ރާއްޖެ ޓްރާންސްޕޯޓް ލިންކް، އާރްޓީއެލް ފެރީގެ ދަތުރުތައް ހުވަދު އަތޮޅުގައި ފެށުމަށް ބޭނުންވާ ފުރަތަމަ ލޯންޗް ފެރީ ނިންމާ އެމްޓީސީސީން ހަވާލުކޮށްފިއެވެ. އެ ފެރީ ތިލަފުށީ ބޯޓްޔާޑުން މޫދަށްވަނީ ބާލާފައެވެ.
"އިންޓަގްރޭޓެޑް ނޭޝަނަލް ޕަބްލިކް ފެރީ ނެޓްވޯކް"ގައި ބޭނުންކުރާ ފެރީތައް ބަނުމުގެ މަސައްކަތް މިހާރު ކުރިއަށްގެންދަނީ އަލްޝާލީ މެރިންއާ ހަވާލުކޮށްގެންނެވެ.
އާރްޓީއެލް ފެރީގެ ދަތުރުތައް ހުވަދު އަތޮޅުގައި ފެށުމަށް ބޭނުންވާ ފުރަތަމަ ލޯންޗް ފެރީ ތިލަފުށީގައި ބޭލުމަށްފަހު މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ، އެމް.ޓީ.ސީ.ސީންގެ މެރިން ޓްރާންސްޕޯޓް ޑިވިޝަންގެ ޖެނެރަލް މެނޭޖަރ އިސްމާއިލް ފާރިގް ވިދާޅުވީ މި ލޯންޗް ފެރީއަކީ އާރްޓީއެލް ފޭސް 1 ގައި ބޭނުން ކުރި ފެރީތައް ފަދައިން ކޮންޑިޝަން ރަނގަޅު ފެރީތަކެއް ކަމަށެވެ.
އަދި މިހާރު ބޭނުން ކުރާ ލޯންޗް ފެރީތަކަށް ވުރެ މިފެރީ ސައިޒުން ބޮޑުވެ ޖާގައިގެ ގޮތުން ތަނަވަސް ވާނެ ކަމަށް ފާރިގް ވިދާޅުވިއެވެ. ފާރިގް ވިދާޅުވީ ހުވަދުއަތޮޅުގައި މިޚިދުމަތް ފެށުމަށް އަންނަ ޖުލައި މަހާ ހަމައަށް 6 ލޯންޗު ނިންމާލެވޭނެ ކަމަށެވެ. އަދި ހުވަދު އަތޮޅަށް ފުރަތަމަ ފިޔަވަހީގެ ދަތުރުތައް ފަށާނީ ހަ ލޯންޗާއެކު ކަމަށް ފާރިގް ވިދާޅުވިއެވެ. އަދި ހުވަދު އަތޮޅާއެކު އައްޑު އާއި ފުވައްމުލައްވެސް އާރުޓީއެލް ފެރީގެ ޚިދުމަތުން ގުޅާލެވޭނެ ކަމަށް ފާރިގު ވިދާޅުވިއެވެ.
" މި ލޯންޗްތަކަކީ އާރްޓީއެލްގެ ފޭސް 1 ގައި ބޭނުން ކުރި ލޯންޗްތައް ފަދައިން ކޮންޑިޝަން ރަނގަޅު ރީތި ލޯންޗުތަކެއް. ކުރީގެ ލޯންޗްތަކަށް ވުރެ ސައިޒުން ބޮޑުވެ ޖާގަވެސް ތަނަވަސް ވާނެ މި ފޭސް 2 ގައި ކުރިއައް ގެންދާ ލޯންޗްތައް" ފާރިގް ވިދާޅުވިއެވެ.
