ސޫރިޔާގައި މިހާރު ބަދަލުކުރަމުންދާ ހަމަލާތައް ވަގުތީ ގޮތުން ހުއްޓާލުމަށް އެމެރިކާ އާއި ރަޝިޔާ އިން އެކުލަވާލާފައިވާ އެއްބަސްވުމަށް ހުރިހާ ފަރާތްތަކުން އަމަލުކުރުމަށް އދ ގެ ސެކިއުރިޓީ ކައުންސިލުގެ ހުރިހާ މެންބަރުން ގޮވާލައިފިއެވެ.
އދގެ ސެކިއުރިޓީ ކައުންސިލުން މިކަމަށް ގޮވާލާ ނެގި ވޯޓުގެ ކުރިން، އދ އިން ސޫރިޔާއަށް ކަނޑައަޅުއްވާފައިވާ މަންދޫބު ސްޓެފާން ޑި މިސްތޫރާ ވިދާޅުވީ ހަމަލާތައް ވަގުތީ ގޮތުން ހުއްޓާލައިފިނަމަ، މާޗް 7 ގައި ސުލްހައިގެ މަޝްވަރާތައް ފެށޭނެ ކަމަށެވެ. ސެކިއުރިޓީ ކައުންސިލުން ބުނާ ގޮތުގައި ހަމަލާތައް ދިނުން ހުއްޓާލާ، ސުލްހައިގެ މަޝްވަރާތަކުގައި ބައިވެރިވުމަށް ސޫރިޔާގައި ހަރަކާތްތެރިވާ ޖަމާއަތްތަކުން ވެފައިވާ އަހުދަށް އަމަލުކުރަންޖެހޭ ކަމަށެވެ. އަދި، ކޮންމެ ޖަމާއަތަކަށް ލިބިފައިވާ ނުފޫޒު ހެޔޮ ގޮތުގައި ބޭނުން ކުރުމަށާއި ސޫރިޔާގެ މައްސަލަތަކަށް ދާއިމީ ހައްލެއް ލިބިގެން މެނުވީ ސަރަހައްދުގެ އަމަން އަމާންކަން ޤާއިމް ނުވާނޭ ކަމަށްވެސް އދ އިން ވަނީ ބުނެފައެވެ.
ސޫރިޔާގެ މައްސަލައަށް ހައްލެއް ހޯދުމަށް ފެބްރުއަރީ 3 ވަނަ ދުވަހު ބޭއްވި މަޝްވަރާތައް ކުރިއަށް ނުގެންގޮސް، މިސްތޫރާ ވަނީ މަޝްވަރާތައް މެދުކަނޑާލާފައެވެ. އަދި، މަޝްވަރާތަކުގައި ބައިވެރިވާ ޤައުމުތައް، ހާއްސަކޮށް އެމެރިކާ އާއި ރަޝިޔާ އިން މަޝްވަރާތަކަށް ތައްޔާރުވުމަށް އޭނާ ވަނީ ގޮވާލައްވާފައެވެ. ސުލްހައިގެ މަޝްވަރާތަކާއި މެދު އެމެރިކާއިން އދ އަށް ކަނޑައަޅުއްވާފައިވާ އެމްބެސެޑަރ ސަމަންތާ ޕަވަރ ވިދާޅުވީ ޙަމަލާތައް ހުއްޓާލުމަށް އެއްބަސްވުމަށްފަހު، އަލުން ޙަމަލާތައް ފަށާ ފަރާތްތަކާއި ދެކޮޅަށް ހަރުކަށި ފިޔަވަޅު އެޅުމަށް ހުށަހަޅުއްވާނޭ ކަމަށެވެ. ރަޝިޔާގެ ޚާރިޖި ވުޒާރައިގެ ނައިބު ގެންނާޑީ ގާޓިލޮވް ވިދާޅުވީ މިއީ އެއްކޮށް ޙަމަލާތައް ހުއްޓާލާ، ދާއިމީ ސުލްހައެއް ޤާއިމްކުރުމަށް ލިބިގެންދާ ފުރުސަތެއް ކަމަށެވެ.