757 މީހުންގެ އާބާދީގެ ތ. ގާދިއްފުށްޓަކީ އިހުގައި މަސްވެރި ރަށެއް ނަމަވެސް މިހާރު މަސްވެރިކަން އެއްކޮށްހެން ހުއްޓިފައި އޮތް ރަށެކެވެ. ރަށުގެ ބޮޑު އާބާދީއެއް ވެރިރަށް މާލެއަށް ހިޖުރަކޮށްފައިވުމާއެކު، ގިނަ މީހުން އުޅެނީވެސް މާލެ ވަޒީފާތަކުގައި ނޫނި ފަތުރުވެރިކަމުގެ ދާއިރާގައި އެކިއެކި ރިސޯޓްތަކުގައެވެ.
ރާއްޖޭގެ ގިނަ ރަށްރަށް ފަދައިން ގާދިއްފުށްޓަކީވެސް ރަށްގިރުމުގެ ބިރުވެރިކަން ދިމާވެފައިވާ ރަށަކަށްވުމެވެ. އެގޮތުން މި ރަށް ވަށައިގެން ބަލައިލިއަސް ފެންނަނީ ރަށްގިރުމުގެ ހިތާމަވެރި މަންޒަރެވެ. މި ރަށުގައި ރަށްގިރުމުގެ މައްސަލަ އެންމެ ބޮޑަށް ފާހަގަކުރެވެނީ ރަށުގެ ތުނޑީކޮޅު ސަރަހައްދުންނެވެ.
ތ. ގާދިއްފުއްޓަށް ރަށް ގިރުމުގެ މައްސަލަ ކުރިމަތިވާތާ ވިއްސަކަށް އަހަރު ވަނީ ވެފައެވެ. ގާދިއްފުއްޓަކީ 13 ހެކްޓަރުގެ ކުޑަ ރަށަކަށް ވުމާއެކު ރަށުގެ ހޭޅިފަށާއި ކައިރި ސަރަޙައްދުތަކުންވެސް ގޯތި ދޫކޮށްފައި އެބަހުއްޓެެވެ. ނަމަވެސް ރަށްގިރުމުގެ މައްސަލަ ކުރިމަތިވެ، ރަށުން ބޮޑު ސަރަހައްދެއް ވަނީ ގިރާފައެވެ. އެއާއެކު ދިޔަވަރު ބޮޑުވާ ގަޑިތަކުގައި މީހުން ދިރިއުޅޭ ގޭގެއާއި ހަމައަށްވެސް ރާޅު އަރައެވެ. އަދި މިކަމުގެ ސަބަބުން ރަށުގެ އެތައް ރުއްގަހެއްވެސް ވަނީ ވެއްޓި ހަލާކުވެގެން ގޮސްފައެވެ.
ޕީއެސްއެމް ނިއުސްއައް މައުލޫމާތު ދެއްވަމުން ގާދިއްފުށީގެ ކައުންސިލް މެމްބަރު މުހައްމަދު ޝަފީގް ވިދާޅުވި ވިއްސާރަ ވެ ނުވަތަ އުދައަރާ ދުވަސްކޮޅެއްނަމަ ރަށުގެ ރައްޔިތުން ތިބެނީ ބިރުވެރި ކަމެއްގެ ތެރޭގަކަމަށެއެވެ. ރައްގިރާ ހޭޅި ފަށުގައިވާ ގަސްތައްވެސް ވެޓި ނެތިގެން ގޮސްފައިވާކަމަށް ޝަފީގު ވިދާޅުވިއެވެ.
"ރަށުގެ ރައްޔިތުން ތިބެނީ ބިރުވެރިމެއްގެ ތެރޭގައި. ރައްގިރުމުގެ ބައެއް ގޭގޭގެ އިންވެސް ގެއްލިފައިވޭ. ކުނި ގޮނޑުގެ ގޮތުގައި ރަށުގައި ބޭނުންކުރި ސަރަޙައްދުވެސް ގިރާ އެކަމުގައިވެސް ބޮޑެތި ދަތިކަން ކުރިމަތިވިލާން ޖެހޭ" ޝަފީގް ވިދާޅުވިއެވެ.
ގާދިއްފުށީގެ ގޮނޑުދޮށް ހިމާޔަތްކުރުމުގެ މައްސަލަ ހައްލުކުރުމަށް މިނިސްޓްރީ އޮފް ނޭޝަނަލް ޕްލޭނިންގ ހައުސިން އެންޑް އިންފްރަސްޓްރަކްޗަރއިން އެމްޓީސީސީއަށް ހަވާލުކުރެއްވީ 2021 ވަނަ އަހަރުގެ ސެޕްޓެމްބަރުމަހުގެ ތެރޭގައެވެ.
މި މަޝްރޫޢުގެ ދަށުން ގާދިއްފުށީގެ ގިރާ ސަރަޙައްދު ޙިމާޔަތްކުރުމުގެ މަސައްކަތުގެ ދަށުން 500 މީޓަރުގެ ސަރަހައްދެއްގައި ރިވެޓްމަންޓް ޖެހުމާއި އަދި 15 މީޓަރުގެ ހުރަސް ތޮއްޓެއް ހަދާ މިހާރު ވަނީ ނިންމާލާފައެވެ. މި މަޝްރޫއުގެ ދަށުން 500 މީޓަރުގެ ސަރަޙައްދެއް ވަނީ ހިމާޔަތްކޮށްފައެވެ.
ގާދިއްފުށީގެ ކައުންސިލް މެމްބަރު މުހައްމަދު ޝަފީގް ވިދާޅުވީ ގޮނޑުދޮށް ހިމާޔަތް ކުރެވިގެން ދިއުމާއި ގުޅިގެން ރައްޔިތުން އެ ބިރުވެރިކަމުން ސަލާމަތް ވެފައިވާކަމަށެއެވެ. އަދި މަޝްރޫޢުއާ ދޭތެރޭ ރައްޔިތުން ވަރަށް ހިތްހަމަޖެހޭކަމަށްވެސް ޝަފީގު ވިދާޅުވިއެވެ. އަދި ގާދިއްފުށީގެ ރައްޔިތުންގެ ޒަމާންވީ އުދާސްތަކާއި ތަކުލީފަށް ބޮޑު ހައްލެއް ލިބި ރައްޔިތުންނަށް އުފާވެރިކަމާއި ތަސައްލީ ލިބިފައިވާކަމަށްވެސް ރަށު ކައުންސިލުން ފާހަގަކުރެއްވިއެވެ.
ތ. ގާދިއްފުށީ ގޮނޑުދޮށް ހިމާޔަތްކުރުމުގެ މަޝްރޫޢަކީ 19.13 މިލިއަން ރުފިޔާ ހަރަދުކޮށްގެން ސަރުކާރުން ކުރިއަށްގެންދެވި މަޝްރޫއުއެވެ.