އަތޮޅުތަކުގެ ރަށްތަކަށް އެމްބިއުލާންސް ހޯއްދަވައިދެއްވުމަށް ކުރައްވާ މަސައްކަތުގެ ދަށުން، މިހާތަނަށް 127 ރަށަކަށް އެމްބިއުލާންސް ފޮނުއްވައިފައިވާކަމަށް ސަރުކާރުން ވިދާޅުވެއްޖެއެވެ.
ރާއްޖޭގެ ޞިއްޙީ ޚިދުމަތުގެ ފެންވަރު ރަނގަޅުކުރުމަށް ސަރުކާރުން ކުރައްވާ މަސައްކަތުގެ ދަށުން އަތޮޅުތަކުގެ ޞިއްޙީ ޚިދުމަތުގެ ފެންވަރު މަތިކުރައްވައި ބޭނުންވާ ވަޞީލަތްތައް އިތުރުކުރެއްވުމަށް ގެންދަވަނީ ގިނަ މަސައްކަތްތަކެއް ކުރައްވަމުންނެވެ.
ފެންވަރު ރަނގަޅު ޞިއްޙީ ޚިދުމަތާއި، އަވަސް ފަރުވާގެ ނިޒާމު ހަރުދަނާކުރެއްވުމަށް ކުރައްވާ މަސައްކަތުގެ ދަށުން ކުރެވޭ އެންމެ މުހިންމު އެއް މަސައްކަތަކީ ރަށްރަށަށް ބޭނުންވާ އެމްބިއުލާންސް ހޯއްދަވައިދެއްވުށް ސަރުކާރުން ކުރައްވާ މަސައްކަތެވެ.
ކުއްލި ޙާލަތްތަކުގައި އަވަސް ފަރުވާގެ ޚިދުމަތަށް ރަށްރަށުގައި އެންމެ އެކަށީގެންވާ ވަސީލަތްތައް ނެތުމަކީ މި ސަރުކާރު ވެރިކަމާ ހަވާލުވެވަޑައިގެންނެވިއިރު ޞިއްޙީ ދާއިރާއަށް ކުރިމަތިވެފައި އޮތް އެންމެ ބޮޑު އެއް މައްސަލައެވެ. ބަލި މީހުން އުފުލާނެ އެމްބިއުލާންސް ނެތުމުން ބައެއް ރަށްރަށުގައި ގާޑިއަލާއި ބަރޯގައިވެސް މީހުން އުފުލާފައި އެބަހުއްޓެވެ.
އެމްބިއުލާންސް ނެތް ރަށްރަށަށް އެމްބިއުލާންސް ހޯއްދަވައިދެއްވުމަށް ސަރުކާރުން ފަށްޓަވައިފައިވާ މަސައްކަތަކީ މާލެއެކޭ އެއްގޮތަށް ރަށްރަށުގައި އުޅޭ ރައްޔިތުންނަށް ވެސް ފެންވަރު ރަނގަޅު ޞިއްޙީ ޚިދުމަތް ޔަޤީންކޮށްދިނުމަށް ސަރުކާރުން ކުރައްވާ ވަރަށް މުހިއްމު މަސައްކަތެކެވެ.
ރައީސް އޮފީހުގައި ބުރާސްފަތިދުވަހު ބޭއްވި ނޫސްވެރިންގެ ބައްދަލުވުމުގައި ރައީސް އޮފީހުގެ ތަރުޖަމާން މިިއުވާން މުޙައްމަދު ވިދާޅުވީ ސަރުކާރު ވެރިކަމާއި ހަވާލުވިއިރު ބައެއް ރަށްރަށުގައި އެމްބިއުލާންސް ނެތްކަމަށާއި، އަދި ބައެއް ރަށްރަށުގައި ހުރި އެމްބިއުލާންސްތައް ހުރީ ބޭނުންނުކުރެވޭ ހާލަތުގައިކަމަށެވެ.
