މޯލްޑިވްސް ނަރސަސް އެސޯސިއޭޝަންގެ ހުށަހަޅާފައިވާގޮތަށް، ރާއްޖޭގެ ހުރިހާ ރަށެއްގެ ނަރުހުންގެ ޔުނިފޯމް އެއް ޑިޒައިނަކަށް ބަދަލުކުރުމުގެ މަސައްކަތް ފަށައިފިއެވެ.
ހެލްތު މިނިސްޓްރީން ވިދާޅުވީ ޔުނިފޯމް އެއް ޑިޒައިނަކަށް ބަދަލުކުރުމުގެ މަސައްކަތަކީ، ރާއްޖޭގެ ނަރުހުންގެ ޖަމިއްޔާގެ އިސްނެގުމަށް، މިއަހަރުގެ ނަރުހުންގެ ދުވަހާއި ގުޅުވައިގެން މިނިސްޓްރީއަށް ހުށައެޅި ހުށައެޅުމެއްކަމަށެވެ. އަދި އެކަމާއި ގުޅިގެން ދޭންޖެހޭ ހުރިހާ ހުއްދައެއް ދީފައިވާކަމަށްވެސް ހެލްތު މިނިސްޓްރީން ވިދާޅުވެއެވެ.
މިހާތަނަށްވެސް އަތޮޅުތަކުގެ ހުރިހާ ސިއްޙީ މަރުކަޒުތަކާއި ހޮސްޕިޓަލްތަކުގައި ބޭނުން ކުރަމުން އައިސްފައިވަނީ އެންމެ ކުރިންސުރެވެސް ބޭނުންކުރަމުން އައި ނަރުހުންގެ ހުދު ޔުނިފޯމެވެ. ނަރސަސް އެސޯސިއޭޝަންގެ މި ހުށައެޅުމަކީ، ނަރުހުންގެ ޔުނިފޯމް ކޯޑް އެއްގޮތްކޮށް، ނަރުހުންގެ މަސައްކަތާއި އެކަށޭނަ ގެންގުޅެން ފަސޭހަ ޔުނިފޯމެއް ހޯދައިދިނުމެވެ.
ހެލްތް މިނިސްޓްރީން ވިދާޅުވީ ނަރުހުންގެ ޔުނިފޯމް އާ ކުރުމުގެ މަސައްކަތް ކުރަނީ، ނަރުހުންނަށް ދޫކުރާ ޔުނިފޯމް އެލަވަންސްގެ ތެރެއިންކަމަށެވެ.
ޔުނީފޯމް ކޯޑް ބަދަލުކުރުމުގެ މަސައްކަތުގެ ތެރެއިން މިހާރު ވަނީ ބައެއް ހެލްތު ސެންޓަރުތަކާއި ހޮސްޕިޓަލްތަކުގައި މަސައްކަތްކުރާ ނަރުހުންނާ އަދި އެޓެންޑެންޓުންވެސް އާ ޔުނީފޯމް ކޯޑަށް ބަދަލުކޮށް ބޭނުންކުރަން ފަށާފައެވެ. ނަރުހުންގެ އާ ޔުނިފޯމް ބަދަލުކޮށްފައިވަނީ ފެހި ކުލައަށެވެ. އަދި އެޓެންޑުންގެ ޔުނީފޯމް ވަނީ ނޫ ކުލައަށް ބަދަލުކޮށްފައެވެ.
މިނިސްޓްރީއިން ވިދާޅުވީ ކުރިން މަސައްކަތް ކުރީ މި މަސް ނިމުމުގެ ކުރިން ހުރިހާ ރަށްރަށެއްގެ ސިއްޙީ ޚިދުމަތްދޭ އިދާރާތަކުގެ ނަރުހުންނާއި އެޓެންޑުންގެ ޔުނީފޯމްތައް ބަދަލުކުރުމަށްކަމަށެވެ. ނަމަވެސް އެކަމަށް ބޭނުންވާ ފޮތި ލިބުމުގެ ދަތިކަމާއެކު، މިހާރު މަސައްކަތްކުރަނީ މި އަހަރު ނިމުމުގެ ކުރިން މިކަން ފުރިހަމަކުރުމަށްކަމަށެވެ.
އާ ޔުނިފޯމް ކޯޑްގެ ތެރެއިން، މިހާރުވެސް މިވަނީ ބައެއް ސިއްޙީ މަރުކަޒުތަކާއި އަދި ހޮސްޕިޓަލްތަކުގެ ނަރުހުންނާއި އެޓެންޑެންޓުން އާ ޔުނިފޯމް ބޭނުންކުރަން ފަށާފައެވެ.