްރީން ވިދާޅުވީ މިބަދަލު ގުޅިފައިވަނީ ސަރުކާރުން މިދާއިރާގެ މުސާރައަށް ގެނައި ހެޔޮބަދަލާއިކަމަށެވެ.
ތަޢުލީމީ ދާއިރާގައި ޙަރަކާތްތެރިވާ މުދައްރިސުންނަކީ މުޅިންވެސް ދިވެހިންނަށް ހެދުމަކީ އެޑިއުކޭޝަން މިނިސްޓްރީގެ މުހިއްމު އަމާޒެކެވެ. އަމާޒަށް ވާސިލުނުވެވި މިދާއިރާއަށް ޝައުގުވެރިވާ ފަރާތްތައް މަދުވެ ޚިދުމަތުގައި ދެމިތިބި މީހުންވެސް ދާއިރާ ދޫކޮށް ދާންފެށުމުގެ ކަންބޮޑުވުން އިތުރުވަމުން އަންނަތާ އަހަރުތަކެއްވެއްޖެއެވެ. އެހެންކަމުން ޚިދުމަތަށް ބޭނުންވާ މުދައްރިސުން ރާއްޖެއިން ބޭރުން ގެނައުމަކީ ޢާއްމުކަމަކަށްވަނީ ވެފައެވެ. މިހުރިހާ ކަމެއް ގުޅިފައިވަނީ ކުރާ މަސައްކަތާއި އަޅާބަލާއިރު ލިބޭ ޢާމްދަނީ ކުޑަވުންކަމުގައި ގިނަ ބަޔަކު ބުނަމުން ދިޔަދިޔުން މިހާރު ވަނީ ހުއްޓުމަކަށް އައިސްފައެވެ. ދާއިރާގެ ހުރި ކަންބޮޑުވުންތަކާއެކު ސަރުކާރުންވަނީ ތަޢުލީމީ ދާއިރާގައި މަސައްކަތްކުރާ ފަރާތްތަކުގެ މުސާރަތައް ބޮޑުކޮށްފައެވެ. މިއާއެކު ހެޔޮ ބަދަލުތަކެއް މިހާރުވެސް އަންނަން ފަށާފައިވާކަމަށް އެޑިއުކޭޝަން މިނިސްޓްރީއިން ވިދާޅުވެއެވެ.
ޕީއެސްއެމްގެ ރާއްޖެމިއަދު ޕްރޮގްރަމްގައި ވާހަކަދައްކަވަމުން އެޑިއުކޭޝަން މިނިސްޓްރީގެ ޕަމަނަންޓް ސެކެޓްރީ އަޙްމަދު ޢަލީ ވިދާޅުވީ މިއަހަރު ޙާސިލުވާނެ އެންމެ ބޮޑު އެއްކަމަކީ ރާއްޖެއަށް ބޭރުން ގެންނަ ބިދޭސީ ޓީޗަރުންގެ ޢަދަދު މަދުކުރެވުންކަމަށެވެ.
"އޭޖެންޓުން މެދުވެރިކޮށް ސްކޫލްތަކުން އެދުނު މަޤާމުތަކަށް ޓީޗަރުން ހޯދުމުގެ މަސައްކަތް އެބަކުރިއަށްދޭ. އޮފަރ ލެޓާރ ދިނުމުގެ މަސައްކަތް މިހާރުކުރިއަށްދަނީ. ފާހަގަކުރެވޭކަމަކީ ރާއްޖެއިން ބޭރުން ގެންނަ ޓީޗަރުން ބޮޑުތަނުން މަދުވެއްޖެ." ޕަރމަނަންޓް ސެކެޓްރީ އަޙްމަދު ޢަލީ ވިދާޅުވިއެވެ.
އަޙްމަދު ޢަލީ ވިދާޅުވީ މިދިޔަ ޖެނުއަރީ މަހުން ފެށިގެން ސްކޫލްތަކަށް ބޭނުންވާ ޓީޗަރުންނާއި ވަޞީލަތްތައް ދެނެގަތުމަށް ކުރިއަށްގެންދިޔަ މަސައްކަތްތައް ނިމިފައިވާކަމަށެވެ. އެގޮތުން ރާއްޖޭގެ އެކި ސްކޫލްތަކުގައި ވަގުތީ ރިލީފް ޓީޗަރުންގެ ގޮތުގައި މިދިޔަ އަހަރު 600 އަށްވުރެ ގިނަ ދިވެހި މުދައްރިސުން މަސައްކަތްކޮށްފައިވާކަމަށް އަޙްމަދު ޢަލީ ވިދާޅުވިއެވެ. މުސާރައަށް ގެނައި ބަދަލާއެކު މީގެތެރެއިން މުދައްރިސުން ދާއިމީވުމަށް އެދޭއިރު މުސާރައިގެ ދަތިކަމާހެދި ދާއިރާ ދޫކޮށްދިޔަ ތަޖުރިބާ ޓީޗަރުން އަލުން ދާއިރާއަށް ގުޅެން ބޭނުންވާތީ އެފަރާތްތަކަށް އެފުރުސަތުވެސް ދޭން ނިންމާފައިވާކަމަށް އޭނާ ވިދާޅުވިއެވެ.
މުސާރައިގެ އޮނިގަނޑަށް ގެނެވުނު ބަދަލާއެކު ޑިޕްލޮމާ ލެވެލްގެ ޓީޗަރަކަށް ގާތްގަނޑަކަށް 13200އަށްވުރެ ގިނަ ރުފިޔާ ލިބެއެވެ. ޑިގްރީ ލެވެލްގެ ޓީޗަރަކަށް 19400އަށްވުރެ ގިނަ ރުފިޔާ ލިބޭއިރު މާސްޓަރސް ލެވެލް ޙާސިލްކޮށްފައިވާ ޓީޗަރުންނަށް 20800އަށްވުރެ ގިނަ ރުފިޔާ ލިބޭގޮތަށް ވަނީ މުސާރައިގެ އޮނިގަނޑަށް ބަދަލު ގެނެސްފައެވެ.