ޓެރަރިޒަމާއި މަނީލޯންޑްރިންގެ މައްސަލަތަކަކާ ގުޅިގެން ހޯދުމަށް އިންޓަރޕޯލްގެ ރެޑް ނޯޓިސް ނެރެފައިވާ މ.ސެސްނާ، މުޙައްމަދު ޢައްލާމް ލަޠީފާއި، މ.ލޭންޑްއޮފް ގާރޑްން، އަޙްމަދު އިޝްފާހް ޢަލީ ފުލުހުންގެ ތަޙްޤީގަށް ޙާޟިރުވުމަށް އެންމެ ފަހު ފުރުޞަތު ފުލުހުން ދެއްވައިފިއެވެ.
އެދެމީހުން ފުލުހުންގެ ތަޙްޤީގަށް ޙާޟިރުވުމަށް ވަނީ 14 ދުވަހުގެ މުހުލަތެއް ފުލުހުން ދެއްވާފައެވެ. މި ދެމީހުން ފުލުހުންގެ ތަޙްޤީގަށް ޙާޟިރުވުމަށް އަންގަވައި ފުލުހުން ނެރުއްވާފައިވާ ބަޔާނުގައި، އެދެ މީހުންގެ މައްޗަށް ތުހުމަތުކުރެވޭ ޓެރަރިޒަމްގެ މައްސަލައިގެ ތަޙްޤީޤް ނިމިފައިވާއިރު، މިދެމީހުންނަކީ މިހާރުވެސް އެމީހުންގެ މައްޗަށް ތުހުމަތުކުރެވޭ މައްސަލަތަކާ ގުޅިގެން ހައްޔަރުކުރުމަށް ދިވެހިރާއްޖޭގެ ކްރިމިނަލް ކޯޓުން އަމުރު ނެރުއްވައި، އިންޓަރޕޯލް ރެޑް ނޯޓިސް ނެރެ ފުލުހުންގެ ތަޙުޤީޤަށް ހޯދަމުންދާ ދެމީހުން ކަމަށާއި، ރާއްޖެއިން ބޭރުގައި ފިލައިގެން އުޅެމުން އަންނާތީ ފުލުހުންގެ ބެލުމުގެ ދަށަށް އައުމަށް އާންމުކޮށް އަންގައި އިޢުލާންކުރައްވާފައި ވީނަމަވެސް މިހާތަނަށްވެސް މިދެމީހުން ފުލުހުންގެ ތަޙްޤީޤަށް ޙާޟިރުވެފައިނުވާކަމަށެވެ.
މިދެމީހުންގެ މައްޗަށް ތުހުމަތުކުރެވޭ މައްސަލަތަކާ ގުޅިގެން އެދެމީހުންނާ ތަޙްޤީޤަށް ކުރަންޖެހޭ ސުވާލުތައްކުރުމަށާއ، އެދެމީހުންގެ މައްޗަށް ކުރެވޭ ތުހުމަތުތަކަށް ޖަވާބުދާރީވެ ދިފާޢުގައި ވާހަކަ ދެއްކުމުގެ ފުރުޞަތު ދިނުމުގެ ގޮތުން ދެވޭ ފަހު ފުރުޞަތެއްގެ ގޮތުގައި މިއަދުން ފެށިގެން 14 ދުވަހުގެތެރޭގައި ފުލުހުންގެ އިދާރާއަށް ޙާޟިރުވުމަށް ފުލުހުން ވަނީ އިލްތިމާސްކުރައްވާފައެވެ. އަދި ޙާޟިރު ނުވެއްޖެނަމަ އެމީހުންގެ މައްޗަށް ތުހުމަތުކުރެވޭ މައްސަލަތަކާ ގުޅިގެން މިހާތަނަށް ހޯދިފައިވާ ހޯދުންތަކާއި ލިބިފައިވާ ހެއްކާއި ޤަރީނާތަކުގެ މައްޗަށް ބިނާކުރައްވައި އެދެމީހުންގެ ޣައިރު ޙާޟިރުގައި އެމީހުންގެ މައްޗަށް ތުހުމަތުކުރެވޭ މައްސަލައިގައި ދަޢުވާކޮށްދެއްވުން އެދިވަޑައިގެން ޕްރޮސެކިއުޓަރ ޖެނެރަލްގެ އޮފީހަށް ފޮނުއްވާނެކަމަށް މޯލްޑިވްސް ޕޮލިސް ސަރވިސްއިން ވަނީ ކަނޑައަޅުއްވާފައެވެ.