މޭ މަހުގެ 1 ވަނަ ދުވަހު އެމެޒަން ޖަންގައްޔަށް ވެއްޓުނު މަތިންދާބޯޓެއްގައި ދަތުރުކުރި ކޮލަމްބިޔާގެ ހަތަރު ކުޑަކުދިން ދިރިތިއްބާ ސަލާމަތްކޮށްފިއެވެ. މަތިންދާބޯޓު ވެއްޓުނު ހާދިސާގައި އޭގައި ދަތުރުކުރި އިތުރު ތިން މީހުން ވަނީ މަރުވެފައެވެ. މަރުވި މީހުންގެ ތެރޭގައި ގެއްލުނު ހަތަރު ކުދިންގެ މައިމީހާ ވެސް ހިމެނެއެވެ. އަނެއް ދެ މީހުންނަކީ ދެ ޕައިލެޓުންނެވެ.
މަތިންދާބޯޓު ވެއްޓިފައި ވަނީ ކޮލަމްބިޔާގެ ކެކޭތާ ސަރަޙައްދުގެ ޖަންގައްޔަށެވެ. ވެއްޓުނު މަތިންދާބޯޓުގެ ބައިތައް ފެނިފައި ވަނީ މޭ 15 ވަނަ ދުވަހުއެވެ. ނަމަވެސް، އޭގައި ދަތުރުކުރި ހަތަރު ކުޑަކުދިން ވަނީ ޖަންގަލިތެރެއަށް ގެއްލިފައެވެ. ގެއްލިފައި ވަނީ 13 އަހަރާއި، ނުވަ އަހަރާއި، ހަތަރު އަހަރުގެ ކުއްޖެއްގެ އިތުރުން 11 މަހުގެ ތުއްތުކުއްޖެކެވެ.
އެ ކުދިން ހޯދުމަށް ކޮލަމްބިޔާއިން ވަނީ ބޮޑު އޮޕަރޭޝަނެއް ހިންގާފައެވެ. މި އޮޕަރޭޝަންގައި 160 އަށްވުރެ ގިނަ ސިފައިންނާއި، ކެކޭތާ ސަރަޙައްދުގައި ދިރިއުޅޭ 70 އަށްވުރެ ގިނަ ޢާންމުން ބައިވެރިވިއެވެ. ހުސްވި ހަފުތާގައި ކޮލަމްބިޔާގެ އަސްކަރިއްޔާއިން ވަނީ އެ ކުދިން ހޯދުމަށް ކުރަމުންދާ މަސައްކަތުގައި ކުރިއެރުންތަކެއް ލިބިފައިވާ ކަމަށް ބުނެފައެވެ.
އެ މީހުންނަށް ވަނީ ދަނޑިފަނުން ތައްޔާރުކޮށްފައިވާ ޖިފުޓިއަކާއި، ކެއުމަށް ބޭނުންކޮށްފައިވާ މޭވާތަކަކާއި، އެއް ކުއްޖެއްގެ ފައިތިލައިގެ ނިޝާން ޖަންގަލި ތެރެއިން ފެނިފައެވެ. އެއާއެކު، ދިރިތިއްބާ އެ ހަތަރު ކުދިން ސަލާމަތް ކުރެވޭނެ ކަމުގެ އުންމީދު އައުވެގެން ދިޔައެވެ. އެ ހަތަރު ކުދިން ސަލާމަތް ކުރެވުމާ ގުޅިގެން ކޮލަމްބިޔާގެ ރައީސް ގުސްތާވޯ ޕެތްރޯ ވިދާޅުވީ މިއީ މުޅި ކޮލަމްބިޔާއަށް ވެސް އައި ވަރަށް އުފާވެރި ދުވަހެއް ކަމުގައެވެ. "މިއީ ވަރަށް ވެސް ތާރީޚީ ދުވަހެއް،" ޕެތްރޯ ވިދާޅުވިއެވެ.
ގެއްލިފައިވާ ހަތަރު ކުދިންގެ މާމަ ފިޑެންސިޔޯ ވެލެންސިޔާ ބުނީ އެ ކުދިންގެ ތެރެއިން ދޮށްޓަށް ތިބި ތިން ކުދިންނަކީ ވަލުތެރޭގައި ދިރިއުޅެން ފަރިތަ ތިން ކުދިން ކަމުގައެވެ. އެއީ ކޮލަމްބިޔާގެ ޖަންގަލިތަކުގައި ދިރިއުޅޭ ވިޓޯޓާ ދަރިކޮޅަށް ނިސްބަތްވާ ކުދިންތަކެކެވެ. އެ ކުދިން ފެނިފައި މި ވަނީ 40 ދުވަހަށް ވުރެ ގިނަ ދުވަސް ފަހުންނެވެ.
އެ ކުދިން މިހާރު ވަނީ ހެލިކޮޕްޓަރުގައި ވެރިރަށް ބޮގޮތާއަށް ގެންގޮސްފައެވެ. އަދި، ހޮސްޕިޓަލަށް ގެންގޮސް ފަރުވާދޭން ފަށާފައެވެ. "އެ ކުދިން ހޯދުމަށް މަސައްކަތް ކުރި ހުރިހާ އެންމެންނަށް ހިފެހެއްޓުމެއް ނެތް ޝުކުރު ރައްދު ކުރަން،" އެ ކުދިންގެ މާމަ ފާތިމާ ވެލެންސިޔާ ބުންޏެވެ.
މަތިންދާބޯޓު ވެއްޓިފައި ވަނީ މޭ މަހުގެ 1 ވަނަ ދުވަހު، އެމެޒަން ޖަންގަލީގެ ރަށެއް ކަމުގައިވާ ސަން ހޯސޭ ޑެލް ގުއަވިއަރޭން ފުރައިގެން ދަތުރުކުރަމުން ދަނިކޮށެވެ. މަތިންދާބޯޓު ވެއްޓެން މެދުވެރިވި ސަބަބު ދެނެގަނެވިފައި ނުވާއިރު، އޮފިޝަލުން މިހާރު ދަނީ އެ ކަން ތަހުޤީޤު ކުރަމުންނެވެ. ނަމަވެސް، ބޯޓުގެ އިންޖީނަށް މައްސަލައެއް ކުރިމަތިވެފައިވާ ކަން، ބޯޓާ ގުޅުން ކެނޑުމުގެ ކުޑަ ވަގުތުކޮޅެއް ކުރިން ޕައިލެޓް ވަނީ ރިޕޯޓުކޮށްފައެވެ.