ކަސްޓަމަރުންގެ ކާޑުގެ ނުވަތަ ކަސްޓަމަރެއްގެ އެއްވެސް މައުލޫމާތެއް ބޭންކް އޮފް މޯލްޑިވްސްއިން އާންމުވެފައިނުވާ ކަމަށާއި، ކާޑުގެ މައުލޫމާތު ހާމަވެގެން ގެއްލޭ ފައިސާ އަނބުރާ ލިބޭނެ ކަމުގެ ޔަޤީންކަން ބީއެމްއެލްއިން ދީފިއެވެ.
ބީއެމްއެލްގެ ކާޑުތަކުގެ މައުލޫމާތު ހާމަވެފައިވާކަމަށް ބުނެ ސޯޝަލް މީޑިއާގައި ދެކެވެމުންދާ ވާހަކަތަކާ ގުޅޭ ގޮތުން ބޭންކުން ނެރުނު ބަޔާނެއްގައިވަނީ ބޭންކް އޮފް މޯލްޑިވްސް އިން ކަސްޓަމަރުންގެ ކާޑުގެ ނުވަތަ ކަސްޓަމަރެއްގެ އެއްވެސް އެހެން މައުލޫމާތެއް އާންމުވެފައިނުވާ ކަމަށެވެ. އެހެން ނަމަވެސް ބައެއްފަހަރު ދުނިޔޭގެ އެކި ކަންކޮޅުތަކުގައި އޮންލައިންކޮށް ވިޔަފާރިކުރާ މަރޗަންޓުންނާއި އީކޮމަރސް މަރޗަންޓުންގެ ޕޭމަންޓް ސިސްޓަމަށް ވަދެ ސްކޭމް ހިންގާ ފަރާތްތަކުން ކަސްޓަމަރުންގެ ކާޑުގެ މައުލޫމާތުތައް ވަގަށް ނަގާ ކަމަށެވެ.
މުޅި ދުނިޔޭގައިވެސް މިގޮތަށް ކާޑުގެ މައުލޫމާތު އާންމުވާ ހާލަތްތަކުގައި އެތައް މިލިއަން ކަސްޓަމަރުންނަށް މީގެ އަސަރުކުރާ ކަމަށް ބޭންކުންވަނީ ހާމަކޮށްފައެވެ.
ކަސްޓަމަރުން ރައްކާތެރިކުރުމަކީ ބޭންކުން އެންމެ އިސްކަންދޭ ކަން ކަމަށާއި، އެހެންކަމުން ކާޑުގެ ރައްކާތެރިކަން ކަށަވަރުކޮށް އަދި ކާޑުގެ މައުލޫމާތު ހާމަވެދާނެފަދަ އަމަލެއް ހިނގަމުންދޭތޯ ބޭންކުން އަބަދުވެސް މޮނިޓަރ ކުރަމުން އަންނަ ކަމަށް ބޭންކް އޮފް މޯލްޑިވްސްއިން ހާމަކުރެއެވެ.
ބޭންކް އޮފް މޯލްޑިވްސްގެ ބަޔާނުގައިވާ ގޮތުން ކާޑުތަކުގެ މައުލޫމާތު ހާމަވެ، ބައެއް ކަސްޓަމަރުންގެ ކާޑުތަކުން މުއާމަލާތްތަކެއްވެސް ހިންގާފައިވާ ކަމަށާއި މިފަދަ ކާޑުތަކުން ބޭންކުން ބްލޮކްކޮށްފައިވާ ކަމަށްވެސް ބޭންކް އޮފް މޯލްޑިވްސްއިން ހާމަކުރެއެވެ. އަދި މިފަރާތްތަކަށް އެއްވެސް ފީއަކާ ނުލާ، އައު ކާޑު ހަދާދޭ ކަމަށްވެސް އެބޭންކުން ހާމަކުރެއެވެ.
އަދި މިފަދަ ގޮތަކަށް ކާޑުގެ މައުލޫމާތު ހާމަވާ ހާލަތްތަކުގައި ކަސްޓަމަރުންނަށް މާލީ ގޮތުން އެއްވެސް ގެއްލުމެއް ނުލިބި ފުރިހަމަ ރައްކާތެރިކަން ލިބޭނެ ކަމަށާއި، ގެއްލިފައިވާ ފައިސާއާ ގުޅިގެން ކަށަވަރު ކުރަންޖެހޭ ކަންކަން ކަށަވަރު ކުރުމަށްފަހު ކަސްޓަމަރުންނަށް ރީފަންޑް ލިބޭނެ ކަމަށްވެސް ބޭންކުންވަނީ ބުނެފައެވެ.