މި މަހުގެ 1 ވަނަ ދުވަހުން ފެށިގެން ސަޢުދީ ޢަރަބިއްޔާގެ ޖިއްދާގައި ކުރިއަށްދިޔަ ރެޑް ސީ އިންޓަނޭޝަނަލް ފިލްމް ފެސްޓިވަލްގައި ބޮލީވުޑްގެ ތަރިންވެސް ބައިވެރިވެފައިވެއެވެ. އޭގެ ތެރެއިން އެއް ތަރިއަކީ ރަންބީރު ކަޕޫރެވެ.
މި މަހުގެ 10 ވަނަ ދުވަހުގެ ނިޔަލަށް ކުރިއަށްދިޔަ މި ފެސްޓިވަލްގައި ބައިވެރިވާ ހޮލީވުޑްގެ ޚަބަރުތައް ގެނެސްދޭ ޑެޑްލައިނަށް ދިން އިންޓަވިއުއެއްގައި 40 އަހަރުގެ އެކްޓަރު ބުނީ އަބަދު ވެސް ޑައިރެކްޓްކުރުމަކީ ވަރަށް ބޮޑު ހުވަފަނެއް ކަމަށެވެ.
އެކަމަކު އަމިއްލަ އަށް ސްކްރިޕްޓް ލިޔުމުގެ ޤާބިލުކަން ނެތުމުން، ފިލްމެއް ޑައިރެކްޓްކުރުމަކީ ވަރަށް އުނދަގޫ ކަމަކަށް ވާނެ ކަމަށް ބުންޏެވެ. ނަމަވެސް އަމިއްލަ އަށް ވާހަކައެއް ލިޔެ، އެއަށް ސްކްރީން ޕްލޭ އުފައްދައި، ޑައިރެކްޓްކުރަން ބޭނުންވާ ކަމަށް ރަންބީރު ބުންޏެވެ.
ހޮލީވުޑަށް ދިއުމުގެ އެއްވެސް ވިސްނުމެއް އެބަ އޮތްތޯ އެހުމުން ރަންބީރް ބުނީ އެކަމަށް އެއްވެސް އިރެއްގައި ނޫނެކޭ ނުބުނާނެ ކަމަށެވެ. އެކަމަކު ބޮލީވުޑުން ލިބެމުން އަންނަ ފުރުޞަތުތަކާ މެދު ވަރަށް ހިތްހަމަޖެހިގެން ހުރި ކަމަށް ބުންޏެވެ. ރަންބީރުގެ އަންހެނުން އާލިއާ ބަޓް ދާދި ފަހުން "ހާޓް އޮފް ސްޓޯން" ކިޔާ ހޮލީވުޑްގެ ފިލްމެއްގެ މަސައްކަތްކޮށްފައިވެއެވެ. އަންނަ އަހަރު އެ ފިލްމު ރިލީޒްކުރާނެއެވެ.
ރަންބީރު އެންމެ ފަހުން ފެނުނު ފިލްމަކީ އަންހެނުން އާލިއާ ބަޓް އާއިއެކު ކުޅެ އޮގަސްޓް މަހު ރިލީޒްކޮށްފައިވާ "ބުރައްމަސްތުރާ" އެވެ. އަންނަ އަހަރު އޭނަގެ ދެ ފިލްމެއް ރިލީޒްވާނެއެވެ. އެއީ އަދި ނަން އިޢުލާންކޮށްފައިނުވާ ޑައިރެކްޓަރު ލަވް ރަންޖަންގެ ރޮމޭންޓިކް ކޮމެޑީއަކާއި، ޑައިރެކްޓަރު ސަންދީޕް ރެޑީ ވަންގާގެ ތުރިލާ ފިލްމު "އެނިމަލް" އެވެ.