އާރްޓީއެލްގެ ފެރީތައް ފަރުމާކޮށްފައިވަނީ، ސީދާ މިޚިދުމަތަށް ޚާއްސަކޮށްގެންނެވެ. މިއީ 50 މީހުންގެ ޖާގައިގެ ފެރީތަކެއް ނަމަވެސް އެތެރޭގައި ޖާގަ ތަނަވަސް ވާނެ ކަމަށާއި، ވީލް ޗެއާރ އާއި ސްޓްރެޗާ ބަހައްޓާ ސަރަހައްދުގެ ޖާގަވެސް ބޮޑުވެ ފަސޭހަވާނެ ކަމަށް ފާރިގް ވިދާޅުވިއެވެ.
އެހެން އަތޮޅުތަކުގައި އާރްޓީއެލްގެ ފެރީގެ ޚިދުމަތް ފެށިގެން ދިޔަގޮތަށް ހުވަދު އަތޮޅުގައިވެސް ފެރީގެ ޚިދުމަތް ފަށާ އެންމެ ފުރަތަމަ ދަތުރުތައް ގެންދާނީ ހިލޭ ކަމަށް ފާރިގް ވިދާޅުވިއެވެ.
އެމް.ޓީ.ސީ.ސީން ވިދާޅުވީ، ހިލޭ މިދަތުރުތައް ކޮށްދިނުމަށް ކަނޑައަޅާފައިވާ މުއްދަތުގެ މައިގަނޑު މަޤްޞަދަކީ އާއްމުން ފެރީ ޝެޑިއުލަށް އަހުލުވެރިކޮށް، މި ޚިދުމަތް ރަނގަޅަށް ތަޖުރިބާ ކޮށްދިނުމުގެ ފުރުޞަތު އާއްމުންނަށް ދިނުމާއި، އާއްމުންގެ ޚިޔާލާ އެއްގޮތަށް ޚިދުމަތުގެ ފެންވަރު ރަނގަޅުކޮށް ޚިދުމަތް ހަރުދަނާކޮށްދިނުން ކަމަށެވެ. މިދަތުރުތައް ހިލޭ ކޮށްދޭ މުއްދަތުގައި، އެރަށެއްގެ ރަށު ކައުންސިލު މެދުވެރިކޮށް ފެރީން ޖާގަ ހޯދޭނެކަމަށް އެކުންފުނިން ވިދާޅުވެއެވެ.
"އިންޓަރގްރޭޓެޑް ނޭޝަނަލް ޕަބްލިކް ފެރީ ނެޓްވޯރކް" މަޝްރޫޢުގެ ފުރަތަމަ ފިޔަވަހި ސަރުކާރުން އެމްޓީސީސީއާއި ހަވާލުކުރެއްވީ 17 ޖެނުއަރީ 2021 ގައެވެ. މިޚިދުމަތް ދިނުމަށްހަމަޖެހިފައިވަނީ ރާއްޖެ 6 ޒޯނަކަށް ބަހާލައިގެންނެވެ.
މި މަޝްރޫޢުގެ ފޭސް 1 ގެ ދަށުން، ހއ. ހދ. އަދި ށ. އަތޮޅުގެ މީހުން ދިރިއުޅޭ 41 ރަށަށް މިހާރުވަނީ ރާއްޖެ ޓްރާންސްޕޯޓް ލިންކުގެ ހައި ސްޕީޑް ފެރީގެ ޚިދުމަތް ދޭން ފަށާފައެވެ. އަދި ޅ.އަތޮޅުގައިވެސް އާރްޓީއެލް ފެރީގެ ޚިދުމަތްވަނީ ފަށާފައެވެ.
ސަރުކާރުގެ އަމާޒަކީ މިއަހަރުގެ ނިޔަލަށް އާރް.ޓީ.އެލްގެ ފެރީ ޚިދުމަތް އެކި ސަރަހައްދުތަކަށް ފުޅާކޮށް، ހަރުދަނާ ދަތުރުފަތުރުގެ ނިޒާމަކުން މުޅި ރާއްޖެ ގުޅާލުމެވެ.