މާލޭ ޢިއްޒުއްދީން މަގުގައި ހުންނަ "ކެފޭ ޑި ޕަބްލިކް" ތެރޭގައި މާރާމީ ހިންގާ، މީހަކަށް ތޫނު އެއްޗަކުން ޙަމަލާދީ ޒަޚަމްކުރި މައްސަލައިގައި ތުހުމަތުކުރެވޭ 5 މީހެއްގެ މައްޗަށް ދަޢުކުރުމަށް ކްރިމިނަލް ކޯޓަށް ހުށަހަޅައިފިއެވެ.
ޕްރޮސެކިއުޓަރ ޖެނެރަލްގެ އޮފީހުން ވިދާޅުވީ، މިއަހަރުގެ ޖެނުއަރީ މަހުގެ 14 ވަނަ ދުވަހުގެ މެންދަމު 00:35 ހާއިރު ޢިއްޒުއްދީން މަގުގައި ހުންނަ "ކެފޭ ޑި ޕަބްލިކް" ތެރޭގައި މާރާމާރީ ހިންގާ، މީހަކަށް ތޫނު އެއްޗަކުން ޙަމަލާ ދީ ޒަޚަމްކުރުމުގެ މައްސަލައިގައި ތުހުމަތުކުރެވޭ، ސ. މަރަދޫފޭދޫ، ރަށްދެބައިގެ، އިބްރާޙީމް ފައިޙް ނިޡާމު، ކޯޓު އަމުރެއްގެ ދަށުން ހައްޔަރުކުރުމަށް ފުލުހުން މަސައްކަތް ކުރައްވާފައިވާ ކަމަށެވެ. އެހެންނަމަވެސް އޭނާ ހޯދާ ނުފެނިގެން ފެބްރުއަރީ މަހުގެ 15 ވަނަ ދުވަހު ފުލުހުން އޭނާ ހޯދުމަށް މީޑިއާ މެދުވެރިކޮށް ޢިއުލާންކުރައްވާފައިވާ ކަމަށެވެ.
އެހެންނަމަވެސް އޭނާ ހޯދުމަށް އެކި ގޮތްގޮތުން ކުރި މަސައްކަތަށް ހުރަސްއަޅައި، އޭނާ ހައްޔަރުކުރިޔަ ނުދިނުމަށްޓަކައި އޭނާ ފޮރުވައިގެން ގެންގުޅުނު މައްސަލައިގައި ދެމީހެއްގެ މައްޗަށް ދަޢުވާކުރުމަށް މެއި މަހުގެ 30 ވަނަ ދުވަހު ކްރިމިނަލް ކޯޓަށް ހުށައަޅުއްވައިފައިވާކަމަށް ޕީޖީ އޮފީހުން ވިދާޅުވެއެވެ. މި މައްސަލައިގައި ދަޢުވާކުރުމަށް އެދި ހުށައަޅާފައިވަނީ ލ. ގަން، ތުނޑި، ނެވަރކޯން، ޢަބްދުﷲ ޖުނައިދާއި، ރ. ކަނދޮޅުދޫ، ފީރޯޒުގެ، މުޙައްމަދު ޝަބީބްގެ މައްޗަށެވެ.
ދިވެހިރާއްޖޭގެ ޤާނޫނުލްޢުޤޫބާތުގައި ކުށެއްކޮށްފައިވާ މީހަކު ހައްޔަރުކުރިޔަ ނުދިނުމަށް އޭނާ ފޮރުވުމަކީ ޤާނޫނީ ކުށެކެވެ. މި މާރާމާރީއާ ގުޅިގެން އިބްރާހީމް ފައިޙް ނިޡާމު ހައްޔަރުކުރައްވައި އޭނާގެ މައްޗަށް ދަޢުވާކުރެއްވުމަށް އޭޕްރީލް މަހުގެ 19 ވަނަ ދުވަހު ފުލުހުން ވަނީ ކްރިމިނަލް ކޯޓަށް ހުށައަޅުއްވައިފައެވެ.
އަދި ހަމަ މި މާރާމާރީއާ ގުޅިގެން ހ. ދިއްގާމާގެ، ޢަލީ ފާރިޟްއާއި، މއ. އާދިއްޕަރު، މާއިން މުޙައްމަދު ޢަޒީމްގެ މައްޗަށް ދިވެހިރާއްޖޭގެ ޤާނޫނުލްޢުޤޫބާތުގެ 120 ވަނަ މާއްދާގެ ދަށުން ގައިގައި އަތްލުމުގެ ކުށުގެ ދަޢުވާ ކުރުމަށް މާރިޗު މަހުގެ 30 ވަނަ ދުވަހު ކްރިމިނަލް ކޯޓަށް ހުށައަޅުއްވައިފައިވާކަމަށް ޕީޖީ އޮފީހުން ވިދާޅުވެއެވެ.
ދިވެހިރާއްޖޭގެ ޤާނޫނުލްޢުޤޫބާތުގައި ބަޔާންކޮށްފައިވާ ގޮތުން، ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނުގެ ދަށުން، ނުރައްކާތެރި ހަތިޔާރެއް ބޭނުންކޮށްގެން މާރާމާރީ ހިންގުމާއި، ގައިގާ އަތްލުމާއި، ޤާނޫނު ތަންފީޛްކުރާ މުވައްޒަފެއްގެ މަސައްކަތަށް ޤަޞްދުގައި ހުރަސްއެޅުމަކީ މަނާކަމެކެވެ.