ރަޝިޔާގެ ކުލީ ސިފައިންގެ ކުންފުނި - ވެގްނަރ ގުރޫޕުން ރަޝިޔާގެ އަސްކަރިއްޔާއާ ދެކޮޅަށް ހަނގުރާމަ އިޢުލާނުކޮށްފިއެވެ. އެ ގުރޫޕުގެ ބާނީ އަދި އިސްވެރިޔާ ޔެވްގެނީ ޕްރިގޮޜިން ބުނީ ޔޫކްރެއިންގައި ތިބި އޭނާގެ ކުލީ ސިފައިންގެ ފައުޖުތައް ރަޝިޔާއަށް އެތެރެވެފައިވާ ކަމުގައެވެ. އަދި، ދިފާޢީ ވުޒާރާއާއި އަސްކަރިއްޔާގެ މަރުކަޒުތަކާ ދިމާލަށް ދަތުރު ކުރަމުންދާ ކަމުގައެވެ.
ރަޝިޔާއިން ޔޫކްރެއިނަށް އަރާ ކުރަމުންދާ ހަނގުރާމައިގެ އެންމެ އިސް ސަފުގައި ހަރަކާތްތެރިވެފައި ވަނީ ވެގްނަރ ގުރޫޕުންނެވެ. ނަމަވެސް، ހަނގުރާމައިގެ ކުރީ ސަފަށް ހަތިޔާރާއި އަސްކަރީ ސާމާނު ފޯރުކޮށްދިނުމުގައި ރަޝިޔާ ސަރުކާރާއި އަސްކަރިއްޔާއިން ފަރުވާ ކުޑަކޮށް މަކަރު ހަދަމުންދާ ކަމަށް ބުނެ، ޕްރިގޮޜިންއާއި ރަޝިޔާގެ ދިފާޢީ ވުޒާރާ މެދު ވަނީ ކޯޅުންގަނޑެއް އުފެދިފައެވެ.
ޕްރިގޮޜިން ބުނީ ޔޫކްރެއިންގައި ތިބި އޭނާގެ ސިފައިން ސަރަޙައްދީ ރޮނގު ހުރަސްކޮށް ރަޝިޔާގެ ދެކުނުގައިވާ ރަސްތޮފަށް އެތެރެވެފައިވާ ކަމުގައެވެ. އަދި، ރަޝިޔާ އަސްކަރިއްޔާއާ ދެކޮޅަށް ހަނގުރާމަ ފަށަން އޭނާގެ ސިފައިން ތައްޔާރަށް ތިބި ކަމުގައެވެ. އަދި، ވެގްނަރއާ ކުރިމަތިލާ ހުރިހާ އެންމެން ނައްތައިލާނެ ކަމުގެ އިންޒާރު ވެސް އޭނާ ދިނެވެ. ރަސްތޮފަށް އެތެރެވެފައިވާ ވެގްނަރގެ ކުލީ ސިފައިންގެ ޢަދަދު 25,000 އަށްވުރެ އިތުރުވާނެ ކަމަށް މަސްރަޙު ދިރާސާކުރާ ފަރާތްތަކުން ބުނެއެވެ.
ވެގްނަރ ގުރޫޕުން ރަޝިޔާގެ އަސްކަރިއްޔާއާ ދެކޮޅަށް ހަނގުރާމަ އިޢުލާނުކޮށްފައި ވަނީ، އެ ގުރޫޕާ ދެކޮޅަށް ރަޝިޔާގެ އަސްކަރިއްޔާއިން ވައިގެ ޙަމަލާތަކެއްދީ، ގިނަ ޢަދަދެއްގެ ކުލީ ސިފައިން މަރައިލުމާ ގުޅިގެން ކަމަށް ޕްރިގޮޜިން ބުންޏެވެ. އަދި، އެ ކަމުގެ ބަދަލުހިފާނެ ކަމުގެ އިންޒާރު އޭނާ ވަނީ ދީފައެވެ.
