ސަރުކާރުން އިސްނަންގަވައިގެން ސިޔާސީ ޕާޓީތަކާއި އެކު އަލުން ފަށްޓަވާ މަޝްވަރާތަކުގެ ފުރަތަމަ ބައްދަލުވުން މަދަމާރޭ އަށްގަޑި ތިރީހުގައި ބާއްވަވާގޮތަށް ސަރުކާރުން ނިންމަވައިފިއެވެ.
ޕީއެސްއެމަށް މަޢުލޫމާތު ދެއްވަމުން ރައީސުލްޖުމްހޫރިއްޔާގެ އޮފީހުގެ ތަރުޖަމާން އިބްރާހީމް މުޢާޒް ޢަލީ ވިދާޅުވީ، މަޝްވަރާތަކުގައި ބައިވެރިވުމަށް ސިޔާސީ 6 ޕާޓީއަކަށް މިއަދު ދައުވަތު ފޮނުއްވަވާފައިވާކަމަށެވެ. އެއީ ސަރުކާރު ކޯލިޝަންގައި ހިމެނޭ ޕީޕީއެމާއި އެމްޑީއޭގެ އިތުރުން ޖުމްހޫރީ ޕާޓީއާއި ޑީއާރުޕީ އަދި އިދިކޮޅު އެމްޑީޕީ އާއި އަދާލަތު ޕާޓީއެވެ.
މުޢާޒް ވިދާޅުވީ، މިދިޔަ އަހަރު ކުރިއަށް ގެންދެވުނު މަޝްވަރާތަކާ ޚިލާފަށް މިފަހަރުގެ މަޝްވަރާތައް ކުރިއަށް ގެންދިއުމަަށް ހަމަޖެހިފައިވަނީ ހުރިހާ ސިޔާސީ ޕާޓީތަކެއް އެއް މޭޒެއްގެ ދޮށުގައި ތިބެގެންކަމަށެވެ. މި މަޝްވަރާ ބައްދަލުވުމުގައި ކޮންމެ ސިޔާސީ ޕާޓީއަކުންވެސް 2 މަންދޫބަކު ބައިވެރިވާނެކަމަށް މުއާޒް ވިދާޅުވިއެވެ. އަދި މިހާތަނަށް އެއްވެސް ސިޔާސީ ޕާޓީއަކުން ސަރުކާރުން ފޮނުއްވެވި ދަޢުވަތު ޤަބޫލްނުކުރާކަން ރަސްމީކޮށް ސަރުކާރަށް އަންގާފައި ނުވާކަމަށެވެ.
ސަރުކާރުން ސިޔާސީ 6 ޕާޓީއާއި އެކު ކުރިއަށް ގެންދަވާ މަޝްވަރާތަކުގައި ބައިވެރިވާނެ ފަރާތްތަކުގެ ނަންތައް ސަރުކާރު ހިންގާ ކޯލިޝަންގެ ޕީޕީއެމާއި އެމްޑީއޭގެ އިތުރުން ޖުމްހޫރީ ޕާޓީން ވަނީ ސަރުކާރަށް ފޮނުއްވަވާފައެއެވެ. އެގޮތުން ޕީޕީއެމްގެ ފަރާތުން މަޝްވަރާތަކުގައި ބައިވެރިވެ ވަޑައިގަންނަވަނީ ޕީޕީއެމްގެ ނާއިބު ރައީސް ޢަބްދުއްރަޙީމް ޢަބްދުﷲ އާއި، ޕާލިމަންޓްރީ ގްރޫޕްގެ ލީޑަރު އަޙްމަދު ނިހާން ހުޞައިން މަނިކުއެވެ. އަދި ޖުމްހޫރީ ޕާޓީގެ ފަރާތުން ބައިވެރިވެ ވަޑައިގަންނަވަނީ އެޕާޓީގެ ލީޑަރު ޤާސިމް އިބްރާހިމާއި ޕާލިމަންޓްރީ ގްރޫޕްގެ ނާއިބު ލީޑަރު، ކިނބިދޫ ދާއިރާގެ މެމްބަރު ޢަބްދުﷲ ރިޔާޒްއެވެ. މަޝްވަރާތައް ފެއްޓެވުމަށް ރައީސް ޔާމިން ނިންމެވީ ދިވެހި ރާއްޖެ ތަރައްޤީކުރެއްވުމަށާއި ޤައުމު ބިނާކުރެއްވުމަށް ކުރައްވާ މަސައްކަތް ހަލުވިކުރައްވައި، ރައްޔިތުންގެ އެއްބައިވަންތަކަށް އިތުރުކުރެއްވުމަށް ކަމަށެވެ.
ސަރުކާރުގެ ފަރާތުން އެންމެ އިސް މަންދޫބެއްގެ ގޮތުގައި މަޝްވަރާތަކަށް ކަނޑައަޅުއްވާފައިވާ ފިޝަރީޒް މިނިސްޓަރ ޑރ. މުޙައްމަދު ޝައިނީ ވިދާޅުވުވެފައިވަނީ މަޝްވަރާގެ މޭޒުގައި ސަރުކާރުން އިށީންނަވަނީ އެއްވެސް ޝަރުތެއް އެޖެންޑާއެއް ނެތި އިޚްލާޞްތެރިކަމާ އެކުކަމަށެވެ. އަދި ކޮންމެ ގޮންޖެހުމަކާ އެކުވެސް މަޝްވަރާތައް ކުރިޔަށް ގެންދެވުމަށް ސަރުކާރުން ތައްޔާރަށް އޮތްކަމަށްވެސް ޑރ. ޝައިނީ ވިދާޅުވެއެވެ.
އިދިކޮޅު އެމްޑީޕީއާއި ދަލާތު ޕާޓީ ބުނަމުން އަންނަނީ އެ ދެޕާޓީން މަޝްވަރާތަކުގައި ބައިވެރިވާނީ ސިޔާސީ ކުށްވެރިން ދޫކޮށްލުމުންކަމަށެވެ. އެހެންނަމަވެސް ރަސްމީކޮށް ބައިވެރި ނުވާނެކަން އެއްވެސް ޕާޓީއަކުން ސަރުކާރާ ހިއްސާކުރައްވާފައެއްނުވެއެވެ.