ހުޅުމާލޭގައި ކާރަކާއި ސައިކަލެއް ޖެހި ނުރައްކާތެރި އެކްސިޑެންޓެއް ހިނގައިފިއެވެ.
ފުލުހުން ވިދާޅުވީ، ހުޅުމާލޭގެ ފޭސް 2 ގެ ނިރޮޅުމަގުގައި ކާރަކާއި ސައިކަލެއްޖެހި އެކްސިޑެންޓެއް ހިނގައިފައިވާ ކަމަށެއެވެ. މި އެކްސިޑެންޓުގައި ސައިކަލު ދުއްވަން އިން 18 އަހަރުގެ ފިރިހެނަކަށް އަނިޔާވެފައިވާ ކަމަށެވެ.
އެކްސިޑެންޓުގައި ޒަޚަމްވި ޒުވާނާގެ ސިކުނޑިއަށް ލޭ އެޅިފައިވާތީ، ހުޅުމާލޭ ހޮސްޕިޓަލުގައި ފަރުވާ ދިނުމަށްފަހު، އޭނާ އޭ.ޑީ.ކޭ ހޮސްޕިޓަލަށް ބަދަލުކުރުމުގެ މަސައްކަތް ކުރަމުންދާ ކަމަށް ފުލުހުން ވިދާޅުވެއެވެ.
މި އެކްސިޑެންޓު ހިނގިކަމުގެ މަޢުލޫމާތު ފުލުހުންނަށް ލިބިފައިވަނީ މިއަދު މެންދުރު 11:45 ހާއިރެވެ. މި ޙާދިސާއާ ގުޅިގެން ބަލަންޖެހޭ ކަންކަން ބަލައި މައްސަލަ އިތުރަށް ތަޙުޤީޤު ކުރަމުންދާ ކަމަށް ފުލުހުން ވިދާޅުވިއެވެ.
ފަހަކަށް އައިސް މަގުމަތީގައި އެކްސިޑެންޓްތައް ހިނގާ މިންވަރު ރާއްޖޭގައި އަންނަނީ އިތުރުވަމުންނެވެ. މިކަމާގުޅިގެން އެކްސިޑެންޓްތައް ހިނގާ މިންވަރު މަދުކޮށް، މަގުމަތީގެ ސަލާމަތާއި ރައްކާތެރިކަމާއި، ޓްރެފިކް ޤާނޫނުތަކަށް އާއްމުން ހޭލުންތެރިކުރުމަށް ކަމާބެހޭ ފަރާތްތަކުން ދަނީ މަސައްކަތްކުރަމުންނެވެ.