ރަޝިޔާގެ އަސްކަރިއްޔާއާ ދެކޮޅަށް ޕްރިގޮޜިން ހަނގުރާމަ އިޢުލާނުކޮށްފައި މި ވަނީ، އޭނާގެ އަމުރުތަކަށް ތަބާ ނުވުމަށް ރަޝިޔާގެ އަސްކަރިއްޔާއިން ވެގްނަރ ގުރޫޕުގެ ކުލީ ސިފައިންނަށް އަންގާފައިވާ ދަނޑިވަޅެއްގައެވެ. އަދި، ރަޝިޔާ ސަރުކާރާ ދެކޮޅަށް އޭނާ ބަޣާވާތެއް ކުރުމަށް ތައްޔާރުވަމުންދާ ކަމުގައި ވެސް ރަޝިޔާގެ އަސްކަރިއްޔާއާއި ރިޔާސީ ގަނޑުވަރު – ކްރެމްލިނުން ވަނީ ތުހުމަތުކޮށްފައެވެ. އޭނާ ވަގުތުން ހައްޔަރު ކުރުމަށް ވެސް ރަޝިޔާގެ ދިފާޢީ ވުޒާރާއިން ވަނީ ވެގްނަރގެ ކުލީ ސިފައިންނަށް އަންގާފައެވެ.
ރަޝިޔާގެ އަސްކަރިއްޔާއާއި ޕްރިގޮޜިންއާ ދެމެދު ޚިޔާލުތަފާތުވުންތަކެއް އުފެދިފައިވާ މި ދަނޑިވަޅުގައި އެ ޤައުމުގެ އަސްކަރިއްޔާގެ ސަލާމަތާ ބެހޭ ޚިދުމަތްތަކުގެ އިދާރާ (އެފް.އެސް.ބީ)އިން ވަނީ ޕްރިގޮޜިންއާ ދެކޮޅަށް ޖިނާޢީ ތަހުޤީޤެއް ވެސް ފަށާފައެވެ. އެ ގުރޫޕަކީ ޔޫކްރެއިންގެ ދެކުނުގައިވާ ބަޚްމުތް ހިފުމަށް ކުރި 10 މަހަށްވުރެ ގިނަ ދުވަސްވީ ހަނގުރާމައިގައި އިސް ދައުރެއް އަދާކޮށްފައިވާ ގުރޫޕެކެވެ.
ޕްރިގޮޜިންގެ އިންޒާރާ ގުޅިގެން ރަޝިޔާގައި ސަލާމަތީ ފިޔަވަޅުތައް ވަނީ ވަރުގަދަކޮށްފައެވެ. މި ގޮތުން ސަރުކާރުގެ އޮފީސްތައް ހުންނަ ޢިމާރާތްތަކާއި، ދަތުރުފަތުރުގެ ޚިދުމަތްދޭ ތަންތަނުގައި ސަލާމަތީ ބާރުތަކުން ވަނީ ފޯރިމަރަން ފަށާފައެވެ. އަދި، މި ކަމާ ގުޅޭ އެންމެ ފަހުގެ މަޢުލޫމާތު ރައީސް ވްލަޑިމިޔަރ ޕުޓިންއަށް އަދާހަމަކޮށްދެމުންދާ ކަމުގައި ރިޕޯޓުތައް ބުނެއެވެ.
މި ކަމާ ގުޅިގެން އެމެރިކާގެ ވައިޓް ހައުސްއިން ވެސް ވަނީ، ރަޝިޔާގެ ހާލަތު ވަރަށް ގާތުން ބަލަމުންދާ ކަމުގައި ބުނެފައެވެ. ޔޫކްރެއިނުން މި ކަމާ ގުޅޭ ގޮތުން ވަކި އެއްޗެއް ހާމަކޮށްފައި ނެތް ނަމަވެސް، އެ ޤައުމަށް އަތްގަދަކޮށްފައިވާ ރަޝިޔާގެ ފައުޖުތަކާ ދެކޮޅަށް ހިންގަމުންދާ ކައުންޓަރއޮފެންސިވް ނުވަތަ ރައްދު ޙަމަލާގެ އަސްކަރީ ކެމްޕޭން ވަރުގަދަ ކުރަމުންދާ ކަމުގައި އެ ޤައުމުން ބުނެއެވެ.
