"ކޮމިއުނިކޭޝަންސް އޮތޯރިޓީ އޮފް މޯލްޑިވްސް" ގެ ނަމުގައި ސަރުކާރުގެ އިދާރާއެއް ރައީސުލްޖުމްހޫރިއްޔާ މިއަދު އުފައްދަވައިފިއެވެ.
މި އޮތޯރިޓީ އުފެއްދެވުމާގުޅިގެން، މިނިސްޓްރީ އޮފް ހޯމް އެފެއާޒުގެ ދަށުން ހިންގަވަމުންގެންދިޔަ "ކޮމިއުނިކޭޝަން އޮތޯރިޓީ އޮފް މޯލްޑިވްސް" މިއަދު ވަނީ އުވާލައްވާފައެވެ.
ކޮމިއުނިކޭޝަންސް އޮތޯރިޓީ އޮފް މޯލްޑިވްސްގެ ޤާނޫނުގެ ދަށުން ކޮމިއުނިކޭޝަންސް އޮތޯރިޓީ އޮފް މޯލްޑިވްސްއާ ޙަވާލުކުރައްވާފައިވަނީ، އެ ޤާނޫނުގައި ބަޔާންކޮށްފައިވާ ޓެލެކޮމިއުނިކޭޝަންގެ މަސައްކަތްތަކާއި، ސްޕެކްޓްރަމް ބެލެހެއްޓުމުގެ މަސައްކަތްތަކާއި، ޕޯސްޓުގެ ދާއިރާ ބެލެހެއްޓުމުގެ މަސައްކަތްތަކާއި، އިންފޯކޮމިއުނިކޭޝަންގެ ދާއިރާއާ ގުޅޭގޮތުން ޓެލެކޮމިއުނިކޭޝަންގެ ދާއިރާއާ ސީދާ ގުޅޭކަންކަމުގައި އިންފޯކޮމިއުނިކޭޝަންގެ ދާއިރާ ރެގިއުލޭޓްކުރުމަށް ބޭނުންވާ ނިސްބަތަށް ކުރަންޖެހޭ މަސައްކަތްތަކާއި، އެ ޤާނޫނުގެ ދަށުން ނުވަތަ އެހެން ޤާނޫނަކުން އެ އޮތޯރިޓީން ކުރަންޖެހޭނެ ކަމަށް ބަޔާންކުރާ މަސައްކަތްތަކާއި، ޤާނޫނު ނަންބަރު 2015/42 ގެ ދަށުން ކޮމިއުނިކޭޝަންސް އޮތޯރިޓީ އޮފް މޯލްޑިވްސްއާ ޙަވާލުކޮށްފައިވާ މަސައްކަތްތައް ކުރުމަށްޓަކައި ނުވަތަ ކުރުމަށް މަގުފަހިކުރުމަށްޓަކައި ކުރަންޖެހޭ މަސައްކަތްތަކާއި، މިނޫންވެސް އެ ޤާނޫނު ހިންގުމަށްޓަކައި ކުރަންޖެހޭ ކަންކަމެވެ.