ކުނި ބިލް ސްޓެލްކޯގެ ބިލާ އެއްކޮށްލާއިރު ވެމްކޯއަށް ނުދައްކާހުރި ބިލްތައް ނުހިމަނާނެ ކަމަށް ވެމްކޯއިން ވިދާޅުވެއްޖެއެވެ.
އޭޕްރީލް މަހުގެ 1 ވަނަ ދުވަހުން ފެށިގެން ސްޓެލްކޯގެ ކަރަންޓު ބިލުގައި ކުނި ބިލް ހިމަނަންވަނީ ނިންމާފައެވެ.
ކުނި ބިލު ސްޓެލްކޯގެ ކަރަންޓް ބިލުގައި ހިމެނުމާ ގުޅިގެން ބޭއްވި ނޫސްވެރިންގެ ބައްދަލުވުމުގައި ވެމްކޯގެ މެނޭޖިން ޑިރެކްޓަރ ޔޫސުފް ސިރާޖްވެސް ވިދާޅުވެފައިވަނީ ވެމްކޯއަށް ލިބެންޖެހޭ އާމްދަނީގެ ބޮޑު ބައެއް ނުލިބިވާކަމަށެވެ. އެގޮތުން މާލެ ސަރަހައްދުގައި 53000 އަށްވުރެ ގިނަ ގޭބިސީން ކުނި ނެގި ނަމަވެސް ގަވާއިދުން ފީ ދައްކަނީ އެންމެ 20000 ގޭބީސީން ކަމަށް މީގެ ކުރިން ވެމްކޯއިން ވަނީ ވިދާޅުވެފައެވެ. ކުނި ބިލު ނުދައްކާތީ ކުންފުނީގެ ކޭޝްފްލޯ ދަތިވެ ޚިދުމަތް ފޯރުކޮށްދިނުމަށް ބޭނުންކުރަމުންދާ ބައެއް އާލާތްތައް އެކަށީގެންވާ ގޮތެއްގައި މަރާމާތު ނުކުރެވި ބޭނުން ނުކުރެވޭ ހާލަތަށް އަންނަކަމަށް އެންވަޔަރަންމަންޓް މިނިސްޓްރީންވެސްވަނީ ވިދާޅުވެފައެވެ.
އެހެންނަމަވެސް މި ގެނައި ބަދަލާއެކު ބިލަށް ފައިސާ ހޯދުމުގައި މިހާރު ދިމާވަމުންދާ ދަތިތައް ހައްލުވާނެ ކަމަށް ވެމްކޯއިން ވިދާޅުވެއެވެ. ވެމްކޯއިން ވިދާޅުވީ އޭޕްރީލް 1 އަކުން ފެށިގެން ސްޓެލްކޯ ބިލުގެ ތެރޭގައި ކުނި ބިލު ހިމަނާއިރު ސްޓެލްކޯގައި ރަޖިސްޓްރީކޮށްފައިވާ 50،000 އަށް ވުރެ ގިނަ ގޭބިސީއަށް ކުނި ބިލް ފޮނުވާނެކަމަށެވެ. މިހާރު ވެމްކޯގައި ރަޖިސްޓްރީކޮށްފައިވަނީ 24،000 ގޭބީސީއެކެވެ
ވެމްކޯ ބިލާއި ސްޓެލްކޯގެ ބިލު އެއްކޮށްލާތީ އެ ކުންފުނިން ވަނީ ގޭބިސީތަކުގެ މައުލޫމާތު އަޕްޑޭޓްކުރަން އިލްތިމާސްކޮށްފައެވެ. އެގޮތުން އާއްމު ގޭބިސީ ކަރަންޓް މީޓަރުތަކުގެ ތެރޭގައި ލިފްޓް ނުވަތަ މެއިންޓަނަންސް މީޓަރެއް ހުންނަ ނަމަ އެފަރާތްތަކުން "ޔޫޓިލިޓީ މީޓަރު އެކްސްކުލޫޝަން ފޯމް" ފުރިހަމަކޮށް، އެކޯޕަރޭޝަނަށް ހުށަހަޅަން ވަނީ އެދިފައެވެ
Regarding 1 April, WAMCO-STELCO Bill tie, here are answers to some of your burning questions!
— Waste Management Corporation Limited (WAMCO) (@WAMCOmv) March 30, 2023
Follow us for more information! pic.twitter.com/rXmeK2IgFp
މީގެ އިތުރުން، ކޮމާޝަލް ރެޒިޑެންޝަލް ކޮމްޕްލެކްސްތައް ބަލަހައްޓާ ފަރާތްތަކުން "ޕްރައިމަރީ މީޓަރު އައިޑެންޓިފިކޭޝަން އެންޑް ގްރޫޕިން ފޯމް" ފުރިހަމަކޮށް ހުށައެޅުމަށް ވެސް ވެމްކޯއިން އެދިފައިވެއެވެ. ވެމްކޯގެ ހިދުމަތް ހޯދާ މުއައްސަސާތަކާއި ވިޔަފާރިތަކުން "އިންފޮމޭޝަން އަޕްޑޭޓް ފޯމް" އަންނަ މަހުގެ ހަ ވަނަ ދުވަހުގެ ކުރިން ހުށަޅަން ވަނީ އެދިފައެވެ. ވެމްކޯއިން ވިދާޅުވީ އެ މުއްދަތުގައި މައުލޫމާތު ހުށަނާޅައިފި ނަމަ ހިދުމަތް މެދުކެނޑޭނެ ކަމަަށެވެ.
ވެމްކޯއިން އިތުރަށް ބުނެފައިވަނީ ގޭބީސީތަކުން 1 އެޕްރީލް އިން ފެށިގެން ބިލް ކުރާނީ މަހަކަށް 150ރ ގެ ރޭޓުން ކަމަށެވެ. އެގޮތުން އަހަރަކަށް ޖެހޭ މިންވަރު 1800ރ، 365 ދުވަހަށް ބެހުމަށްފަހު ދުވާލަކަށް ޖެހޭ 4.9315 ގެ ރޭޓުން ސްޓެލްކޯއިން ތައްޔާރު ކުރާ ކަރަންޓް ބިލުގައިވާ މުއްދަތަށް ބިލްކުރާނެ ކަމަށް ވެމްކޯއިން ބުނެއެވެ.
ވެމްކޯއިން ބުނީ ގޭބިސީތަކުން ބޭނުންނުކުރާ ކަރަންޓު މީޓަރުތަކުގައި ކުނި އުކާލުމުގެ ހިދުމަތުގެ ފީ ނުހިމަނާނެ ކަމަށެވެ.
ވެމްކޯއިން ވަނީ އެކުންފުނިން ގެންގުޅޭ ފީ ސްޓްރަކްޗަރަށްވެސް ބަދަލުތަކެއް ގެނެސްފައެވެ. އެގޮތުން ކޭޝް ފްލޯ މެނޭޖުކުރެވޭގޮތަށް ބަލައި ކުރިން ސަރުކާރު ކުންފުނިތަކުން ކުނި އުކައިދިނުމަށް ނަގާ އަގުތަކާއި ޕްރައިވެޓް ކަލެކްޓާސްގެ އަތުން ނަގާ އަގަށް ވަނީ ބަދަލު ގެނެސްފައެވެ.