ޔޫކްރެއިން ހަނގުރާމައިގެ އިސް ސަފުގައި ހަރަކާތްތެރިވާ ރަޝިޔާގެ އަސްކަރިއްޔާގެ ކޮމާންޑަރުގެ ނައިބު ޖެނެރަލް ސަރްގޭ ސުރޮވިކިން ވަނީ ޕުޓިންގެ އަމުރުތަކަށް ތަބާވެ، ޔޫކްރެއިންގައި އޮތް ރަޝިޔާގެ އަސްކަރީ މަރުކަޒުތަކަށް އެނބުރި ދިޔުމަށް ވެގްނަރ ގުރޫޕުގެ ކުލީ ސިފައިންނަށް އަމުރު ކުރައްވާފައެވެ. އަދި، ރަޝިޔާގެ އަސްކަރިއްޔާއާ ދެކޮޅަށް ބަޣާވާތެއް ކުރަން މަސައްކަތްކޮށްފި ނަމަ، ރަޝިޔާގެ ދުޝްމަނުން އެ ކަމުގެ ނާޖާއިޒު ފައިދާ ނަގާނެ ކަމުގައި ވެސް އޭނާ ބުންޏެވެ.
ވެގްނަރއިން ރަޝިޔާގެ އަސްކަރިއްޔާއާ ދެކޮޅަށް ހަނގުރާމަ އިޢުލާނުކޮށްފައިވީ ނަމަވެސް، މި ކަމުގެ ފުރިހަމަ މަޢުލޫމާތު އަދި ސާފެއް ނޫނެވެ. ނަމަވެސް، ރަޝިޔާގެ އަސްކަރިއްޔާއާ ދެކޮޅަށް ޕްރިގޮޜިން ބަޣާވާތެއް ފަށައިފި ނަމަ، އެއީ ޕުޓިންގެ ސަރުކާރަށް މިހާތަނަށް ކުރިމަތިވާނެ އެންމެ ނުރައްކާތެރި އަދި އެންމެ ބޮޑު ގޮންޖެހުމަށް ވެގެންދާނެއެވެ. ޕްރިގޮޜިންއަކީ ކުރިން ޕުޓިންގެ ވަރަށް އަރިސް މީހެކެވެ.
ވެގްނަރ ގުރޫޕާއި ރަޝިޔާގެ އަސްކަރިއްޔާއާ ދެމެދު އެންމެ ފުރަތަމަ ކޯޅުންގަނޑެއް އުފެދިފައި ވަނީ ބަޚްމުތް ހިފުމަށް ކުރި ދިގު ހަނގުރާމައިގައި ކަން ފާހަގަކުރެވެއެވެ. ރަޝިޔާގެ އަސްކަރިއްޔާއިން ވެގްނަރ ގުރޫޕުގެ ކުލީ ސިފައިންނަށް އެހީތެރިކަން ފޯރުކޮށްދެމުން ނުދާ ކަމަށާއި، ހަތިޔާރާއި އެހެނިހެން އަސްކަރީ ސާމާނު ފޯރުކޮށްދީފައި ނުވާ ކަމަށް އޭނާ ކުރިން ވެސް އެތަކެއް ފަހަރެއްގެ މަތިން ވަނީ ތުހުމަތުކޮށްފައެވެ. ނަމަވެސް، ރަޝިޔާގެ ސަރުކާރުން އެ ތުހުމަތުތައް ދޮގު ކުރެއެވެ.