މިއުވާން ވިދާޅުވީ ރައީސުލްޖުމްހޫރިއްޔާގެ އޮފީހުން ގެންދިޔައީ އެމްބިއުލާންސް ބޭނުންވާ ރަށްރަށުގެ ކަންކަން ވަރަށް ގާތުން ބަލަމުންކަމަށެވެ. އަދި އެމްބިއުލާންސް ނެތް ރަށްތަކާއި އެމްބިއުލާންސް ބޭނުންނުކުރެވޭ ހާލަތުގައި ހުރި ރަށްރަށަށް އެމްބިއުލާންސް ފޯރުކޮށްދީފައިވާކަމަށްވެސް މިއުވާން ވިދާޅުވިއެވެ.
މިއުވާން ވިދާޅުވީ ގޮތުގައި އަވަސް ފަރުވާ ނިޒާމް ހަރުދަނާ ކުރުމަކީ ކުރިން މާބޮޑު ސަމާލުކަމެއް ދީފައިވާ އޮތް ދާއިރާއެއް ނޫންކަމަށެވެ. ނަމަވެސް މި ސަރުކާރުން ހާއްސަ އިސްކަމެއްދީގެން އެ މަސައްކަތްކުރަމުންދާކަމަށްވެސް މިއުވާން ވިދާޅުވިއެވެ.
"މި ދައުރުގައި 127 ރަށަކަށް އެމްބިއުލާންސް ފޯރުކޮށްދީފިން. މީގެކުރިން އެމްބިއުލާންސްއެއް ނެތް ރަށްރަށަށް އެމްބިއުލާންސް ފޯރުކޮށްދެވިއްޖެ. އެމްބިއުލާންސްގެ ނަމުގައި އެކި ކަހަލަ ވެހިކަލްތައް ބޭނުންކުރަމުން ދިޔަ ރަށްތައް ހުރި." މިއުވާން ވިދާޅުވިއެވެ.
މިއުވާން ވިދާޅުވީ ޖަޕާނުން ރާއްޖެއަށް ހަދިޔާކުރާ 8 ޕެރަމެޑިކް އެމްބިއުލާންސް ވަރަށް އަވަހަށް ލިބޭނެކަމަށެވެ. މި އެމްބިއުލާންސްތަކުގެ އިތުރުން، ސަރުކާރުން އެސްޓީއޯއާ ހަވާލުކޮށްގެން ގެންނަ 20 އެމްބިއުލާންސެއް 3 މަސްތެރޭގައި ލިބޭނެކަމަށްވެސް މިއުވާން ވިދާޅުވިއެވެ.
މިއުވާން ވިދާޅުވީ މި އެމްބިއުލާންސްތައް ފޯރުކޮށްދޭނީ އެމްބިއުލާންސްގެ ބޮޑެތި މަރާމާތުތައް ކުރަންޖެހިފައި ރަށްތަކަށްކަމަށެވެ.
އެމްބިއުލާންސް ފޯރުކޮށްދިނުމުގެ މަސައްކަތުގައި އެންމެ ފުރަތަމަ ބެޗުގައި 96 އެމްބިއުލާންސް ގެނައުމަށް އެސްޓީއޯއާ ހަވާލުކުރީ 2021ވަނަ އަހަރު ޖޫން މަހުއެވެ. އެ އެމްބިއުލާންސްތައް މިދިޔަ އަހަރުގެ އޭޕްރިލްގެ ނިޔަލަަށް ރާއްޖެ ގެނެސް، އެވަގުތަށް އެންމެ ބޭނުންޖެހިފައިވާ ރަށްތަކަށް ފޮނުވާ މިހާރު އަންނަނީ ބޭނުންކުރަމުންނެވެ.
އަލަށް ގެންނަ އެމްބިއުލާންސްތައް ފަރުމާކޮށްފައިވަނީ، ފަސޭހައިން ބަލިމީހާ އުފުލާ އަދި، އެމްބިއުލާންސް ތެރޭގައި ސިއްޙީ އެހީތެރިންނަށް ބަލި މީހާއަށް ފަރުވާދެވޭނެގޮތަށް ޖާގަ ތަނަވަސްކޮށެވެ.