އީރާނާއި ސަޢޫދީ ޢަރަބިއްޔާގެ ގުޅުން އަލުން ޤާއިމު ކުރުމަކީ ސަޢޫދީ ޢަރަބިއްޔާގެ ޒިންމާއެއް ކަމަށް އީރާނުގެ ރައީސް ޙަސަން ރޫޙާނީ ވިދާޅުވެއްޖެއެވެ. ރޫޙާނީ މިހެން ވިދާޅުވީ ޝީއީންގެ ދީނީ ޢިލްމުވެރިއެއްގެ މައްޗަށް ސަޢޫދީ ޢަރަބިއްޔާއިން މަރުގެ ޙުކުމް ތަންފީޒުކުރުމާއި ގުޅިގެން އީރާނުގައި ބޭއްވި މުޒާހަރާތަކަށް ފަހު، މެދުކެނޑިފައިވާ ސިޔާސީ ގުޅުންތަކާއި ބެހޭ ގޮތުން ފްރާންސް 24 ޗެނަލަށް ދެއްވި ބަސްދީގަތުމެއްގައެވެ. މި ބަސްދީގަތުމުގައި ރޫޙާނީ ވަނީ އިރާނުގައި މުޒާހަރާ ކުރި ފަރާތްތަކުން އެޤައުމުގައި ހުންނަ ސަޢޫދީ ޢަރަބިއްޔާގެ އެމްބަސީ އަށް ވަދެ ގެއްލުންދިން މައްސަލަ ކުށްވެރިކުރައްވާފައެވެ. އަދި، އެ ޙާދިސާއަކީ އީރާނުގެ ސަރުކާރުން ބަލައިގަންނަ ޢަމަލެއް ނޫން ކަމަށާއި މި މައްސަލައިގެ ތަޙުޤީޤު މިހާރު ކުރިއަށްދާ ކަމަށްވެސް އޭނާ ވަނީ ފާހަގަކުރައްވާފައެވެ. ސަޢޫދީ އެމްބަސީ އަށް އީރާނުގެ ބައެއް ރައްޔިތުން އެތެރެވި މައްސަލައިގައި ދެޤައުމުގެ ސިޔާސީ ގުޅުން ކަނޑާލާފައިވާ އިރު، ޢަރަބި ބައެއް ޤައުމުތަކުންވެސް ވަނީ ހަމަ މި މައްސަލައިގައި އީރާނާ ސިޔާސީ ގުޅުން ކަނޑާލާފައެވެ.