ޔޫކްރެއިނާއި ކްރައިމިޔާ ގުޅައިދޭ މައި ބުރިޖަކަށް ޔޫކްރެއިނުން ވަރުގަދަ މިސައިލް ޙަމަލާތަކެއް ދީފިއެވެ. ކްރައިމިޔާއަކީ 2014 ވަނަ އަހަރު ރަޝިޔާއިން އަތްގަދަކޮށްފައިވާ ޔޫކްރެއިނުގެ އެންމެ ދެކުނުން އޮންނަ ސަރަޙައްދެވެ. އެ ސަރަޙައްދާއި ޔޫކްރެއިން ގުޅައިދޭ މައި ބުރިޖަކަށް ޙަމަލާދިނުމާ ގުޅިގެން ރަޝިޔާގެ އަސްކަރިއްޔާއަށް ބޮޑެތި ދަތިތަކާ ކުރިމަތިލާން ޖެހޭނެ ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ.
ޔޫކްރެއިންގެ ދެކުނުގެ ސަރަޙައްދުތަކަށް އަތްގަދަކޮށްފައިވާ ރަޝިޔާ ސިފައިންނަށް އަސްކަރީ ހަތިޔާރާއި އަދި އެހެނިހެން މުދަލާއި ސާމާނު ފޯރުކޮށްދެނީ ކްރައިމިޔާއިންނެވެ. އަދި، ކްރައިމިޔާއާއި ޔޫކްރެއިންގެ ދެކުނުގެ ސަރަޙައްދުތައް ގުޅުވައިދޭ ބުރިޖަށް ޙަމަލާ ދިނުމުން، ރަޝިޔާގެ ފައުޖުތަކަށް ހަތިޔާރާއި އެހެނިހެން ސާމާނު ފޯރުކޮށްދޭން ހުރަސް އެޅިފައިވާ ކަމަށް މަސްރަޙު ދިރާސާކުރާ ފަރާތްތަކުން ބުނެއެވެ.
ކްރައިމިޔާއާއި ޔޫކްރެއިން ގުޅައިދޭ ބުރިޖު އޮންނަ ސަރަޙައްދަށް ހަމަލާދިނުމުގެ ގާބިލުކަން ހުރި ހަތިޔާރު މީގެ ކުރިން ޔޫކްރެއިންގެ އަސްކަރިއްޔާގައި ނެތް ނަމަވެސް، އެ ޤައުމަށް ހުޅަނގުން ފޯރުކޮށްދީފައިވާ ފަހުގެ ޒަމާނީ އައު ހަތިޔާރުތަކާ އެކު ކްރައިމިޔާގެ ސަރަޙައްދުތަކަށް ޙަމަލާދިނުމުގެ ގާބިލުކަން ޔޫކްރެއިންގެ އަސްކަރިއްޔާއަށް ވަނީ ލިބިފައެވެ. ބުރިޖަށް ޙަމަލާދޭން ޔޫކްރެއިނުން ބޭނުންކޮށްފައި ވަނީ އިނގިރޭސިވިލާތާއި ފަރަންސޭސިވިލާތުން ފޯރުކޮށްދީފައިވާ ކްރޫޒް މިސައިލް ކަމުގައި ރަޝިޔާއިން ތުހުމަތު ކުރެއެވެ. ބުރިޖަށް ހަތަރު ފަހަރު ޙަމަލާދީފައިވާ ކަމުގައި ވެސް ރަޝިޔާއިން ބުނެއެވެ.
ކްރައިމިޔާއަށް ދަތުރުކުރަން އޮންނަ މައި ބުރިޖަށް ޔޫކްރެއިނުން ވަރުގަދަ މިސައިލް ޙަމަލާތަކެއް ދީފައި މި ވަނީ، އެ ޤައުމަށް އަތްގަދަކޮށްގެން އުޅޭ ރަޝިޔާގެ އިސްތިޢުމާރީ ސިފައިންނާ ދެކޮޅަށް ފަށާފައިވާ ކައުންޓަރއޮފެންސިވް ނުވަތަ ރައްދު ޙަމަލާގެ އަސްކަރީ ކެމްޕޭނުގެ ދަށުންނެވެ. ރަޝިޔާއާ ދެކޮޅަށް ޔޫކްރެއިނުން ވަރުގަދައަށް ހަނގުރާމަ ކުރަމުންދާ އެއް ސަރަޙައްދުގެ ތެރޭގައި ޔޫކްރެއިންގެ ދެކުނުގައިވާ ޒަޕޮރީޜިޔާއާއި އެ ރަށް ވަށައިގެންވާ ސަރަޙައްދުތައް ހިމެނެއެވެ. އެ ތަނުގައި ހަރަކާތްތެރިވާ ރަޝިޔާގެ ފައުޖުތަކަށް ހަތިޔާރު ފޯރުކޮށްދެނީ ކްރައިމިޔާ މަގުންނެވެ.
