މިއަހަރުގެ ފިނި މޫސުމާއި ދިމާކޮށް އޮމާން އެއަރގެ ދަތުރުތައް ރާއްޖެއަށް ފަށަން ތައްޔާރުވެއްޖެއެވެ.
އޮމާން އެއަރއިން ބުނީ އެއެއަރލައިނުން ރާއްޖެއަށް ކުރާ މިދަތުރުތައް އޮންނާނީ މިމަހުގެ 24 ވަނަ ދުވަހުން ފެށިގެންކަމަށެވެ. މި ދަތުރުތައް އޮންނާނީ ހަފްތާގެ 4 ދުވަހުއެވެ.
މި ދަތުރުތައް ކުރާނީ އޮމާންގެ ވެރިރަށް މަސްކަޓުން ވެލާނާ އިންޓަރނޭޝަނަލް އެއަރޕޯޓަށެވެ. މިދަތުރުތަކުގެ އަގު އުޅެނީ މީހަކަށް 385 ޑޮލަރަށެވެ.
އޮމާން އެއަރއިން ރާއްޖެއަށް އެންމެ ފުރަތަމަ ދަތުރުތައް ފަށާފައިވަނީ 2009 ވަނަ އަހަރުއެވެ. ނަމަވެސް 2016 ވަނަ އަހަރު އެދަތުރުތައް ވަނީ ހުއްޓާލާފައެވެ. އަދި 2018 ވަނަ އަހަރު އެއެއަރލައިނުން ވަނީ އަނެއްކާވެސް ރާއްޖެއަށް ދަތުރުތައް ފަށާފައެވެ. މިހާރު އެ އެއަރލައިނުން ރާއްޖެއަށް ކުރަމުންދަނީ ޗާޓަރ ދަތުރުތަކެކެވެ. އެއީ ފަތުރުވެރިން ގިނައިން އަންނަ ދުވަސްވަރަށް ބާއްވާ ދަތުރުތަކެކެވެ.
އޮމާން އެއަރގެ ދަތުރުތައް ރާއްޖެއަށް ފަށަން ތައްޔާރުވަމުން އަންނަ އިރު، މިހާރު ވެސް ރާއްޖެއަށް ބޭރުގެ 35 އެއަރލައިނަކުން އަންނަނީ ދަތުރުތަައް ބާއްވަމުންނެވެ.