މި މަހު ރިލީޒްކުރާ ޝާހްރުކް ޚާންގެ ފިލްމު "ޕަތާން" ޓްރެއިލާ މި މަހުގެ 10 ގައި ރިލީޒްކުރާ ހަމަޖެހިއްޖެއެވެ.
މިކަން ފިލްމީ ޚަބަރުތައް ގެނެސްދޭ މީޑިއާތަކާއި ބައެއް ކްރިޓިކުން މިއަދު ހިއްސާކުރި ނަމަވެސް އެ ފިލްމު އުފެއްދި، ޔާޝްރާޖް ފިލްމްސް،ވައިއާރްއެފް އާއި ޝާހުވެސް އަދި އެކަން ކަށަވަރުކޮށް ދީފައެއްނުވެއެވެ.
"ޕަތާން" ގެ ޓްރެއިލާ ރިލީޒްކުރުން ލަސްވެގެން ޝާހުރުކްގެ ވަރަށް ގިނަ ފޭނުން ސޯޝަލް މީޑިއާގައި އެ ވާހަކަ ވަނީ ދައްކާފައެވެ. އަދި "އާސްކް އެސްއާރްކޭ" ގެ ނަމުގައި ދާދިފަހުން ޓްވިޓާގައި ކުރިއަށް ގެންދިޔަ ސުވާލާއި ޖަވާބު ސެޝަނުގައި ވެސް ވަރަށް ގިނަ ފޭނުން ވަނީ ޓްރެއިލާ ނެރެނީ ކޮން އިރަކުތޯ އަހާފައެވެ.
"ޕަތާން" ރިލީޒްކުރަން ހަމަޖެހިފައި ވަނީ މި މަހުގެ 25 ދުވަހުއެވެ. މި އެކްޝަން ތުރިލާގެ ޓީޒާއެއް ނޮވެމްބަރު މަހު އާންމުކުރިއެވެ. އޭގެ ފަހުން ފިލްމުގެ ދެ ލަވައެއް ވެސް ވަނީ ދައްކާލާފައެވެ.
ސިދާތު އާނަންދު ޑައިރެކްޓްކޮށްފައިވާ "ޕަތާން" ގެ ކާސްޓްގައި ދީޕިކާ ޕަދްކޯނާއި ޖޯން އަބްރަހަމް ވެސް ހިމެނެއެވެ.
"ޕަތާން" ގެ ޓްރެއިލާ ދައްކާލަން ތައްޔާރުވެފައިވާއިރު، މި ފިލްމުން ބައެއް މަންޒަރުތައް އުނިކޮށް ފިލްމް އެޅުވުމުގެ ހުއްދަ އިންޑިއާގެ ސެންޓްރަލް ބޯރޑް އޮފް ފިލްމް ސެޓިފިކޭޝަން،ސީބީއެފްސީ އިން ވަނީ ދީފައެވެ.
ފިލްމީ ހަބަރުތައް ގެނެސްދޭ ނޫސްތަކުން ރިޕޯޓްކޮށްފައިވާގޮތުގައި މިފިލްމްގެ 10 މަންޒަރެއް އުނިކޮށްފައިވާއިރު މީގެ ތެރޭގައި ނިވާކަން ކުޑަ ހެދުން އެޅިކަމަށް ބުނެ މައްސަލަ ބޮޑުވި ލަވަ "ބޭޝަރަމް ރަންގް"ގެ ތިން މަންޒަރެއް ވެސް ހިމެނެއެވެ. އަދި ފިލްމްގައި ބޭނުންކޮށްފައިވާ ބައެއް ބަސްބަސް ބަދަލުކޮށް ފިލްމް އެޅުވުމުގެ ހުއްދަ ދީފައިވަނީ މިމަހުގެ 2 ވަނަ ދުވަހުކަމަށް ވެސް ނޫސްތަކުން ރިޕޯޓްކުރެއެވެ.
ދެ ގަޑިއިރާއި 26 މިނެޓުގެ މިފިލްމްގެ ދެ ލަވަ މިހާރު ރިލީޒްކޮށްފައިވާއިރު ފިލްމަށް ވަނީ ގިނަ ފާޑުކިޔުންތަކެއްވެސް އަމާޒުވެފައެވެ.