ޔޫކްރެއިންގެ ރަށްތަކަށް އަތްގަދަކޮށްފައިވާ ރަޝިޔާގެ ސިފައިންގެ އަތްދަށުން އެ ޤައުމު މިނިވަން ކުރުމަށް ހިންގާ ޚާއްޞަ އަސްކަރީ ކެމްޕޭން ފަށާފައިވާ ކަން ޔޫކްރެއިނުން ކަށަވަރުކޮށްދީފިއެވެ. މި ކަން ކަށަވަރުކޮށްދެމުން ޔޫކްރެއިންގެ ރައީސް ވޮލޮޑޮމީރް ޒެލެންސްކީ ވިދާޅުވީ އެ ޤައުމުން ކައުންޓަރއޮފެންސިވް ނުވަތަ ރަޝިޔާގެ ފައުޖުތަކާ ދެކޮޅަށް ވަރުގަދަ އަސްކަރީ ކެމްޕޭނެއް ފަށާފައިވާ ކަމަށާއި، ދިފާޢީ ގޮތުން ވެސް ހަރަކާތްތައް ހިންގަމުންދާ ކަމުގައެވެ.
ރަޝިޔާގެ ފައުޖުތައް ޔޫކްރެއިނަށް ފޮނުވައިގެން ރައީސް ވްލަޑިމިޔަރ ޕުޓިން ހަނގުރާމަ ފައްޓަވާފައި ވަނީ 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހުއެވެ. ރަޝިޔާގެ ފައުޖުތަކުން ވަނީ ޔޫކްރެއިންގެ ބައެއް ސަރަޙައްދުތަކަށް އަތްގަދަކޮށްފައެވެ. އޭގެ ތެރޭގައި އިރުމަތީ ދޮންބާސްގައި ހިމެނޭ ލުހާންސްކާއި ޑޮނެޓްސްކުގެ ބައެއް ހިސާބުތައް ހިމެނެއެވެ. އަދި، ދެކުނުގައިވާ ޒަޕޮރީޜިޔާ ހިމެނެއެވެ.
އެ ރަށްތައް މިނިވަންކޮށް ރަޝިޔާގެ އިސްތިޢުމާރީ ސިފައިން އެ ޤައުމުން ބޭލުމަށް ޔޫކްރެއިނުން ތައްޔާރުވަމުންދާތާ މިހާރު އެތަކެއް މަހެއް ފާއިތުވެއްޖެއެވެ. ޔޫކްރެއިންގެ އަސްކަރީ ކެމްޕޭން ފަށާފައިވާ ކަމަށް ބައެއް މީޑިޔާތަކުން ވަނީ މީގެ ދެ ތިން ހަފުތާ ކުރިން ރިޕޯޓުކޮށްފައެވެ. ޕުޓިން ވެސް ވަނީ އެހެން ވިދާޅުވެފައެވެ. "ޔޫކްރެއިންގެ އަސްކަރީ ކެމްޕޭން ފަށާފައިވާ ކަން ވަރަށް ކަށަވަރުކަމާ އެކު ބުނަން ކެރޭ،" ޕުޓިން ވިދާޅުވިއެވެ. ނަމަވެސް، މިއީ ޒެލެންސްކީ އެ ކަން ކަށަވަރު ކޮށްދެއްވާފައިވާ ފުރަތަމަ ފަހަރެވެ.
އަސްކަރީ ކެމްޕޭންގެ ދަށުން ޔޫކްރެއިންގެ ފައުޖުތަކުން ފުރަތަމަ ޙަމަލާދޭން ފަށާފައި ވަނީ އިރުމަތީ އޮންނަ ބަޚްމުތާއި ދެކުނުގައި އޮންނަ ޒަޕޮރީޜިޔާގައި ހަރަކާތްތެރިވާ ރަޝިޔާގެ ފައުޖުތަކަށް ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ. އެ ސަރަޙައްދުތަކުގައި ތިބި ރަޝިޔާގެ ފައުޖުތަކަށް ދުރުރާސްތާ ހަތިޔާރު ބޭނުންކޮށްގެން ޔޫކްރެއިނުން ޙަމަލާދެމުންދާ ކަމަށް އެ ފަރާތްތަކުން ބުނެއެވެ.
