ބޮލީވުޑްގައި ގިނަ ދުވަސްވީ އެކްޓަރު އަނޫޕަމް ކޭރުގެ 526 ވަނަ ފިލްމު "ކާގަޒް 2" ގެ މަސައްކަތް ފަށައިފިއެވެ.
"ސާރުނާޝް"، "އަ ވެނިސްޑޭ" އަދި "ސްޕެޝަލް 26" ފަދަ ފިލްމުތަކުން ފެނުނު ކުޅަދާނަ އެކްޓަރު އަނޫޕަމް މިހާތަނަށް ވަނީ 525 ފިލްމުގައި މަސައްކަތްކޮށްފައެވެ.
"ކާގަޒް 2" ގެ މަސައްކަތް ފެށިކަން އަނޫޕަމް ވަނީ އޭނާގެ އިންސްޓަގްރާމްގައި ހާމަކޮށްފައެވެ. އަދި އެނާގެ މަސައްކަތަށް އަބަދުވެސް ފޭނުންގެ ސަޕޯޓް ބޭނުންވާކަމަށް އަނޫޕަމް ބުންޏެވެ.
މިހާރު އުމުރުން 67 އަހަރުގެ އަނޫޕަމްގެ މި ފިލްމު ޑައިރެކްޓުކުރަނީ ކުރީގެ ޑައިރެކްޓަރެއް ކަމަށްވާ ސަތީޝް ކޯޝިކް އެވެ. "ކާގަޒް 2" އަކީ ސަތީޝް ރައިޓްސް ގަނެފައިވާ 2015 ވަނަ އަހަރު ދެއްކި މަލަޔާލަމް ފިލްމު "ނިރުނަޔާކަމް" ގެ ހިންދީ ރީމޭކެކެވެ. "ކާގަޒް" ގެ ފުރަތަމަ ބައިވެސް ޑައިރެކްޓުކޮށްފައިވަނީ ސަތީޝް އެވެ. މި ފިލްމު ސިނަމާތަކުގައި އެޅުވީ މިދިޔަ އަހަރުއެވެ.
އަނޫޕަމް އެންމެ ފަހުން ނިންމާލާފައިވަނީ "އޫންޗާއީ" ގެ މަސައްކަތެވެ. މިފިލްމުގައި ލެޖެންޑްރީ އެކްޓަރުން ކަމުގައިވާ އަމީތާބް ބައްޗަން، ބޯމަން އިރާނީ އަދި ނީނާ ގުޕްތާވެސް ފެންނާނެއެވެ. މަހީމާ ޗައުދަރީއާއިއެކު އަނޫޕަމް ފެންނަ "ދަ ސިގްނޭޗާ" އަކީ އަނޫޕަމްގެ 525 ވަނަ ފިލްމެވެ. މީގެ ފުރަތަމަ ލުކްވެސް ދާދިފަހުން ވަނީ ބެލުންތެރިންނަށް ދޫކޮށްލާފައެވެ.