އިންޖިނިއަރިންގއާއި، އާކިޓެކްޗަރ ކޯސްތައް އޮންލައިންކޮށް ކިޔަވައިދިނުން ބަލައިނުގަނެވޭނެ: އެމްކިއުއޭ
އިންޖިނިއަރިންގއާއި، އާކިޓެކްޗަރ ޕްރޮގްރާމްތައް އޮންލައިންކޮށް ކިޔަވައިދިނުން އެއްވެސްވަރަކަށް ބަލައި ނުގަނެވޭނެކަމަށް މޯލްޑިވްސް ކޮލިފިކޭޝަން އޮތޯރިޓީން ވިދާޅުވެއްޖެއެވެ. އެ އޮތޯރިޓީން މިހެން ވިދާޅުވީ، މި ދާއިރާގެ ބައެއް ކޯސްތައް އޮންލައިންކޮށް ކިޔަވައިދޭކަން ފާހަގަކުރެވުމާއި ގުޅިގެން ނެރުއްވި ބަޔާނުގައެވެ.
މޯލްޑިވްސް ކޮލިފިކޭޝަން އޮތޯރިޓީއިން ނެރުއްވި ބަޔާނުގައި ވަނީ، އިންޖިނިއަރިންގ އަދި އާކިޓެކްޗަރ ދާއިރާގެ މަތީ ތަޢުލީމުގެ ޕްރޮގްރާމްތައް އީ-ލަރނިންގ ޑެލިވަރީ މޮޑަލިޓީން ކިޔަވައިދިނުމާ ބެހޭ ގޮތުން އެ ދާއިރާގެ ރެގިއުލޭޓަރީ އިދާރާ ކަމުގައިވާ މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ އިން ނިންމާ އަނގާފައިވާކަމަށެވެ. އަދި "އާކިޓެކްޗަރ އަދި އިންޖިނިއަރިންގ" ޕްރޮގްރާމްތަކަކީ ޓެކްނިކަލް އަދި ފިޒިކަލް ޙަރަކާތްތަކެއް އެކުލެވިގެންވާ ޕްރޮގްރާމްތަކަކަށް ވުމާއި، އާންމުގޮތެއްގައި މި ޕްރޮގްރާމްތަކަކީ އޮންލައިންކޮށް ކިޔަވައިދޭ ޕްރޮގްރާމްތަކަކަށް ނުވާތީ އެއްވެސް ވަރަކަށް މި ޕްރޮގްރާމްތައް އަދި ޕްރޮގްރާމްތަކުގެ ވަކި މޮޑިއުލް އަދި މޮޑިއުލެއްގެ ބައެއް ވެސް އަދި ވަކި ލެވެލެއްގެ ޕްރޮގްރާމެއް އީ-ލަރނިންގ މޮޑަލިޓީގެ ދަށުން ކިޔަވައި ދިނުމަށް މިވަގުތު ނުފެންނަކަމަށް އަނގާފައިވާކަމަށް އެމްކިއުއޭ އިން ވިދާޅުވިއެވެ.
މޯލްޑިވްސް ކޮލިފިކޭޝަން އޮތޯރިޓީ ގެ އީ-ލަރނިންގ ގައިޑްލައިން ގައި، އެ ދާއިރާގެ ޤާނޫނީ ބާރުލިބިފައިވާ ކައުންސިލްތަކާއި، ކަމާބެހޭ ރެގިއުލޭޓަރީ އިދާރާ ތަކުން އީ-ލަރނިންގ ޑެލިވަރީ މޮޑަލިޓީން ކިޔަވައިދިނުމަށް ވަކި ގޮތަކަށް ހުއްދަ ނުދޭހާ ހިނދަކު، އީ-ލަރނިންގ ޑެލިވަރީ މޮޑަލިޓީން ކިޔަވައިނުދެވޭނެ ކަމަށް މިހާތަނަށް ކަނޑައަޅާފައިވާ 8 ދާއިރާގެ ތެރޭގައި އިންޖިނިއަރިންގ އަދި އާކިޓެކްޗަރ ދާއިރާ ހިމެނޭނެކަމަށްވެސް އެމްކިއުއޭ އިން ވިދާޅުވިއެވެ.
އެމްކިއުއޭއިން މީގެ ކުރިން އޮންލައިންކޮށް ނުވަތަ އީ ލާރނިންގ މެދުވެރިކޮށް ކިޔަވައި ނުދެނޭކަމަށް ނިންމާފައިވާ އިތުރު ދާއިރާތަކުގެ ތެރޭގައި މެޑިސިން އެންޑް ޑެންޓިސްޓްރީ، ނަރުސްކަން، ޤުރުއާނުގެ ކޯސްތައް، ޓެކްނިކަލް އެންޑް ވޮކޭޝަނަލް ދާއިރާގެ ކޯސްތައް، އަދި ޓީޗިންގ ފަދަ ދާއިރާތައް ހިމެނެއެވެ.