ޔޫކްރެއިންގެ ދިފާޢީ ވަޒީރުގެ ނައިބު ހަނާ މަލިއާރް ވިދާޅުވީ ޔޫކްރެއިނުގެ އިރުމައްޗަށް އަތްގަދަ ކޮށްފައިވާ ރަޝިޔާ ސިފައިންނާ ވެސް ޔޫކްރެއިންގެ ފައުޖުތަކުން ކުރިމަތިލަމުންދާ ކަމުގައެވެ. އަދި، ޔޫކްރެއިންގެ ބިމުން އިތުރު އެންމެ މީޓަރެއް ހިފުމުގެ ފުރުޞަތު ވެސް ދީފައި ނުވާނެ ކަމުގައެވެ. އަދި، ދެކުނުގައިވާ ސަރަޙައްދުތަކުގައިވާ ބައެއް އަވަށްތައް ރަޝިޔާގެ އަތްދަށުން މިނިވަން ކުރަމުންދާ ކަމުގައި ވެސް އޭނާ ވިދާޅުވިއެވެ.
ޔޫކްރެއިނަށް ރަޝިޔާ ސިފައިން އަރައި ހަނގުރާމަ ފަށާފައި ވަނީ 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހުއެވެ. މި ހަނގުރާމައަށް 16 މަސް ފުރުމާ ގާތްވެފައިވާއިރު، ރަޝިޔާގެ ފައުޖުތަކަށް ހަތިޔާރާއި އަސްކަރީ ސާމާނު ފޯރުކޮށްދޭން ބޭނުންކުރާ މައި މަގުތަކަށް ޔޫކްރެއިނުން ވަރުގަދަ ޙަމަލާތަކެއް ދޭން ފަށާފައިވާ ކަން ފާހަގަކުރެވެއެވެ.
ޔޫކްރެއިންގެ ރައްދު ޙަމަލާގެ ކެމްޕޭނާ ގުޅޭ ގޮތުން ވާހަކަފުޅު ދައްކަވަމުން އެ ޤައުމުގެ ރައީސް ވޮލޮޑޮމީރް ޒެލެންސްކީ ވިދާޅުވީ، ރަޝިޔާއާ ދެކޮޅަށް ހޯދަމުންދާ ކުރިއެރުންތަކުގެ ދުވެލި ލަސް ކަމަށް ގަބޫލުފުޅު ކުރައްވާ ކަމުގައެވެ. ނަމަވެސް، ކުރިއެރުންތައް ލިބެމުންދާ ކަމަށާއި، ރަޝިޔާގެ ސިފައިންގެ މައްޗަށް ކާމިޔާބީ ހޯދާނެ ކަމަށާއި، ރަޝިޔާގެ އަތްދަށުން ޔޫކްރެއިންގެ ރަށްތައް މިނިވަންކުރެވޭނެ ކަމުގެ ޔަގީންކަން އޮތް ކަމުގައެވެ.
ޒަޕޮރީޜިޔާގައި ހުންނަ ނިއުކްލިޔަރ ހަކަތަ އުފައްދާ ޕްލާންޓަށް ޙަމަލާދޭން ރަޝިޔާއިން ރާވަމުންދާ ކަމުގައި ވެސް ޒެލެންސްކީ ތުހުމަތު ކުރެއްވިއެވެ. އެއީ، ވިލާތުގެ ބައްރުގައި ހުންނަ އެންމެ ބޮޑު ނިއުކްލިޔަރ ހަކަތަ އުފައްދާ ޕްލާންޓެވެ. އެ ތަނަށް ޙަމަލާއެއް ދީފި ނަމަ ނިއުކްލިޔަރ ކާރިސާއަކާ މުޅި ދުނިޔެ ކުރިމަތިލާން ޖެހޭނެއެވެ. ނަމަވެސް، ޒަޕޮރީޜިޔާ ޕްލާންޓަށް ޙަމަލާދޭން އުޅޭ ކަމަށް ޒެލެންސްކީ ކުރެއްވި ތުހުމަތުތައް ރަޝިޔާއިން ވަނީ ދޮގުކޮށްފައެވެ.