މަލިކުގައި ރަސްމީ މުޢާމަލާތްތައް ދިވެހި ބަހުން ކުރަން ނިންމާފައިވާކަމަށް ދިވެހި ބަހުގެ އެކަޑަމީގެ ރައީސް އަޝްރަފް ޢަލީ ވިދާޅުވެއްޖެއެވެ.ބައިނަލްއަޤްވާމީ މާދަރީ ބަހުގެ ދުވަސް ފާހަގަކުރުމުގެ ގޮތުން ރަސްފަންނުގައި މިރޭ ބޭއްވި ޚާއްސަ ޖަލްސާގައި ވާހަކަދައްކަވަމުން އަޝްރަފް ޢަލީ ވިދާޅުވީ، ބައިނަލް އަޤްވާމީ މާދަރީ ބަހުގެ ދުވަސް ފާހަގަކުރުމަށް މަލިކުގައި އިއްޔެ ބޭއްވި ޖަލްސާގައި މަލިކު ސަރުކާރުގެ ރަސްމީ މުޢާމަލާތްތައް ދިވެހި ބަހުން ކުރުމަށް ނިންމަވާފައިވާކަމަށެވެ. އަދި މިކަމަކީ ދިވެހި ބަހަށް ލިބުނު ބައިނަލްއަޤްވާމީ ބާރެއްކަމަށް އަޝްރަފް ވިދާޅުވިއެވެ.ދިވެހިބަހުގެ އެކަޑަމީން އިންތިޒާމްކޮށްގެން އެޑިއުކޭޝަން މިނިސްޓްރީއާ ގުޅިވަޑައިގެން ބޭއްވެވި މިޖަލްސާގައި ރާއްޖޭގެ އެކި ހިސާބުތަކުގައި ބޭނުންކުރާ ބަހުރުވަ ބޭނުންކޮށްގެން ސްކޫލްތަކުގެ ދަރިވަރުންވަނީ ހުށަހެޅުންތައް ހުށަހަޅާދީފައެވެ. ބައިނަލްއަޤްވާމީ މާދަރީބަހުގެ ދުވަހަށް ޔުނެސްކޯއިން ކަނޑައަޅުއްވާފައިވާ ޝިޢާރަކީ "ފެންވަރު ރަނގަޅު ތަޢުލީމު، ކިޔަވައިދޭން ބޭނުން ކުރާ ބަސް، ނެރެން ބޭނުންވާ ނަތީޖާ" މި ޝިޢާރެވެ.