ކީރިތި ޤުރުއާނާއި ބެހޭ ޤައުމީ މަރުކަޒު ސަލްމާން މިސްކިތައް ބަދަލުކޮށްފިއެވެ.
އެމަރުކަޒު ބަދަލުކޮށްފައިވަނީ ސަލްމާން މިސްކިތުގެ 3ވަނަ ފަންގިފިލާއަށެވެ.
ޕީއެސްއެމްނިއުސްއަށް މަޢުލޫމާތު ދެއްވަމުން ކީރިތި ޤުރުއާނާއި ބެހޭ ޤައުމީ މަރުކަޒުން ވިދާޅުވީ މިހަފްތާގެ އާދިއްތަ ދުވަހުން ފެށިގެން ސަލްމާން މިސްކިތުގެ 3ވަނަ ފަންގިފިލާގައި އެމަރުކަޒުން ހިންގާ ކޯސްތަކުގެ ކިޔެވުން ކުރިއަށްގެންދަން ފަށާފައިވާކަމަށެވެ.
ސަލްމާން މިސްކިތަށް ކުލާސްތައް ބަދަލުކުރުމުގެ ސަބަބުން ކީރިތި ޤުރުއާނާބެހޭ މަރުކަޒުގައި ކިޔަވާ ދަރިވަރުން ވަރަށް ބޮޑަށް ހިތްހަމަޖެހިފައިވާކަމަށާ، ސަބަބަކީ އައު ޢިމާރާތަށް ބަދަލުކުރުމާއެކު ވަރަށް ބޮޑު ޖާގައެއް ލިބި އިތުރު ވަޞީލަތްތައް ލިބުންކަމަށްވެސް އެމަރުކަޒުން ވިދާޅުވިއެވެ. ކުރިން ކިޔަވައިދެމުންދިޔަ ކީރިތި ޤުރުއާނާ ބެހޭ މަރުކަޒުގެ ޢިމާރާތަކީ ވަރަށް ބޮޑަށް ބައުވެ ހަލާކުވެފައިވާ ދުވަސްވީ ޢިމާރާތެކެވެ.
ކީރިތި ޤުރުއާނާއި ބެހޭ ޤައުމީ މަރުކަޒުގައި މިހާރު ކުރިއަށްދަނީ ޤިރާއަތު ސެޓްފިކެޓް ލެވެލް 1 އިން 4 ގެ ކޯސްތަކާއި ޤުރުއާން މުދައްރިސްކަމުގެ ޑިޕްލޮމާއާއި ޑިގްރީ ކޯހާއި ޤުރުއާން ހިތުދަސްކުރުމުގެ ކުލާސްތަކެވެ. މިވަގުތުވެސް އެމަރުކަޒުގެ ދަށުން ހަމައެކަނި މާލެ ސަރަޙައްދުގައި 1200 އަށްވުރެ ގިނަ ދަރިވަރުން އަންނަނީ ކިޔަވަމުންނެވެ. އަތޮޅުތެރޭގައި ހުރި އެމަރުކަޒުގެ އެކި ގޮފިތަކުގައިވެސް އަންނީ ކިޔަވައިދެމުންނެވެ.
ކީރިތި ޤުރުއާނާ ބެހޭ ޤައުމީ މަރުކަޒުގެ ކޯސްތަކާއި އެމަރުކަޒުގެ މަސައްކަތްތައް ކުރުމަށްޓަކައި ސަލްމާން މިސްކިތުގެ 3 ވަނަ ފަންގިފިލާގައި އެ މަރުކަޒުގެ ކޯސްތަކާއި އޮފީހުގެ މަސައްކަތްތައް ކުރުމަށް ވަނީ ދޫކޮށްފައެވެ. އަދި ސެމިނަރ ރޫމަކާއި، ކޮންފަރެންސްތައް ބޭއްވުމަށް ޚާއްސަ ބޮޑު އޮޑިޓޯރިއަމްވެސް އެ މަރުކަޒަށް ވަނީ ދޫކޮށްފައެވެ.