ގއ. ވިލިނގިލީގެ މަގުތައް ރަނގަޅު ފެންވަރަކަށް ހެއްދެވުމަށް ސަރުކާރުން ފައްޓަވާފައިވާ މަޝްރޫޢުގެ ހަތްދިފަހެއް އިންސައްތަ ނިމިފައިވާކަމަށް މޯލްޑިވްސް ރޯޑް ޑިވެލޮޕްމެންޓް ކޯޕަރޭޝަނުން ބުނެފިއެވެ.އެ ކޯޕަރޭޝަންގެ މެނޭޖިންގ ޑިރެކްޓަރ އިބްރާހީމް ނަޒީމް ވިދާޅުވީ، 6.1 މިލިއަން ރުފިޔާގެ މި މަޝްރޫޢުގެ މަސައްކަތުގެ ތެރެއިން މިހާރު ކުރިއަށްދަނީ، ތާރުއެޅުމަށް ވާންޖެހޭ އެންމެ ފަހުގެ ތައްޔާރީތައްކަމަށެވެ.ވިލިނގިލީ މަގު ހެދުމުގެ މަސައްކަތް ފަށާފައިވަނީ، 2014 ވަނަ އަހަރުގެ ފެބުރުއަރީ މަހުގައެވެ. މި މަޝްރޫޢުގެ ދަށުން ތަރައްޤީ ކުރައްވާ 14 މަގުގެ މަސައްކަތް ނިންމުމަށް ކަނޑައަޅާފައިވަނީ، މި އަހަރުގެ މެއި މަހުގެ ނިޔަލަށެވެ.ރަށްރަށުގެ މަގުތައް ޒަމާނީ ފެންވަރަށް ތަރައްޤީ ކުރެއްވުމަށް ސަރުކާރުން ހިންގަވާ މަޝްރޫޢުގެ ދަށުން 14 ރަށެއްގައި މަގު ހެދުމުގެ މަސައްކަތް އެމްއާރްޑީސީން މިހާރު ކުރިއަށް އެބަގެންދަވައެވެ. އޭގެ ތެރެއިން 11 ރަށެއްގެ ބޮޑެތި މަގުތަކުގައި ތާރު އެޅުއްވުމަށް ވަނީ ނިންމަވާފައެވެ.މަގު ހެދުމުގެ މަސައްކަތް މިހާރު ކުރިއަށް ގެންދަވަނީ، ހއ. ދިއްދޫއާއި ހދ. ކުޅުދުއްފުއްޓާއި ހދ. ހަނިމާދޫއާއި ގއ. ވިލިނގިއްޔާއި ގދ. ތިނަދޫއާއި ބ. އޭދަފުއްޓާއި ރ. އުނގޫފާރުގެ އިތުރުން ފުވައްމުލަކުގައެވެ.