އަންހެނުންނާމެދުކުރެވޭ އެންމެހާ ތަފާތުތަށް ނައްތާލުމަށްޓަކައި، 'ކޮންވެންޝަން އޮން ދަ އެލިމިނޭޝަން އޮފް އޯލް ފޯރމްސް އޮފް ޑިސްކްރިމިނޭޝަން އެގެއިންސްޓް ވިމެން' ނުވަތަ ސީޑޯ މުޢާހަދާގެ 16 ވަނަ މާއްދާއަށް ކޮށްފައިވާ ބައެއް އިއުތިރާޒް ނަގަން ވަޒީރުންގެ މަޖިލީހުން މިއަދު ނިންމަވައިފިއެވެ.
މިގޮތަށް ނިންމެވީ، މިއަދު ބޭއްވެވި ވަޒީރުންގެ މަޖިލީހުގެ ޖަލްސާގައި، މިނިސްޓްރީ އޮފް ލޯ އެންޑް ޖެންޑަރ އިން ހުށަހެޅުއްވި ކަރުދާހާ ބެހޭގޮތުން އެ މަޖިލީހުގައި މަޝްވާރާކުރެއްވުމަށްފަހުގައެވެ.
މިއަދުގެ މަޝްވަރާތަކުގައި، ނިންމެވީ ސީޑޯގެ 16 ވަނަ މާއްދާގެ 1ވަނަ ނަންބަރުގެ (ބީ)،(އީ)،(އެފް)،(ޖީ)،(އެޗް) އަދި އެމާއްދާ 2ވަނަ ނަންބަރުން އިއުތިރާޒް ނެގުމަށެވެ. އަދި ދިވެހިރާއްޖޭގެ ޖުމްހޫރިއްޔާއާއި ޤާނޫނުއަސާސީގެ 93 ވަނަ މާއްދާގައިވާ ގޮތުގެ މަތިން ރައްޔިތުންގެ މަޖިލީހަށް ފާސްކުރެއްވުމަށް ހުށަހެޅުއްވުމަށްވެސް ނިންމެވިއެވެ.
މިއަދުގެ ޖަލްސާގައި މިނިސްޓްރީ އޮފް ފިޝަރީޒް އެންޑް އެގްރިކަލްޗަރުން ހުށަހެޅުއްވި އެގްރިމަންޓް އޮން އެސްޓެބްލިޝިންގ ދަ 'ސާކް ސީޑް ބޭންކް' ދިވެހިރާއްޖެއިން ތަސްދީޤުކުރުމާ ބެހޭގޮތުން މަޝްވަރާކުރެވި، މި އެއްބަސްވުން ރާއްޖެއިން ބަލައިގަތުމަށް ވެސް ނިންމެވިއެވެ.
މީގެ އިތުރުން މިއަދު ބޭއްވުނު ވަޒީރުންގެ މަޖިލީހުގެ ޖަލްސާގައި ރާއްޖެ ބައިވެރިވެ ތަސްދީޤުކޮށްފައިވާ މޫސުމަށް އަންނަ ބަދަލުތަކާބެހޭ މުޢާހަދާ ޔުނައިޓެޑް ނޭޝަންސް ފްރޭމްވާރކް ކޮންވެންޝަން އޮން ކްލައިމްޓް ޗޭންޖްގެ ދަށުން އެކުލަވާލެވިފައިވާ 'ޕެރިސް އެގްރިމަންޓް' ދިވެހިރާއްޖެއިން ރަސްމީގޮތުން ބަލައިގަތުމަށް ފެނިވަޑައިގަންނަވާކަމަށް ނިންމެވިކަމަށްވެސް ރައީސުލްޖުމްހޫރިއްޔާގެ އޮފީހުން މަޢުލޫމާތުދެއްވައެވެ.