ނުރައްކާތެރި ބައްޔެއް ކަމުގައިވާ ކޮވިޑް-19ގެ ބަލިމަޑުކަން ފެށުނީ ޗައިނާގެ ލެބޯޓްރީއަކުން އެ ބަލީގެ ވައިރަސް ލީކުވުމުގެ ސަބަބުން ކަން ސާބިތު ކުރެވޭނެ ވަރަށް ހެކި ލިބިފައި ނެތް ކަމުގައި އެމެރިކާގެ ޖާސޫސީ ރިޕޯޓަކުން ހާމަވެއްޖެއެވެ. ކޮވިޑް ބަލި ޖެހިފައިވާ މީހަކު އެންމެ ފުރަތަމަ ފެނިފައި ވަނީ ޗައިނާގެ ހުބޭއީ ޕުރޮވިންސުގެ ވޫހާނުންނެވެ. އެއީ 2019 ވަނަ އަހަރުގެ ޑިސެންބަރު މަހުއެވެ.
އެ ބަލި އެންމެ ފުރަތަމަ ފެތުރެން ފަށާފައި ވަނީ ވޫހާންގައި ހުންނަ ދިރޭތަކެތި ވިއްކާ މާރުކޭޓެއް ހުންނަ ސަރަޙައްދަކުންނެވެ. އަދި، ހަލުވިކަމާ އެކު ޗައިނާގެ އެކި ކަންކޮޅުތަކުގައި ފެތުރިގަތުމަށްފަހު، ދުނިޔޭގެ އެކި ކަންކޮޅުތަކަށް ބަލި ފެތުރުނެވެ. އަދި، މުޅި ދުނިޔޭގެ ޞިއްޙީ ކުއްލި ނުރައްކަލުގެ ހާލަތު އިޢުލާނުކޮށް ހުރިހާ ޤައުމެއް ފުރަބަންދުކުރަން ޖެހުނެވެ.
މި ބަލީގެ ވައިރަސް އިންސާނުންނާ ހަމައަށް ވާސިލުވެފައި ވަނީ ޗައިނާގެ ލެބޯޓްރީއަކުން ވައިރަސް ލީކުވުމުގެ ސަބަބުން ކަމަށް އެމެރިކާއިން މީގެ ކުރިން ވަނީ ތުހުމަތުކޮށްފައެވެ. އެމެރިކާއިން ތުހުމަތުގެ އިނގިލި ދިއްކޮށްފައި ވަނީ ވޫހާން އިންސްޓިޓިއުޓް އޮފް ވައިރޮލޮޖީ (ޑަބްލިޔު.އައި.ވީ)އަށެވެ. ނަމަވެސް، ޗައިނާއިން ވަނީ އެ ތުހުމަތުތައް ދޮގުކޮށްފައެވެ. އަދި، ބަލި ފެށުނީ ވޫހާންގެ ލެބޯޓްރީން ކަން ސާބުތުވާނެ ހެކި ނެތް ކަމުގައި އެމެރިކާއިން ބުނި މިއީ ފުރަތަމަ ފަހަރެވެ.
ބަލީގެ ވައިރަސް ވޫހާންގެ ލެބޯޓްރީން ލީކުވެފައިވާ ކަން ސާބިތުވާނެ ހެކި ނެތް ކަން ހާމަވެފައި ވަނީ އެމެރިކާގެ އޮފިސް އޮފް ދަ ޑިރެކްޓަރ އޮފް ނޭޝަނަލް އިންޓެލިޖެންސް (އޯ.ޑީ.އެން.އައި)ގެ ރިޕޯޓަކުންނެވެ. މި ކަމާ ގުޅޭ ގޮތުން އޯ.ޑީ.އެން.އައިއިން ތައްޔާރު ކުރި ރިޕޯޓު މިހާރު ވަނީ ޑީކްސެލިފައި ނުވަތަ ޢާންމު ކޮށްފައެވެ.
އެ ރިޕޯޓުގައި ބުނެފައި ވަނީ، ބަލި ފެތުރެން ފަށާފައި ވަނީ ވޫހާންގެ ލެބޯޓްރީން ބަލީގެ ވައިރަސް ލީކުވުމުގެ ސަބަބުން ކަމަށް ބެލުމުގެ ފުރުޞަތު އަދިވެސް އޮތް ކަމުގައެވެ. ނަމަވެސް، ބަލީގެ އަސްލު އަދި ދެނެގަނެވިފައި ނުވާތީ، ވޫހާންގެ ލެބޯޓްރީން ވައިރަސް ލީކުވެފައިވާ ކަން ސާބިތުކޮށްދެވޭނެ ވަރަށް ހެކި ލިބިފައި ނުވާ ކަމުގައެވެ. ވޫހާންގެ ލެބޯޓްރީއަކީ ކޮރޯނާވައިރަސްގެ ދިރާސާތަކެއް ކުރަމުން ގޮސްފައިވާ ލެބޯޓްރީއެކެވެ.
މި ކަމާ ގުޅޭ ގޮތުން އެމެރިކާގެ ޖާސޫސީ އިދާރާތަކުން ހަދާފައިވާ ތަހުޤީޤީ ރިޕޯޓުތައް ޢާންމުކޮށްފައި މި ވަނީ އެ ޤައުމުގެ ރައީސް ޖޯ ބައިޑަންގެ ނިންމެވުމެއްގެ ދަށުންނެވެ. އެ ރިޕޯޓުތައް ޑީކްލެސިފައި ކުރަން ނުވަތަ ޢާންމު ކުރަން ނިންމަވައި، އެ ކަމުގެ ހުއްދަ ދެއްވަމުން ބައިޑަން ވިދާޅުވީ، ކޮވިޑްގެ އަސްލު ދެނެގަތުމަކީ ކޮންމެހެން މުހިންމު ކަމެއްގެ ގޮތުގައި ދެކެވަޑައިގަންނަވާ ކަމުގައެވެ.
މި އަހަރުގެ ފެބުރުވަރީ މަހު ވެސް އެމެރިކާގެ ހަކަތައާ ބެހޭ އިދާރާއިން ވަނީ ކޮވިޑްގެ ބަލިމަޑުކަން ފެށިފައި ވަނީ ބަލީގެ ވައިރަސް ވޫހާން ލެބޯޓްރީން ލީކުވުމުގެ ސަބަބުން ކަމަށް ތުހުމަތުކޮށްފައެވެ. މި ބަލީގެ ފެށުން ހޯދުމަށް ދުނިޔޭގެ ޞިއްޙަތު ޖަމުޢިއްޔާ (ޑަބްލިޔު.އެޗް.އޯ)އިން ވެސް ދަނީ ހުއްޓުމެއް ނެތި މަސައްކަތް ކުރަމުންނެވެ. އަދި، ބަލީގެ ވައިރަސް ފެށިފައި ވަނީ ލެބޯޓްރީއަކުން ނޫން ކަމަށް ޑަބްލިޔު.އެޗް.އޯ.އިން ވެސް ޤަބޫލުކުރާ ކަމަށް ޗައިނާއިން ބުނެއެވެ.