މީގެ 111 އަހަރު ކުރިން ފެތުނު އާރް.އެމް.އެސް ޓައިޓޭނިކް ކައިރިއަށް ފަތުރުވެރިންނާ އެކު ފީނި ޓައިޓަންގެ ނަން ދީފައިވާ ކުޑަ ސަބްމެރިންގައި ދަތުރުކުރި ފަސް މީހުން މަރުވެފައިވާ ކަން ކަށަވަރު ކުރެވިއްޖެއެވެ. އެ ސަބްމެރިން ގެއްލިފައި ވަނީ މީގެ ފަސް ދުވަސް ކުރިން ކެނެޑާގެ އިރުދެކުނު ފަރާތަށެވެ. އޯޝަންގޭޓް އެކްސްޕެޑިޝަންސް ކިޔާ ކުންފުންޏަކުން އޮޕަރޭޓްކުރާ އެ އުޅަނދުގެ ޚަބަރު ހުސްވިއިރު އޭގައި ޕައިލެޓުގެ އިތުރުން ހަތަރު ފަތުރުވެރިން ތިއްބެވެ.
އެ ސަބްމެރިންގެ ބައިތައް ކަނޑުގެ އަޑިން ފެނިފައިވާ ކަން ހާމަކޮށްފައި މި ވަނީ އެ އުޅަނދު ހޯދުމަށް ފަސް ދުވަސް ވަންދެން ކުރަމުން ދިޔަ މަސައްކަތްތަކަށް ފަހުއެވެ. އުޅަނދު ހޯދުމުގައި އިސްކޮށް ހަރަކާތްތެރިވި އެމެރިކާގެ ކޯސްޓްގާޑުން ބުނީ އުޅަނދުގެ ބައިތައް ޓައިޓޭނިކާ މާ ދުރުނޫން ހިސާބަކުންނެވެ.
އުޅަނދު "އިމްޕްލޯޝަނެއްގެ" ސަބަބުން ގޮވާފައިވާ ކަމަށާއި، އުޅަނދުގެ ބައިތައް ފެނިފައި ވަނީ ކެނެޑާގެ ކޯސްޓްގާޑުގެ ރޮބޮޓިކް ސަބްމެރިނަކަށް ކަމުގައި އޮފިޝަލުން ވިދާޅުވެއެވެ. ގެއްލުނު ސަބްމެރިންގެ ބައިތައް ފެނިފައި ވަނީ ޓައިޓޭނިކާ 1,600 ފޫޓު ދުރުން ކަމުގައި އެމެރިކާގެ ކޯސްޓްގާޑުގެ ރިޔަރ އެޑްމިރަލް ޖޯން މޯގަރ ވިދާޅުވިއެވެ.
22 ފޫޓުގެ ޓައިޓަންގެ ބައިތަކެއް ކަނޑުގެ އަޑީގައި އޮތް ކަމަށާއި، އޭގެ ތެރޭގައި އުޅަނދުގެ ފަހަތްކޮޅު ވެސް ހިމެނޭ ކަމުގައި އޮފިޝަލުން ވިދާޅުވެއެވެ. ނަމަވެސް، އޭގައި ދަތުރުކުރި ފަސް މީހުންގެ ތެރެއިން އެއްވެސް މީހެއްގެ ހަށިގަނޑު ފެނިފައިވާ ކަން އަދި ކަށަވަރެއް ނޫނެވެ. އުޅަނދުގެ ބައިތައް ފެނުމުގެ ކުރިން ވެސް އޯޝަންގޭޓް ކުންފުނިން ވަނީ ސަބްމެރިންގައި ދަތުރުކުރި އެންމެން މަރުވެފައިވާ ކަމަށް ބެލެވޭ ކަމުގައި ބުނެފައެވެ.
މި ހާދިސާގައި މަރުވެފައި ވަނީ އިނގިރޭސިވިލާތުގެ ބިލިޔަނަރެއް ކަމުގައިވާ ހޭމިޝް ހާޑިންގާއި، ޕާކިސްތާނުގެ ވިޔަފާރިވެރިއެއް ކަމުގައިވާ ޝާހުޒާދާ ދާވޫދާއި އޭނާގެ ދަރިފުޅު ސުލައިމާން ދާވޫދާއި، ފަރަންސޭސިވިލާތުގެ ދިރާސާކުރާ މީހެއް ކަމުގައިވާ ޕޯލް-އޮންރީ ނާގޮލޯއެވެ. ސަބްމެރިން ދުއްވަން އިން ޕައިލެޓަކީ އޯޝަންގޭޓް ކުންފުނީގެ ބާނީ އަދި ސީ.އީ.އޯ ސްޓޮކްޓަން ރަޝްއެވެ.
އައިސްބަރގެއްގައި ޖެހިގެން ޓައިޓޭނިކް ކަނޑުގެ އަޑިއަށް ފެތިފައި ވަނީ 1912 ވަނަ އަހަރުގެ އޭޕްރިލް މަހުގެ 15 ވަނަ ދުވަހުއެވެ. އެ ހާދިސާގައި ބޯޓުގައި ދަތުރުކުރި 1,500 އެއްހާ ފަސިންޖަރުންނާއި ފަޅުވެރިން މަރުވިއެވެ. އޯޝަންގޭޓް އެކްސެޑިޝަންސަކީ އެ އުޅަނދުގެ ބައިތައް ބަލައިލުމުގެ ފުރުޞަތު ފަތުރުވެރިންނަށް ފޯރުކޮށްދޭ ކުންފުންޏެކެވެ.
ސަބްމެރިނެއްގައި ޓައިޓޭނިކް ފެތިފައިވާ ސަރަޙައްދަށް ފަތުރުވެރިން ގެންދިޔުމަށް އެ ކުންފުނިން 250,000 އެމެރިކާގެ ޑޮލަރުގެ އަގެއް ނަގައެވެ. އެ ސަބްމެރިނަށް ޓައިޓޭނިކް އޮންނަ ސަރަޙައްދަށް ފީނާފައި ދަތުރުކުރަން ދެ ގަޑިއިރު ހޭދަވެއެވެ. ޓައިޓޭނިކްގެ ބައިތައް ފެތިފައި އޮތީ ކަނޑުގެ 12,500 ފޫޓު އަޑީގައެވެ.