ބިންހެލުމާ ގުޅިގެން ރާއްޖެއަށް މިވަގުތު މާ ބޮޑު ބިރުވެރިކަމެއް ނެތް ކަމަށް ނޭޝަނަލް ޑިޒާސްޓަރ މެނޭޖްމަންޓް ސެންޓަރުން ވިދާޅުވެއްޖެއެވެ.
އެސެންޓަރުން ވިދާޅުވީ ބިންހެލުމާއި ބެހޭ މަޢުލޫމާތު ސަރަހައްދީ 3 ސެންޓަރެއް މެދުވެރިކޮށް ބަލަމުންދާކަމަށާއި، އެސެންޓަރުން އޮތީ އެފަދަ ހާލަތެއް ދިމާވެދާނެކަމަށް ބަލައި ފުރިހަމައަށް ތައްޔާރުވެގެން ކަމަށެވެ.
ޑިފެންސް މިނިސްޓަރ އާދަމް ޝަރީފް ވިދާޅުވީ، ބިންހެލުމާއި ގުޅިގެން ރާއްޖޭގެ ހުރިހާ ސަރަހައްދެއްގައި ތިބި ސިފައިން މިހާރުތިބީ ތައްޔާރީ ހާލަތުގައި ކަމަށެވެ. އަދި ބިންހެލުމާއި ގުޅިގެން ކުރިމަތިވެދާނެ ޙާލަތަކަށް ބަލާ ރާއްޖޭގެ ހުރިހާ ސަރަހައްދެއްގައި ހުރި ސިއްހީ ޚިދުމަތް ދޭ ތަންތަންވެސް ކުއްލި ހާލަތަށް ގެނެސްފައިވާކަމަށެވެ. އަދި ބަލިމަޑު ކަމެއް ފެތުރިދާނެކަމަށްޓަކައި ސިއްހީ ޚިދުމަތްދޭ ތަންތަންވެސް ތައްޔާރީ ޙާލަތަށް ގެނެވިފައިކަމަށް ޑިފެންސް މިނިސްޓަރ ވިދާޅުވިއެވެ.
ބިންހެލުމާއި ގުޅިގެން ރައްޔިތުން އެއްވެސް ފިޔަވަޅެއް އަޅަން ޖެހޭނަމަ ކައުންސިލްތައް މެދުވެރިކޮށް މަޢުލޫމާތުތައް ފޯރުކޮށްދެމުން ގެންދާނެކަމަށްވެސް ނޭޝަނަލް ޑިޒާސްޓަރ މެނޭޖްމަންޓް ސެންޓަރުން މަޢުލޫމާތުދެއްވައެވެ. އަދި ބިންހެލުމާއި ގުޅިގެން މުވާސަލާތީ ވަސީލަތްތައްވެސް ތައްޔާރީ ޙާލަތަށް ގެނެވިފައިވާކަމަށް ޑިފެންސް މިނިސްޓަރ ވިދާޅުވިއެވެ.
މީގެ އިތުރުން، ޢާންމު ރައްޔިތުން ގޮނޑުދޮށަށް ނުދިއުމަށާއި ގޮނޑުދޮށާއި ވީހާވެސް ދުރުހިސާބެއްގައި ތިބުމަށް ޑިޒާސްޓަރ މެނޭޖްމަންޓުން އިލްތިމާސްކުރައްވައެވެ. އަދި ޢާންމު ރައްޔިތުން މިވަގުތު ހާސްވެ ކަންބޮޑު ނުވުމަށްވެސް ޑިފެންސް މިނިސްޓަރ ވަނީ އިލްތިމާސް ކުރައްވާފައެވެ. އަދި ދިމާވެދާނެ ހާދިސާއަކަށް ޑިޒާސްޓަރ މެނޭޖްމަންޓް ސެންޓަރާއި ދިފާއީ ބާރުތަކުން ފުރިހަމައަށް ތައްޔާރަށް ތިބިކަމަށްވެސް ޑިފެންސް މިނިސްޓަރ ވަނީ ވިދާޅުވެފައެވެ.