މި ރޯދަމަހުގެ ފުރަތަމަ 15 ނިމުނުއިރު ފުލުހުންގެ އިދާރާއަށް ހުށަހަޅައިފައިވާ މައްސަލަތަކުގެ ތެރޭގައި އެންމެ ގިނައީ ޓްރެފިކް އެކްސިޑެންޓް ގޮތުގައި ރިޕޯޓްކޮށްފައިވާ މައްސަލަތައްކަމަށް ފުލުހުންގެ ތަފާސްހިސާބުތަކުން ދައްކައިފިއެވެ.
ފުލުހުންގެ ފަރާތުން ޕީ.އެސް.އެމް ނިއުސްއާ ޙިއްޞާކުރި ތަފާސްހިސާބުތަކަށް ބަލާއިރު މި ރަމަޟާން މަހުގެ ފުރަތަމަ 15 ނިމުނުއިރު ފުލުހުންގެ އިދާރާއަށް ޓްރެފިކް އެކްސިޑެންޓުގެ ގޮތުގައި އެކަނިވެސް 175 މައްސަލަ ވަނީ ހުށަހަޅައިފައެވެ. މީގެތެރެއިން 151 އެކްސިޑެންޓް ރިޕޯޓްކޮށްފައިވަނީ މާލޭ ސަރަޙައްދުންނެވެ. މިދިޔަ އަހަރު ނިމުނުއިރު ޓްރެފިކް މައްސަލައިގެ ޖުމްލަ 1611 މައްސަލަ އެ އިދާރާއަށް ހުށަހަޅައިފައިވެއެވެ.
ފުލުހުންގެ އިދާރާއަށް އެކި ބާވައްތަކުގެ މައްސަލަ ހުށައަޅާއިރު، ޓްރެފިކް މައްސަލަތަކުގެ އިތުރުން މި ރަމަޟާންމަހުގެ ފުރަތަމަ 15 ގައި ދެން އެންމެ ގިނައިން ރިޕޯޓްކޮށްފައިވަނީ މަސްތުވާތަކެތީގެ މައްސަލަތަކެވެ. އެގޮތުން މާލެ ސަރަޙައްދުން އެކަނިވެސް މަސްތުވާތަކެތީގެ 66 މައްސަލަ ވަނީ ރިޕޯޓްކޮށްފައެވެ. އަދި އަތޮޅުތަކުން 101 މައްސަލަ ވަނީ ރިޕޯޓްކޮށްފައެވެ.
ރަމަޟާންމަހުގެ ފުރަތަމަ 15 އެންމެ ގިނައިން ހުށަހެޅުނު މައްސަލަތައް:
■ ޓްރެފިކް އެކްސިޑެންޓުގެ 175 މައްސަލަ
■ މަސްތުވާ ތަކެއްޗާގުޅޭ 167 މައްސަލަ
■ ޙަމަލާދިނުމުގެ 77 މައްސަލަ
■ ބިރުދެއްކުމުގެ 44 މައްސަލަ
■ ގެވެށި އަނިޔާގެ 19 މައްސަލަ
މި މުއްދަތުގައި އަތޮޅުތަކުގެ ތެރެއިން އެންމެ ގިނައިން މައްސަލަ ރިޕޯޓްކޮށްފައިވަނީ އދ. އަތޮޅުންނެވެވެ. މި އަތޮޅުން 21 މައްސަލަ ހުށައަޅާފައިވާއިރު މީގެ ތެރޭގައި އެންމެ ގިނައީ މަސްތުވާތަކެތީގެ މައްސަލައެވެ. ދެން އެންމެ ގިނަ މައްސަލަ ހުށައަޅާފައިވަނީ އައްޑޫ ސިޓީއިންނެވެ. އައްޑޫސިޓީއިން ޖުމްލަ ޖުމްލަ 17 މައްސަލަ ހުށައަޅާފައިވެއެވެ. މީގެތެރޭގައި ގިނައީ ޓްރެފިކް މައްސަލަތަކެވެ. މީގެ އިތުރުން ފުވައްމުލައް ސިޓީއިން 16 މައްސަލައެއް ވަނީ ހުށައަޅާފައެވެ. މި އަތޮޅުން އެންމެ ގިނައިން ރިޕޯޓްކޮށްފައިވަނީ ބިރުދެއްކުމުގެ މައްސަލައެވެ.
ކޮންމެ އަހަރެއްގެވެސް ރަމަޟާންމަހަކީ ކުށްކުރުން އިތުރު މަހަކަށްވާތީ، މި އަހަރުގެ ރަމަޟާންމަހާ ދިމާކޮށް ފުލުހުން ވަނީ މާލެތެރެ ޕެޓްރޯލް ކުރުމުގެ ކަންކަން ހަރުދަނާކޮށްފައެވެ. އެގޮތުން މާލެތެރޭގެ އެކި ސަރަޙައްދުތަކަށް ޚާއްޞަ ސަމާލުކަމެއް ދީގެން ބެލެހެއްޓުމުގެ މަސައްކަތް ފަށާފައިވާކަމަށް ފުލުހުން ވިދާޅުވެއެވެ. އަދި މިފަދަ ކަންކަމަށް ޢާއްމުން ސަމާލުވުމަށްވެސް ފުލުހުންވަނީ އިލްތިމާސްކުރައްވާފައެވެ.
މީގެ އިތުރުން ކުށް މަދުކުރުމަށް އަތޮޅުތަކުގެ ޕޮލިސް ސްޓޭޝަންތަކުން ކައުންސިލްތަކާ ގުޅިގެން ދަނީ ތަފާތު މަސައްކަތްތައް ކުރަމުންނެވެ. ވަކިން ޚާއްޞަކޮށް އެކްސިޑެންޓްތައް މަދުކުރުމަށްޓަކައި، ތަފާތު އެކި ޕްރޮގުރާމުތައް ހިންގައި، އާންމުންގެ ހޭލުންތެރިކަން އިތުރުކުރުމަށް ގިނަ ޙަރަކާތްތަކެއް ފުލުހުން ގެންދަނީ ހިންގަމުންނެވެ.