ރަޝިޔާގެ ދިފާޢީ ވަޒީރު ސަރްގޭ ޝޮއިގޫ ވިދާޅުވީ ޒަޕޮރީޜިޔާގައި ތިބި އެ ޤައުމުގެ ސިފައިންނަށް ޔޫކްރެއިންގެ ފައުޖުތަކުން ދޭން މަސައްކަތް ކުރި ޙަމަލާތަކެއް ދިފާޢުކޮށްފައިވާނެ ކަމުގައެވެ. އެ ޙަމަލާގައި ޔޫކްރެއިންގެ 1,500 އަށްވުރެ ގިނަ ސިފައިން ބައިވެރިވި ކަމަށާއި، ގިނަ ޢަދަދެއްގެ އަސްކަރީ އުޅަނދު ބޭނުންކޮށްފައިވާ ކަމުގައި ވެސް އޭނާ ވިދާޅުވިއެވެ. ނަމަވެސް، ރަޝިޔާގެ ފައުޖުތަކުން އަތްގަދަކޮށްފައިވާ ސަރަޙައްދުތައް ދިފާޢުކޮށްފައިވާނެ ކަމުގައި އޭނާ ވިދާޅުވިއެވެ.
ހުސްވި ހަފުތާގައި ޔޫކްރެއިންގެ ދެކުނުގައި އޮންނަ ޚަރްސަންގެ މައި ޑޭމެއް ވެސް ވަނީ ގޮއްވައިލާފައެވެ. ނޮވާ ކަޚޮވްކާގައި އޮންނަ ޑޭމް ގޮއްވައިލުމާ އެކު 600 އެއްހާ އަކަ ކިލޯމީޓަރުގެ ސަރަޙައްދެއްގައި ފެންބޮޑުވިއެވެ. ފެންބޮޑުވުމާ ގުޅިގެން ތިން މީހަކު މަރުވެފައިވާ ކަމަށް ޔޫކްރެއިނުން ވަނީ ބުނެފައެވެ. އަދި، އެ ސަރަޙައްދުތަކުގައި ދިރިއުޅޭ ޢާންމު ރައްޔިތުން ރައްކާތެރި ހިސާބުތަކަށް ބަދަލުކުރަން މިހާރު ދަނީ މަސައްކަތް ކުރަމުންނެވެ.
ކަޚޮވްކާ ޑޭމް ގޮއްވައިލާފައި ވަނީ ޔޫކްރެއިންގެ އަސްކަރީ ކެމްޕޭނަށް ހުރަސް އެޅުމުގެ ގޮތުން ކަމަށް ބެލެވޭ ކަމުގައި މަސްރަޙު ދިރާސާކުރާ ފަރާތްތަކުން ގަބޫލުކުރެއެވެ. ސަބަބަކީ، އެ ޑޭމަކީ ޑްނިޕްރޯ ކޯރު ހުރަސްކޮށް ދަތުރުކުރަން އޮންނަ މުހިންމު މަގެކެވެ. އަދި، އެ މަގު އޮތް ނަމަ، ޔޫކްރެއިންގެ ފައުޖުތަކަށް ރަޝިޔާގެ ފައުޖުތައް ތިބި ހިސާބުތަކަށް ދަތުރު ކުރުމަށް ފަސޭހަވާނެ ކަމުގައި އެ ފަރާތްތަކުން ބުނެއެވެ.
ޑޭމް ގޮއްވައިލާފައި ވަނީ ރަޝިޔާއިން ކަމަށް ޔޫކްރެއިނުން ތުހުމަތު ކުރި ނަމަވެސް، އެ ޤައުމުން ދަނީ އެ ތުހުމަތުތައް ދޮގު ކުރަމުންނެވެ. ޑޭމަށް ޙަމަލާދީ ގޮއްވައިލިއިރު އެ ތަން އޮތީ ރަޝިޔާ ސިފައިންގެ އަތްދަށުގައި ކަން ފާހަގަ ކުރެވެއެވެ. ޚަރްސަނަކީ ވެސް ކުރިން ރަޝިޔާއިން އަތްގަދަކޮށްފައިވާ ސަރަޙައްދެކެވެ. ނަމަވެސް، 2022 ވަނަ އަހަރުގެ ސެޕްޓެންބަރު މަހުގެ ތެރޭގައި ޔޫކްރެއިނުން ވަނީ އެ ރަށް މިނިވަންކޮށްފައެވެ.