ބޮޑެތި ބަދަލުތަކަކާއެކު އެސްޓީއޯ ޕީޕަލްސް ޗޮއިސް ސުޕަރ މާކެޓު ބޮޑުކޮށް ހުޅުވާފައިވަނީ މިދިޔަ އަހަރުގެ މާރޗްމަހުގެ 15 ވަނަ ދުވަހުއެވެ.ބޮޑެތި ބަދަލުތަކަކާއެކު އެސްޓީއޯ ޕީޕަލްސް ޗޮއިސް ސުޕަރ މާކެޓު ބޮޑުކޮށް ހުޅުވިއިރު އެ ތަނުގައި މިހާރު އާންމު ވިޔަފާރިތަކަށް އެމީހުންގެ އުފެއްދުންތައް ވިއްކޭނެ އިންތިޒާމް ވަނީ ހަމަޖައްސަދީފައެވެ. މީގެތެރޭގައި ބޭކަރީތަކާއި، ބުކްޝޮޕްތައް އަދި ރީތިވުމަށް ބޭނުންވާ ސާމާނާއި، ކުޑަކުދިން ކުޅޭ ސާމާނު ވިއްކާ ފަރާތްތަކުން އަންނަނީ ތަކެތި ވިއްކަމުންނެވެ.
ސުޕަރމާރޓްއަށް ގެނައި ބަދަލުތަކާއިއެކު އަލުން އެތަން ހުޅުވުމުގެ ސަބަބުން ވިޔަފާރިކުރާ މީހުންގެ އަދަދު 2 ގުނަ އިތުރުވެފައިވާކަމަށް އެސްޓީއޯއިން ބުނެއެވެ. އެސްޓީއޯގެ ވިސްނުން ހުރީ އެތަން މޯލްއެއްގެ ގޮތުގައި ތަރައްޤީކޮށް ހުރިހާ ބާވަތެއްގެ މުދާ އެއްތަނަކުން ފަސޭހައިން ލިބޭނެ މަގު ފަހިކޮށްދިނުމެވެ. އެގޮތުން ސުޕަރމާރޓްގެ ފުރަތަމަ ފަންގިފިލާގެ މަސައްކަތް މިހާރު އެސްޓީއޯއިން އަންނަނީ ބާރު ސްޕީޑްގައި ކުރަމުންނެވެ.
އެސްޓީއޯގެ މެނޭޖިންގ ޑިރެކްޓަރ އަބްދުﷲ ސައީދު ވިދާޅުވީ، މިއަހަރުގެ ސެޕްޓެމްބަރުމަހުގެ ތެރޭގައި ޕީޕަލްސް ޗޮއިސްގެ ފުރަތަމަ ފަންގިފިލާ ހުޅުވޭނެކަމަށެވެ. މިތަން ހުޅުވުމާއިއެކު އެތަނުގައި ކުދި އަދި މެދު ފަންތީގެ އިތުރު ގިނަ ވިޔަފާރިތަކަކަށް ވިޔަފާރިކުރުމުގެ މަގު ފަހިވެގެންދާނެކަމަށް ސައީދު ވިދާޅުވިއެވެ.
“އެސްޓީއޯ ޕީޕަލްސް ޗޮއިސް ރިނޮވޭޓްކޮށް އާންމު ވިޔަފާރިތަކަށް ހުޅުވާލާ ހިންގަންފެށި ޕްރޮޖެކްޓްގެ ކާމިޔާބީއާއިއެކު ޓްރޭޑް ސެންޓަރުގެ ފަސްޓް ފްލޯ އަޕްގްރޭޑްކޮށް ޕީޕަލްސް ޗޮއިސް އެކްސްޕޭންޑް ކުރުމުގެ މަސައްކަތް މިހާރު ދަނީ ކުރިއަށް. އަދި މިކަމުގެ ސަބަބުން ކުދި އަދި މެދު ފަންތީގެ ގިނަ ވިޔަފާރިތަކަކަށް އިތުރު މަގުތަކެއް ފަހިވެގެންދާނެ. އިރާދަކުރެއްވިއްޔާ މިއަހަރު ސެޕްޓެމްބަރ މަހުގެ ތެރޭގައި ސުޕަމާރޓްގެ 2 ވަނަ ފިޔަވަހި ހުޅުވޭނެ.” އަބްދުﷲ ސައީދު ވިދާޅުވިއެވެ.
ފުރަތަމަ ފަންގިފިލާ ހުޅުވިގެން އަންނައިރު އެތަނުގައި ތަފާތު އެކި ބާވަތްތަކުގެ މުދާ ލިބެންހުންނާނެކަމަށް އެސްޓީއޯއިން ބުނެއެވެ. އެގޮތުން ފުރަތަމަ ފަންގިފިލާއިން 60 ވަރަކަށް ވިޔަފާރިއަކަށް ފުރުސަތު ދެވިގެންދާނެކަމަށް އެސްޓީއޯއިން ވަނީ ބުނެފައެވެ.
ފުރަތަމަ ފަންގިފިލާއިން ފުރުސަތު ދޭނީ ޕީޕަލްސް ޗޮއިސްގައި މިހާރު ނެތް ބައެއް ކަހަލަ ވިޔަފާރިތަކަށެވެ. އޭގެތެރޭގައި ގާމެންޓާއި، ފައިވާނާއި، ބޫޓާއި، އައިނާއި ލަގެޖާއި، ޖުވެލަރީ ފަދަ ވިޔަފާރިތައް ހިމެނެއެވެ.
އެސްޓީއޯއިން އަންނަނީ އެ ކުންފުނީގެ ވިޔަފާރި ފުޅާކޮށް، ކުރިއެރުވުމަށް ގިނަ މަސައްކަތްތަކެއް ކުރަމުންނެވެ. އެގޮތުން އައު ގިނަ ވިޔަފާރިތަކެެއް ކުންފުނިން ފަށާފައިވާއިރު، އިތުރު ވިޔަފާރިތައް ފެށުމަށްވެސް އެ ކުންފުނިން ދަނީ މަސައްކަތްކުރަމުންނެވެ.