ހުޅަނގު އައްސޭރީގެ ރާމަاللهގައި ޔަހޫދީ އިސްރާޢީލުގެ ޖައްބާރު ސިފައިން ހިންގަމުންދާ ލާއިންސާނީ އުދުވާންތަކުގައި ފަލަސްޠީން މީހަކު ޝަހީދުކޮށްލައިފިއެވެ. ރާމަاللهގެ ހުޅަނގުން އޮންނަ ރާންތިސް ޗެކްޕޮއިންޓް ކައިރީގައި ޔަހޫދީ ސިފައިން ބަޑިޖަހައި ޝަހީދުކޮށްލާފައި ވަނީ އުމުރުން 29 އަހަރުގެ މަޙުދީ ބިއަދްސާއެވެ.
ބިއަދްސާ ޝަހީދުކޮށްލާފައި ވަނީ އޭނާ ދުއްވަން އިން ކާރަށް ޔަހޫދީ ޓެރެރިސްޓު ސިފައިން ދިން ބަޑީގެ ޙަމަލާތަކެއްގައެވެ. އޭނާ ޝަހީދުކޮށްލާފައިވާ ކަން ފަލަސްޠީނުގެ ޞިއްޙަތާ ބެހޭ ވުޒާރާއިން ވަނީ ކަށަވަރު ކޮށްދީފައެވެ.
ޔަހޫދީ ސިފައިން ބުނީ ބިއަދްސާ އިން ކާރަށް ބަޑިން ޙަމަލާ ދީފައި ވަނީ، ޔަހޫދީ ސިފައިންނަށް ޙަމަލާދޭން އޭނާ މަސައްކަތް ކުރުމުން ކަމުގައެވެ. އަދި، ޔަހޫދީ ޖައްބާރު ސިފައިންގެ މީހެއްގެ ހަތިޔާރު އަތުލަން އޭނާ މަސައްކަތް ކުރި ކަމަށާއި، އޭނާ ދުއްވަން އިނީ ވަގަށް ނަގާފައިވާ ކާރެއް ކަމުގައި ވެސް ޔަހޫދީ ޓެރެރިސްޓު ސިފައިން ތުހުމަތު ކުރެއެވެ.
މި ހާދިސާއާ ގުޅޭ ގޮތުން ޣައްޒާގައި ވެރިކަން ކުރާ ހަމާސް ޖަމާޢަތުން ބުނީ ފަލަސްޠީނުގެ މިނިވަން ކަމަށް ޖިހާދުކުރަމުންދާ އެއްވެސް މުޖާހިދަކު ޔަހޫދީ ޖައްބާރު ސިފައިންނާ ކުރިމަތިލާން ފަސް ނުޖެހޭނެ ކަމުގައެވެ. ނަމަވެސް، ބިއަދްސާ ދޭން އުޅުނު ކަމަށް ބުނާ ޙަމަލާގެ ޒިންމާ ހަމާސް ޖަމާޢަތުން އުފުލާފައެއް ނުވެއެވެ.
މި ހާދިސާ ހިނގާފައި މި ވަނީ، ރާމަاللهގެ އެހެން ސަރަޙައްދެއްގައި ޔަހޫދީ ޓެރެރިސްޓު ސިފައިން އުދުވާންތަކެއް ހިންގައި ފަލަސްޠީނުގެ އިތުރު ހަ މީހަކު ޒަޚަމުކޮށްލާފައިވާ ދަނޑިވަޅެއްގައެވެ. އެ ހަ މީހުން ހޮސްޕިޓަލުގައި އެޑްމިޓުކޮށްގެން މިހާރު ދަނީ ފަރުވާ ދެމުންނެވެ. އޭގެ ތެރެއިން ތިން މީހެއްގެ ހަށިގަނޑަށް ވަޒަން އަރާފައިވާ ކަމުގައި ފަލަސްޠީނުގެ ޞިއްޙަތާ ބެހޭ ވުޒާރާއިން ހާމަކުރެއެވެ.
ޔަހޫދީ ޖައްބާރު ސިފައިން ރާމަاللهއަށް އަރާފައިވަނީ ފަލަސްޠީނުގެ މިނިވަންކަމަށް ޖިހާދުކުރާ މުޖާހިދެއްގެ ގެ ސުންނާފަތިކޮށްލުމުގެ ބޭނުމުގައެވެ. އެ ކަމަށް ހުރަސްއަޅަން ފަލަސްޠީނުގެ މުޖާހިދުންނާއި ޒުވާނުން ވަނީ މަސައްކަތް ކޮށްފައެވެ. އަދި، އެ މީހުން ހުއްޓުވަން ޔަހޫދީ ޓެރެރިސްޓު ސިފައިން ވަނީ އެއްވެސް އިންޒާރެއް ނެތި ބަޑިން ޙަމަލާދީފައެވެ.
މި ޙަމަލާތަކުގައި ވަޒަން އަރައިގެން ޒަޚަމުވެފައިވާ މީހުންގެ ތެރޭގައި ނޫސްވެރިއަކު ވެސް ހިމެނޭ ކަމަށް ރިޕޯޓުތައް ބުނެއެވެ. 2022 ވަނަ އަހަރު ޔަހޫދީ ސިފައިން ހިންގި މި ފަދަ އުދުވާންތަކެއްގައި އަލް ޖަޒީރާގެ ނޫސްވެރިއެއް ކަމުގައިވާ ޝީރީން އަބޫ އަކްލަޙް ވެސް ވަނީ މަރައިލާފައެވެ. އަބޫ އަކްލަޙްގެ މަރާ ގުޅިގެން އޭނާގެ ޢާއިލާއިން ވަނީ ޔަހޫދީ ދަޢުލަތާ ދެކޮޅަށް ބައިނަލްއަޤުވާމީ ޖިނާއީ ކޯޓު (އައި.ސީ.ސީ)އަށް މައްސަލައެއް ހުށަހަޅާފައެވެ.
މި އަހަރުގެ މިހާތަނަށް ޔަހޫދީ ސިފައިން ހިންގާފައިވާ ލާއިންސާނީ ޖަރީމާތަކުގައި ފަލަސްޠީނުގެ 158 އަށްވުރެ ގިނަ މީހުން ވަނީ ޝަހީދުކޮށްލާފައެވެ. އޭގެ ތެރޭގައި 26 ކުޑަކުދިން ވެސް ހިމެނެއެވެ. އަދި، ގިނަ ޢަދަދެއްގެ ޢާންމުންނާއި އަންހެނުން ވެސް ހިމެނެއެވެ. މުސްކުޅިންގެ ފުރާނައަށް ވެސް ފަރުވާލެއް ނުބަހައްޓައެވެ. ހުސްވި މޭ މަހުގެ 9 އިން 13 އަށް ޔަހޫދީ އަސްކަރިއްޔާއިން ހިންގި އުދުވާންތަކުގައި އެކަނިވެސް ފަލަސްޠީނުގެ 36 މީހުން ވަނީ ޝަހީދުކޮށްލާފައެވެ.