އާއިލީ މައްސަލަތަކެއްގެ މައްޗަށް އުފައްދާފައިވާ ފެމިލީ ޑްރާމާ ފިލްމު "ޖުގް ޖުގް ޖިޔޯ" ސިނަމާތަކުގައި އަޅުވާފައިވަނީ މިދިޔަ ހުކުރު ދުވަހުއެވެ.
ކުރީގެ ބޮލީވުޑް އެކްޓަރު ރިޝީ ކަޕޫރުގެ ހުވަފަތް އަންހެނުން ނީތޫ ކަޕޫރު، އަނިލް ކަޕޫރު، ވަރުން ދަވަން އަދި ކިއަރާ އަދުވާނީ ލީޑްރޯލުން ފެންނަ މި ފިލްމަށް ވަނީ ރަނގަޅު ކާމިޔާބެއް ލިބިފައެވެ. ފިލްމު އެޅުވިތާ ހަފްތާއެއްގެ ތެރޭގައި 36 ކްރޯޑް ރުޕީސްއަށްވުރެ ބޮޑު އާމްދަނީއެއް ވަނީ ލިބިފައެވެ. މިއާއިއެކު މި ފިލްމަށް ކްރިޓިކުންވެސް ވަނީ ތަޢުރީފްކޮށްފައެވެ.
މި ފިލްމުން މަޝްހޫރު ޓީވީ ހޯސްޓު މަނީޝް ޕޯލްއާއި، ދާދި ފަހުން ކަލާޒް އިން ނިންމާލި ސްޓަންޓް ޝޯ "ހަތުރޯން ކޭ ކިލާޅީ" ސީޒަން 11 ގައި ވާދަކުރި ވަރުން ސޫދާއި، ޕްރަޖަކްތާ ކޯލީވެސް ފެނެއެވެ.
"ޖުގް ޖުގް ޖިޔޯ" އަކީ 2019 ވަނަ އަހަރު ގެނެސްދިން އެންމެ ކާމިޔާބު އެއް ފިލްމު ކަމަށްވާ "ގުޑް ނިއުސް" ގެނެސްދިން ރާޖް މެހެތާ ލިޔެ ޑައިރެކްޓްކޮށްފައިވާ ފިލްމެކެވެ. މި ފިލްމާއި ބެހޭގޮތުން މީގެކުރިން ރާޖް ބުނެފައިވާ ގޮތުގައި ފިލްމު ނުހިނގަފާނެތީ އޭނާ ވަރަށް ބިރުގަނެއެވެ. މިއީ "ގުޑް ނިއުސް" އެހާ ކާމިޔާބު ވުމުން މި ފިލްމަށް މީހުން އުންމީދުކުރާވަރު ބޮޑުވާނެކަމަށް ރާޖް އޭރު ވަނީ ބުނެފައެވެ.
މި ފިލްމުގެ ލަވައެއްކަމަށްވާ "ނާޗް ޕަންޖާބަން" އަކީ ޕާކިސްތާނުގެ ލަވައެއްގެ ކޮޕީއެއް ކަމަށް ބުނެ ކަރަން ޖޯހަރު ޕްރޮޑިއުސްކޮށްފައިވާ މި ފިލްމާއި ދެކޮޅަށް މީގެކުރިން ވަނީ މައްސަލައެއްވެސް ފެންމަތިކޮށްފިއެވެ.
ޕާކިސްތާނުގެ ލަވަކިޔުންތެރިއެއް ކަމަށްވާ، އަބްރާރް އަލް ހައްގު ބުނެފައިވާ ގޮތުގައި ކަރަންގެ ފިލްމުގައިވާ ލަވައަކީ އޭނާ ކިޔާފައިވާ ލަވައެއްގެ ޓިއުނެވެ. އޭނާގެ ހުއްދަ ނެތި އެ ލަވަ ބޭނުންކުރި ކަމަށް ބުނެ އެކަން ކުށްވެރިކޮށް ގިނަ ބަޔަކު ވަނީ ކަރަންއަށް ފާޑުކިޔާފައެވެ.