ސިންގަލް ޔޫސް ޕްލާސްޓިކުގެ ބާވަތްތަކުގެ ލިސްޓު، "ކުނިމެނޭޖްކުރުމުގެ ޤާނޫނު"ގެ ދަށުން ރައީސުލްޖުމްހޫރިއްޔާ އަލުން ކަނޑައަޅުއްވައިފިއެވެ.
ކުރިން މި ލިސްޓު ކަނޑައަޅާފައިވަނީ "ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ޤާނޫނު"ގެ ދަށުންނެވެ. ނަމަވެސް ކުނިމެނޭޖުކުުރުމުގެ ޤާނޫނަށް ޢަމަލުކުރަން ފެށުމާއެކު މި ލިސްޓު، ތިމާވެށި ރައްކާތެރިކޮށް ދެމެހެއްޓުމާ ބެހޭ ޤާނޫނުގެދަށުން ވަނީ އުނިކޮށްފައެވެ. އަދި ކުނި މެނޭޖުކުރުމުގެ ޤާނޫނުގެދަށަށް ބަދަލުކުރައްވާ، ރައީސޫލްޖުމްހޫރިއްޔާ ވަނީ ލިސްޓު އަލުން ކަނޑައަޅުއްވާފައެވެ.
ސިންގަލް ޔޫސް ޕްލާސްޓިކްގެ ބާވަތްތަކުން ކަނޑައެޅޭ ބާވަތްތަކެއް ރާއްޖޭގައި އުފެއްދުމާއި ވިއްކުން މަނާކޮށް އެކަމުގެ ޤަރާރު، ރައީސުލްޖުމްހޫރިއްޔާ ފުރަތަމަ ނެރުއްވީ މިދިޔަ އަހަރުގެ ޑިސެމްބަރުމަހުގެތެރޭގައެވެ. އެގޮތުން 13 ބާވަތެއް ހިމެނޭހެން ލިސްޓް ނެރުއްވިއިރު، އޭގެތެރެއިން ފުރަތަމަ މަރުޚަލާގައި 8 ބާވަތެއް އުފެއްދުމާއި ވިއްކުން މަނާކުރިއެވެ. މި ބަދަލަށް ޢަމަލުކުރަން ފެށީ މިއަހަރުގެ ޖޫން މަހުއެވެ.
މި ބާވަތްތައް ކުނި މެނޭޖުކުރުމުގެ ޤާނޫނުގެ ދަށަށް ބަދަލުކޮށް، 13ބާވަތެއްގެ ލިސްޓާއެކު މި ޤަރާރު ރައީސުލްޖުމްހޫރިއްޔާ މިވަނީ އަލުން ނެރުއްވާފައެވެ.
މީގެތެރޭގައި ޕްލާސްޓިކް ހޮޅިއާއި، ތަށި ސަމުސާފަދަ ބާވަތްތަކާއި، ކާބޯތަކެތި ބަންދުކުރާ ސްޓައިރަފޯމް ފޮށި، އަދި ވަކި މިންގަނޑެއްގެ ޕްލާސްޓިކް ކޮތަޅާއި ވަކި ސައިޒެއްގެ ކުދި ޕްލާސްޓިކް ފުޅީފައި ބަންދުކޮށްފައި ހުންނަ ރީތިވާސާމާނު ހިމެނޭ ބާވަތްތައް އެތެރެކޮށް ވިއްކުން މަނާވާނެއެވެ.