ސައުދީ އަރަބިއްޔާގެ ”ފްލައިނާސް“ އެއަރލައިންގެ ދަތުރުތައް ރާއްޖެއަށް ފަށައިފިއެވެ. މި އެއަރލައިންގެ ދަތުރުތައް ރާއްޖެއަށް ފަށާފައިވަނީ މިއަދުއެވެ. މިފްލައިޓުން 96 މީހުންވަނީ ރާއްޖެ އައިސްފައެވެ.
ފްލައިނާސް އެއަރލައިނުން ރާއްޖެއަށް މިފެށި ދަތުރުތަކަކީ ހޫނު މޫސުމާއި ދިމާކޮށް ފެށި ދަތުރުތަކެކެވެ. މިދަތުރުތައް އަންނަ އޮކްޓޯބަރ މަހުގެ ނިޔަލަށް ކުރިއަށްގެންދާނެއެވެ. އަދި މިއެއަރލައިންގެ ދަތުރުތައް ހަފްތާއަކު 3 ދުވަހު ރާއްޖެއަށް ކުރާނެއެވެ. އެއީ އަންގާރަ، ބުރާސްފަތި އަދި ހޮނިހިރު ދުވަހުއެވެ.
މިދަތުރުތައް ކުރާނީ ރިޔާޟްގެ އެއަރޕޯޓުން ވެލާނާ އިންޓަރނޭޝަނަލް އެއަރޕޯޓަށެވެ. ފްލައިނާސް އެއަރލައިންގެ ދަތުރުތައް ރާއްޖެއަށް ފެށުމާއި ގުޅިގެން ޓޫރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވީ، މިދަތުރުތައް ރާއްޖެއަށް ފެށުމަކީ ރާއްޖޭގެ ފަތުރުވެރިކަމަށް ބޮޑު ކުރިއެރުމެއް ލިބިގެންދާނެ ކަމެއްކަމަށެވެ. މި ދަތުރުތަކުގެ ސަބަބުން ދިވެހިންނަށްވެސް ވަރަށް ބޮޑު ފަސޭހަތަކެއް ލިބިގެންދާނެކަން މިނިސްޓަރ ފާހަގަކުރެއްވިއެވެ. މިދަތުރުތަކާއެކު ދިވެހިންނަށް އަގުހެޔޮކޮށް ސައުދީއަށް ދަތުރުކުރެވޭނެކަން މިނިސްޓަރ ފާހަގަކުރެއްވިއެވެ.
"ދިވެހިންނަށްވެސް ވަރަށް ބޮޑު ފަސޭހައެއް ވެގެންދާނެ. ސައުދީއަށް ދާންބޭނުންވާ ދިވެހިންނަށްވެސް މީގަ ދަތުރުކުރެވޭނެ. ސައުދީ މާކެޓަކީ އޭގެ ޒާތުގައި ވަރަށް މުހިންމު މާކެޓެއް. ކުރިއަށްއޮތް ތަނުގައި އެ މާކެޓް އިތުރުވެގެންދާނެ. އަދި ސައުދީން ވަރަށް ބޮޑަށް އެބަ މަސައްކަތްކުރޭ ރީޖަންގެ ފަތުރުވެރިކަމުގެ ލީޑް ރޯލެއް އަދާކުރަން. އެހެންވީމަ އެމީހުން މިހާރު އެ ތަރައްޤީކުރަމުންދާ ތަރައްޤީކުރުމާއި ދިވެހިރާއްޖެއާއި ބޮޑަށް ގުޅުވާލެވިގެންމިދިޔައީ". މިނިސްޓަރ ވިދާޅުވިއެވެ.
ފްލައިނާސް އެއަރލައިންގެ ވައިސް ޕްރެޒިޑެންޓް ސޭލްސް އަލެއިދީ އަބްދުﷲ ސުލައިމާން ވިދާޅުވީ، މި ދަތުރުތަކާއިއެކު ސައުދީން ރާއްޖެއަށް އަންނަން ބޭނުންވާ ފަތުރުވެރިންނަށް އަދި ރާއްޖެއިން ސައުދީއަށް ދަތުރުކުރަން ބޭނުންވާ ފަތުރުވެރިންނަށް އިތުރު ފަސޭހަތަކެއް ލިބިގެންދާނެކަމަށެވެ.
ފްލައިނާސް އެއަރލައިންގެ ދަތުރުތައް ރާއްޖެއަށް ފެށުމުގެ ކުރިން ސަޢުދީ ޢަރައްބިއްޔާއިން ރާއްޖެއަށް ސީދާ ދަތުރުތައް ކުރަނީ އެޤައުމުގެ ޤައުމީ އެއަރލައިން "ސަޢުދިއާ" އެކަންޏެވެ. މިއެއަރލައިން ކޯވިޑަށް މެނދުކަނޑާލުމަށްފަހު ރާއްޖެއަށް ދަތުރުތައް ފަށާފައިވަނީ 2021 ވަނަ އަހަރުގެ މެއި މަހުއެވެ.
ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން މިއަހަރުގެ ފުރަތަމަ 4 މަސްދުވަހު ސައުދީ އަރަބިއްޔާއިން ރާއްޖެއަށް 8367 ފަތުރުވެރިން ވަނީ އައިސްފައެވެ. އަދި މިދިޔަ އަހަރުގެ މިމުއްދަތުގައި ސައުދީ އަރަބިއްޔާއިން ރާއްޖެއައީ 10،666 ފަތުރުވެރިންނެވެ.