ގައިންގަޔަށް ނާރާ ބަލިތައް ރާއްޖޭގައި މިހާރު ހުރި ނިސްބަތުން %25، މަދުކުރުމުގެ ކެމްޕެއިން ފަށައިފިއެވެ. "30އިން 25އަށް" ކެމްޕެއިންގެ މަޤުޞަދަކީ، 2030ގެ ނިޔަލަށް މި ޢަމާޒަށް ވާސިލްވުމެވެ.
"30އިން 25އަށް" ކެމްޕެއިން އިފްތިތާޙުކޮށްދެއްވީ ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙުއެވެ. މި ރަސްމިއްޔާތުގައި ވަނީ 2020އިން 2021އަށް ކުރިއަށްގެންދިޔަ "ސްޓެޕްސް ސަރވޭ"ގެ ނަތީޖާ އިޢުލާންކުރުމާއި، އަދި "ނެޝަނަލް މަލްޓި ސެކްޓޯރަލް އެކްޝަން ޕްލޭން" އިފްތިތާޙުކޮށްފައެވެ.
މިއީ ރާއްޖޭގައި ގައިންގަޔަށް ނާރާ ބަލިތަކުގެ ޙާލަތު ދެނެގަނެ، އެފަދަ ބަލިތައް މަދުކުރުމަށް ހުރިހާ މުއައްސަސާތައް ގުޅިގެން މަސައްކަތްކުރުމަށް ފެށި މަސައްކަތްތަކެކެވެ.
ރާއްޖޭގައި މަރުވާ މީހުންގެ ނިސްބަތުން %84 މީހުންނަކީ ގައިންގަޔަށް ނާރާ ބަލީގައި މަރުވާ މީހުންނެވެ. މީގެތެރޭގައި އެންމެ ސްޓްރޯކް، ހިތުގެ ބަލި، ކެންސަރ، ފުއްޕާމޭގެ ދާއިމީ ބަލި، ހަކުރު ބަލި އަދި ކިޑްނީ ބައްޔާ ނަފްސާނީ ބަލިތައް ހިމެނެއެވެ.
މި ކެމްޕެއިން އިފްތިތާހުކުރުމުގެ ރަސްމިއްޔާތުގައި ވާހަކަފުޅުދައްކަވަމުން ހެލްތު މިނިސްޓަރ އަޙުމަދު ނަސީމް ވިދާޅުވީ، ބަލީގެ ހާލަތާ ގުޅޭގޮތުން ގެންދިޔަ ސްޓެޕް ސަރވޭ އަކީ މުޅި ރާއްޖޭގެ ޙާލަތު ރަމްޒުކޮށްދޭ ސަރވޭއެއްކަމަށެވެ. ހެލްތު މިނިސްޓަރ ވިދާޅުވީ ބަލިތައް މަދުކުރުމަށް މި ފެށި ކެމްޕެއިން ވެގެންދާނީ، ރައްޔިތުން ގާތަށް ގޮސް މަޢުލޫމާތުދީ، މުޅި ދާއިރާގެ ޙިއްސާއާއެކު ކުރެވޭ މަސައްކަތަކަށްކަމަށެވެ.
"ދޮރުން ދޮރަށް ހިނގާ މީހުންގެ ޙާލަތު ބަލާނަން. އަދި މަލްޓި ސެކްޓޯރަލް އެކްޝަން ޕްލޭންގައި، ސަރުކާރާއި ޕްރައިވެޓް ސެކްޓާރ އަދި އަމިއްލަ ޖަމިއްޔާތަކާއި ފަރުދުން ގުޅިގެން ޕްރޮގްރާމްތައް ހިންގާނަން." ހެލްތު މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ މިއީ ޤައުމު ރަނގަޅު މިސްރާބަކަށް ގެންދިއުމަށް ފެށޭ ވަރަށް މުހިންމު މަސައްކަތެއްކަމަށެވެ. އަދި މި މަސައްކަތަށް ޚާއްސަ ސްޓިއަރިން ކޮމެޓީއެއް އެކުލަވާލާ، ކޮމިޓީގެ މަސައްކަތްތައްވެސް ފަށާފައިވާކަމަށް މިނިސްޓަރ ވިދާޅުވިއެވެ.