ލ. ގަން ރީޖަނަލް ހޮސްޕިޓަލް ޓާޝަރީ ފެންވަރަށް ތަރައްގީ ކުރުމަށާއި ގދ. ގައްދޫގައި އައު ހޮސްޕިޓަލެއް އެޅުމަށް ސްޕެއިންގެ
ކުންފުންޏަކާއެކު އެއްބަސްވުމަކަށް އާދެވިފައިވާ ކަމަށް ހެލްތު މިނިސްޓްރީން ހާމަކުރައްވައިފިއެވެ.
ހެލްތު މިނިސްޓްރީން ކުރެއްވި ޓުވީޓެއްގައިވަނީ ލ. ގަން ރީޖަނަލް ހޮސްޕިޓަލް ޓާޝަރީ ފެންވަރަށް ތަރައްގީ ކުރުމަށާއި ގދ. ގައްދޫގައި އައު ހޮސްޕިޓަލް އަޅަން ސްޕެއިންގެ ކުންފުންޏެއް ކަމަށްވާ އެޗް.އޯ.އެމް.ޓީ އެސްޕާނާ އާއެކު އެއްބަސްވުމަކަށް އާދެވިފައިވާ ކަމަށެވެ. އަދި މިކަމުގެ ސަބަބުން އަތޮޅުތެރޭގެ ޞިއްޙީ ޚިދުމަތަށް އިތުރު ކުރިއެރުން ލިބިގެންދާނެ ކަމަށެވެ.
އަތޮޅުތަކުގެ އަލަށް ހޮސްޕިޓަލް ތަރައްޤީކުރުމަށް ސަރުކާރުން ނިންމާފައިވާ 12ރަށުގެ ތެރޭގައި ގދ. ގައްދޫވެސް ހިމެނެއެވެ. މީގެ އިތުރުން ދެން ހިމެނެނީ ހއ.އިހަވަންދޫ، ހއ.ހޯރަފުށި، ހދ.ހަނިމާދޫ، ށ.މިލަންދޫ، ނ.ވެލިދޫ، ނ.ކެނދިކުޅުދޫ، ބ.ތުޅާދޫ، ޅ.ހިންނަވަރު، ފ.ނިލަންދޫ، ތ.ވިލިފުށި، އދ.މާމިގިލީއެވެ. މި ހޮސްޕިޓަލްތައް ފަރުމާކުރުމުގެ މަސައްކަތް މުޅިން ނިމިފައިވާކަމަށާ، މިކަމަށް ހިންގާނެކަމަށް ލަފާކުރާ ޚަރަދުތަކާ ގުޅޭ ދިރާސާތައްވެސް ނިމިފައިވާކަމަށް ހެލްތު މިނިސްޓްރީން މީގެ ކުރިންވަނީ ހާމަކޮށްފައެވެ.
އަތޮޅުތަކުގެ ސިއްހީ ޚިދުމަތް ތަރައްޤީކުރުމަށް ކުރިއަށްގެންދާ އެންމެ މުހިންމު މަސައްކަތަކީ ރާއްޖޭގެ 5 ސަރަޙައްދެއްގެ ހޮސްޕިޓަލް ޓަރޝަރީ ފެންވަރަށް ތަރައްޤީކުރުމަށް ކުރިއަށްގެންދާ މަސައްކަތެކެވެ. މިމަސައްކަތަކީ ރައީސް އިބްރާހީމް މުޙައްމަދު ޞާލިޙުގެ ރިޔާސީ ވަޢުދެކެވެ. ޓާޝަރީ ފެންވަރަށް ތަރައްޤީކުރުމަށް ސަރުކާރުން ނިންމަވާފައިވާ 5 ހޮސްޕިޓަލަކީ ހދ.ކުޅުދުއްފުށީ ރީޖަނަލް ހޮސްޕިޓަލާއި، ރ.އުނގޫފާރު ރީޖަނަލް ހޮސްޕިޓަލާއި ގދ.ތިނަދޫ ޑރ.ޢަބްދުއްސަމަދު މެމޯރިއަލް ހޮސްޕިޓަލާއި ލ.ގަމު ރީޖަނަލް ހޮސްޕިޓަލެވެ.
މީގެތެރިން ބައެއް މަޝްރޫޢުތަކުގެ ޢަމަލީ މަސައްކަތްތައްވެސް ވަނީ ފަށާފައެވެ. ޓަރޝަރީ ހޮސްޕިޓަލްތައް ތަރައްޤީވެގެން އަންނައިރު، މިއިން ބައެއް ހޮސްޕިޓަލްތައް ބޮޑެތި ބަލިތަކަށް ފަރުވާދޭ ޚާއްސަ ހޮސްޕިޓަލްތަކަށް ބަދަލުކުރާނެ ކަމަށް ސަރުކާރުން ވިދާޅުވެއެވެ.
އެގޮތުން ލ. ގަން ރީޖަނަލް ހޮސްޕިޓަލް ޓާޝަރީ ފެންވަރަށް ތަރައްގީ ކުރެވިގެންދާއިރު 100 އެނދުގެ މިހޮސްޕިޓަލް ޚާއްސަކުރުމަށް ނިންމާފައިވަނީ ކެންސަރަށް ފަރުވާދޭ ހޮސްޕިޓަލެއްގެ ގޮތުގައެވެ.