މޫވަންޕިކް އަދި ޑޯނާ ކަބާބްގެ ޑުއަލް އައުޓްލެޓެއް މާލޭގައި ހުޅުވައިފިއެވެ.
މޫވަންޕިކްއާއި ޑޯނަރ ކަބާބް އަދި ވާލީ ގުޅިގެން ތަޢާރަފްކުރި މިއައުޓްލެޓަކީ ރާއްޖޭގައި ޑުއަލް ކޮންސެޕްޓަށް ފުރަތަމަ ފަހަރަށް ހުޅުވި އައުޓްލެޓެއްކަމަށް އެފަރާތުން ފާހަގަކުރެއެވެ. މިތަން ހުޅުވާފައިވަނީ ޝަޙީދު ޢަލީ މިސްކިތް ކައިރީގައެވެ.
ލައިވް މިއުޒިކާއި ކުލަގަދަ ހަރަކާތްތަކާއެކު މޫވަންޕިކް އަދި ޑޯނާ ކަބާބްގެ މި ޑުއަލް އައުޓްލެޓް ހުޅުވުމަށް ބޭއްވި އިވެންޓުގައި މިތަން ހުޅުއްވައިދެއްވީ ޑޯނަރ ކަބާބް އަދި ވާލީގެ ޑިރެކްޓަރުންނާއި މޫވަންޕިކްއިން ސައުތް އޭޝިއާއަށް ކަނޑައަޅާފައިވާ ބްރޭންޑް އެމްބެސެޑަރއެވެ. މިތަނުން މޫވަންޕިކްގެ އައިސްކްރީމްގެ ތަފާތު ރަހަތަކާއި ޑޯނަރ ކަބާބްގެ ރަހަތަކާއެކު ޢާއްމުންނަށް ޑައިން-އިންގެ ޚިދުމަތް ލިބިގެންދާނެކަމަށް އެފަރާތުން ފާހަގަކުރެއެވެ.
މިއައުޓްލެޓް ހުޅުވުމަށް ބޭއްވި އިވެންޓުގައި މީޑިއާއާއި ވާހަކަދައްކަވަމުން މޫވަންޕިކް ބްރޭންޑް އެމްބެސެޑަރ، ސައުތް އޭޝިއާ، އެމް.ވީ.އެމް ރާއޯ ބުނީ، ޑުއަލް ކޮންސެޕްޓަށް ހުޅުވުނު މިއައުޓްލެޓާއެކު ޢާއްމުންނަށް ތަފާތު ރަހަތަކެއް އެއްތަނަކުން ތަޖުރިބާކުރުމުގެ ފުރުޞަތު ލިބިގެންދާނެކަމަށެވެ. ހަމައެއާއެކު ގުދުރަތީ ރަހަތަކާއެކު މޫވަންޕިކް ތަޖުރިބާކުރުމުގެ ފުރުޞަތު ދިވެހިންނަށް ފަހިވެގެންދިޔުމަކީ އެކަމާއި އުފާކުރާކަމެއްކަމަށެވެ.
"މީގެކުރިން މޫވަންޕިކްގެ ހުންނާނީ މުޅިންވެސް ވަކިން ސްޓޭންޑިން އައުޓްލެޓްތައް، މިއީ އަދި ފުރަތަމަ ފަރަހަށް ޑުއަލްކޮށް މޫވަންޕިކްމިއައީ. ޑޯނާ ކަބާބްގެ މީރު ރަހަތައް ބެލުމަށްފަހު ދުނިޔޭގެ އެންމެ ފާހަގަކޮށްލެވޭ އައިސްކްރީމްގެ ރަހަބަލާލުމުގެ ފުރުސަތު މިތަނުން މިލިބިގެންދަނީ" ރާއޯ ފާހަގަކުރިއެވެ.
މިއައުޓްލެޓާއި ގުޅޭގޮތުން މަޢުލޫމާތުދެއްވަމުން ޑޯނަރ ކަބާބް މޯލްޑިވްސްގެ އޮޕަރޭޝަންސް މެނޭޖަރ މުޙައްމަދު އިބްރާހީމް ބުނީ، ޔޫރަޕްގެ މަޝްހޫރު ދެ ބްރޭންޑެއް ރާއްޖެއަށް ގެނެސް ޑުއަލް ކޮންސެޕްޓަށް ތަޢާރަފްކުރެވުމަކީ ލިބުނު ބޮޑު ކުރިއެރުމެއްކަމުގައި ޤަބޫލުކުރާކަމަށެވެ.
"ރާއްޖޭގައި މިގޮތަށް އައުޓްލެޓެއް ހުޅުވީ، ރިސަރޗްތަކެއްކޮށްފައި. އެގޮތުން ޑޯނާ ކަބާބް ހުޅުވާފަވެސް ބެލީ ކިހިނެތްތޯ ތަރުހީބު ލިބެނީ. އަސްލު ވަރަށްބޮޑު ތަރުޙީބެއް ލިބިގެންދިޔައީ. މޫވެންޕިކްއާއި އެކީ މިގޮތަށް އަސްލު ވަރަށް ސަޅިކަމެއް ދިވެހިންނަށް މިގެނެސްދެވުނީ" އޭނާ ބުންޏެވެ.
ވަކިން ޚާއްސަކޮށް ޑޯނާ ކަބާބްގެ ކަސްޓަމަރުންނަށް، ޑައިން-އިންކޮށް ރަހަތަށް ތަޖުރިބާކޮށްލުމުގެ ފުރުޞަތު މިއާއެކު ފަހިވެގެންދިޔުމަކީ ޑޯނާ ކަބާބްއަށް ލިބުނު ބޮޑު ކުރިއެރުމެއްކަމަށެވެ.
މޫވަންޕިކްއަކީ ސުވިޒަލޭންޑަށް ނިސްބަތްވާ، މުޅި ދުނިޔޭގައިވެސް މަޝްހޫރު އައިސްކްރީމްގެ ބްރޭންޑެކެވެ. ޑޮނާ ކަބާބްއަކީ ތުރުކީވިލާތާއި، ޖަރުމަނުވިލާތަށްވެސް ނިސްބަތްވާ މަހުގެ އެކި ރަހަތަކުގެ ސޭންޑްވިޗްތަކަށް ޚާއްސަ ރަހަތައް ގެނެސްދޭ މަޝްހޫރު ބްރޭންޑެކެވެ.
ރާއްޖޭގައި މީގެކުރިން ޑޮނާ ކަބާބް ހިންގަމުން އައީ ޓޭކްއަވޭގެ ގޮތުގައެވެ. އެހެންނަމަވެސް ޢާއްމުންގެ މަޤުބޫލުކަން ބޮޑު ޑޯނާ ކަބާބްއާއި އެކު މޫވަންޕިކްގެ އައުޓްލެޓެއް ހުޅުވުމަކީ ގިނަ ކަސްޓަމަރުންނަށް ހިތްހަމަޖެހުން ލިބިގެންދާނެކަމެއްކަމުގައި އެ ދެފަރާތުން ދެކެއެވެ.