ގެވެށި އަނިޔާގެ ޢަމަލުތައް ހުއްޓުވުމަށާއި އެކަމަށް ރައްޔިތުން ހޭލުންތެރިކުރައްވައި ގެވެށި އަނިޔާގެ ޝިކާރައަކަށްވާ މީހުންނަށް ދޭންޖެހޭ ޚިދުމަތްތައް ދެއްވުމަށްޓަކައި ފިރިހެނުންނަށް އަމާޒުކުރައްވައިގެން "ހީ ފޮރ ޝީ" ގެ ނަމުގައި ރ.ދުވާފަރުގައި ހިންގެވި ޕްރޮގްރާމް ނިންމަވާލައްވައިފިއެވެ.ގެވެށި އަނިޔާގެ އަމަލުތައް ހުއްޓުވުމަށާއި އެކަމަށް ރައްޔިތުން ހޭލުންތެރިކުރުމުގެ ގޮތުން "ހީ ފޯރ ޝީ" ގެ ނަމުގައި ބޭއްވި ދެ ދުވަހުގެ ޓްރެއިނިންގ ޕްރޮގްރާމް ނިންމާ ބައިވެރިންނަށް ހަދާނީ ލިޔުން ހަވާލިކުރުމުގެ ރަސްމިއްޔާތުގައި ވާހަކަދައްކަވަމުން ޖެންޑާ މިނިސްޓްރީގެ ސްޓޭޓް މިނިސްޓަރ މަރިޔަމް އަޒްރާ ވިދާޅުވީ ގެވެށި އަނިޔާގެ ޢަމަލެއް ހިނގާހިނދު، އެކަމަށް އިޖާބަދޭންޖެހޭ ހުރިހާ ރޮނގަކުން އިޖާބަދޭންޖެހޭ ކަމަށެވެ. އަދި ގެވެށި އަނިޔާ ހުއްޓުވުމުގެ ޤާނޫނަށް އަހުލުވެރި ކުރުވުމަށާއި، ގެވެށި އަނިޔާގެ މައްސަލަތައް ދެނެގަންނާނެގޮތާއި، ގެވެށި އަނިޔާގެ ޝިކާރައަކަށްވާ ފަރާތްތަކަށް ފޯރުކޮށްދޭންޖެހޭ ޚިދުމަތްތައް ފޯރުކޮށްދިނުމަށްތަކައި ޒުވާނުން ބިނާކުރުމަށްޓަކައި މިފަދަ ގިނަ ޕްރޮގްރާމްތައް ހިންގުމަކީ މުހިންމު ކަމެއްކަމަށެވެ.މީގެ އިތުރުން ގެވެށި އަނިޔާގެ ވުޖޫދަށް އައުމުގެ ކުރިން ގިނަ މަސައްކަތްތަކެއް ކުރެވިފައިވާކަން އަޒްރާ ފާހަނގަކުރެއްވިއެވެ. މި ޕްރޮގްރާމްގައި 17 ބައިވެރިއަކަށް މަޢުލޫމާތު ދީފައިވެއެވެ.ޖެންޑާ މިނިސްޓްރީ ވިދާޅުވީ ފިރިހެނުންނަށް ހާއްސަކޮށްގެން ކުރިއަށް ގެންދިޔަ މި ތަމްރީނުގައި ގެވެށި އަނިޔާ ހިންގަން ދިމާވާ ސަބަބުތަކާއި، ގެވެށި އަނިޔާގެ ސަބަބުން ކުރާ ނޭދެވޭ އަސަރުތައް، ގެވެށި އަނިޔާ ހުއްޓުވުމުގެ ޤާނޫނު އަދި އިސްލާމީ ނަޒަރަކުން ގެވެށި އަނިޔާއާ ގުޅޭ މަޢުލޫމާތު ފޯރުކޮށްދެވިފައިވާނޭ ކަމަށެވެ.