ރާއްޖޭގެ ކޮންމެ ރަށެއްގައި ހުރެގެންވެސް ޑިޖިޓަލް ލައިސަންސްގެ ޚިދުމަތް ހޯދޭނެ އިންތިޒާމު ޓްރާންސްޕޯޓް މިނިސްޓްރީން ހަމަޖައްސަވައިފިއެވެ.
ޓްރާންސްޕޯޓް މިނިސްޓްރީން ވިދާޅުވީ އެ މިނިސްޓްރީން ތަޢާރުފްކުރައްވައިފައިވާ ސިމްސް އޮންލައިން ޕޯޓަލް މެދުވެރިކޮށް މިދިޔަ ފެބްރުއަރީމަހުން ފެށިގެން މިހާތަނަށް 25000 އެޕްލިކޭޝަނަށް ޚިދުމަތް ދެއްވާފައިވާ ކަމަށެއެވެ. އަދި މި ޕޯޓަލްއިން އަތޮޅުތަކުގައި "އޭ" ޒޯން ލައިސަންސް ދިނުމަށް ކަނޑައަޅާފައިވާ ހުރިހާ ކައުންސިލްތަކުން ވެސް މި ޅޚިދުމަތް ދޭން ފަށާފައިވާކަން ޓްރާންސްޕޯޓް މިނިސްޓްރީން ހާމަކުރައްވައެވެ.
ޓްރާންސްޕޯޓް މިނިސްޓްރީން ވިދާޅުވީ މި ޕޯޓަލްއަކީ އަލަށް ތައާރުފްކުރެއްވި ޕޯޓަލްއެއްކަމުން ބައެއް ޙާލަތްތަކުގައި އެކިއެކި ދަތިތަކާ ކުރިމަތިވުމަކީ އެކަށީގެންވާ ކަމެއްކަމަށެއެވެ. އަދި މިގޮތަށް ދިމާވާ މައްސަލަތައް ޙައްލުކުރެއްވުމަށް މަސައްކަތް ކުރައްވަމުން ގެންދަވާ ކަމަށާއި މި ފަދަ އެއްވެސް މައްސަލައެއް ދިމާވެއްޖެނަމަ އެ މިނިސްޓްރީއަށް ގުޅައި އެކަމެއް ޙިއްޞާކުރުމަށް އެދިވަޑައިގަންނަވާ ކަމަށްވެސް ޓްރާންސްޕޯޓް މިނިސްޓްރީން ވިދާޅުވެއެވެ.
އެއްގަމުގައި ދުއްވާ އިންޖީނުލީ އުޅަނދުފަހަރު ދުއްވުމުގެ ލައިސަންސް ރައްކާތެރިކަމާއި ފަސޭހަކަމާއެކު ރައްޔިތުންނަށް ހޯއްދަވައިދެއްވުމުގެ މަގު ފަހިކުރެއްވުމަށްޓަކައި މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނިން އަލަށް ތަޢާރުފްކުރެއްވި "ސިމްސް" ޕޯޓަލަކީ ކޮންމެ މީހަކަށްވެސް އެ މީހެއްގެ އީ ފާސް އެކައުންޓް ބޭނުންކޮށްގެން ފަސޭހަކަމާއެކު ޚިދުމަތް ހޯދޭގޮތަށް ފަރުމާކޮށްފައިވާ ޚިދުމަތެކެވެ.
ސިމްސް ޕޯޓަލް ބޭނުންކޮށްގެން ދިވެހި ރައްޔިތުންނަށާއި އަދި ރާއްޖޭގައި ވަޒީފާ އަދާކުރާ ބިދޭސީންނަށް ވެސް ދުނިޔޭގެ ކޮންމެތާކު ތިބެގެން ވެސް ޚިދުމަތް ލިބޭނެއެވެ.
ޓްރާންސްޕޯޓް މިނިސްޓްރީން ވިދާޅުވީ މި ޚިދުމަތަކީ މިހާރު ރައްޔިތުން ބަލައިގެންފައިވާ، ފަސޭހަ އަދި ރައްކާތެރި ޚިދުމަތަކަށް ވުމާއެކު މި ޚިދުމަތުގެ ތެރެއިން ކޮންމެ މީހަކަށްވެސް ޑިޖިޓަލް ލައިސަންސް ލިބޭނެގޮތަށް ކަންކަން ހަމަޖެހިފައިވާ ކަމަށެވެ.
ޑިޖިޓަލް ލައިސަންސާއެކު އުޅަނދު ދުއްވާ މީހުންނަށް ވަނީ ބޮޑު ލުޔެއް ލިބިފައެވެ. އެގޮތުން ލައިސަންސް ކާޑު ގެއްލުމާއި އަދި އަބަދުވެސް އަތުގައި ލައިސަންސް ގެންގުޅެންޖެހުމުގެ ބުރައަށް ޑިޖިޓަލް ލައިސަންސް ޚިދުމަތާއެކު ވަނީ ލުއިލިބިފައެވެ.